8-ماۋسىم كۇنى قازاق مەملەكەتتىك قىزدار پەداگوگيكالىق ۋنيۆەرسيتەتىندە قازاق ءالفاۆيتىن لاتىن گرافيكاسىنا كوشىرۋ جونىندەگى ورتالىق اشىلادى, دەپ حابارلادى وقۋ ورنىنىڭ ءباسپاسوز قىزمەتى.
ءبىلىم بەرۋ مەكەمەسىندە وقۋ ورنىنىڭ پروفەسسور-وقىتۋشىلارى مەن ستۋدەنتتەرى لاتىن گرافيكاسى نەگىزىندەگى جاڭا قازاق ءالىپبيى بويىنشا وقىپ, جازۋدى مەڭگەرەدى. سونداي-اق, مۇعالىمدەردىڭ بىلىكتىلىگىن ارتتىرۋعا جانە جەتىلدىرۋگە باعىتتالعان قوسىمشا كاسىبي ءبىلىم بەرۋ باعدارلامالارى جۇرگىزىلمەك. بىرنەشە باعىت بويىنشا جۇمىس ىستەيتىن ورتالىققا بىلىكتى ءتىل ماماندارى جۇمىلدىرىلعان.
ورتالىقتا وقۋ ورداسىنىڭ عالىمدارى جاڭا ءالىپبيدىڭ ورفوگرافياسى مەن ورفوەپياسىن قالىپتاستىرۋ باعىتىندا ارنايى ساباقتار مەن كۋرستار وتكىزەدى. جاڭا ءالىپبي بويىنشا وقۋ-ادىستەمەلىك كەشەن جاسالىپ, الداعى ۋاقىتتا ارنايى وقۋ قۇرالدارى دا جارىق كورمەك. قازىرگى كۇندە ارنايى تۇجىرىمداما جاسالىپ, نەگىزگى باسىم باعىتتارى ءتۇزىلدى.
– جاڭا زاماننىڭ جاستارى وزگەرمەلى ۋاقىتتا ءومىر سۇرۋگە قابىلەتتى بولىپ قانا قويماي, وقيعالار مەن ۇدەرىستەردىڭ ورتاسىندا, كوش باسىندا بولۋى ءتيىس. بۇل تەرەڭ تۇيسىنە بىلگەنگە باسەكەلەستىككە اپارار جولدىڭ باسى, ۇلتتىق كودىمىزدى كوزدىڭ قاراشىعىنداي ساقتاۋدىڭ نەگىزى. قازىرگى مەملەكەتىمىزگە ۇلتتى ۇيىستىرا الاتىن, تىڭ باعىتتاعى رۋحاني اعىم كەرەك. لاتىن ءارىپىن ەنگىزۋدىڭ باستى وزەگى دە وسىندا جاتىر. سوندىقتان دا جاڭا ءالىپبي ەلىمىز ءۇشىن قاجەتتى, ۋاقىت تالابىنان تۋىنداپ وتىرعان جاڭا اتريبۋت, اسا ماڭىزدى فاكتور دەپ سانايمىز, – دەپ اتاپ ءوتتى قىزدار ۋنيۆەرسيتەتىنىڭ ءباسپاسوز جانە قوعاممەن بايلانىس ءبولىمىنىڭ باسشىسى جاندار اسان.