استاناداعى «داۋلەت» تەننيس ورتالىعىندا بوكستان حالىقارالىق VI قازاقستان پرەزيدەنتى كۋبوگى ءتۋرنيرى باستالدى. وسى جارىسقا وراي ارنايى ءباسپاسوز ءماسليحاتى ءوتىپ, وعان قازاقستان بوكس فەدەراتسياسىنىڭ ۇيلەستىرۋشىسى بولات ءابدىراحمانوۆ, ەرلەر ۇلتتىق قۇراماسىنىڭ باس جاتتىقتىرۋشىسى مىرزاعالي ايتجانوۆ, قىزدار قۇراماسىنىڭ باس جاتتىقتىرۋشىسى ۆاديم پريسياجنيۋك, ريو وليمپياداسىنىڭ كۇمىس جۇلدەگەرى ۆاسيلي لەۆيت جانە قىزدار اراسىندا الەمنىڭ ەكى دۇركىن چەمپيونى نازىم قىزايباي قاتىستى.
بيىلعى دوداعا بەلارۋس, ءۇندىستان, جاپونيا, قىرعىزستان, موڭعوليا, قىتاي, فيليپپين, رەسەي, شۆەتسيا, تاجىكستان, تايلاند, تۇرىكمەنستان, اقش, وزبەكستان جانە ەلىمىزدىڭ ەڭ ۇزدىك دەگەن 180-گە جۋىق بىلعارى قولعاپ شەبەرى قاتىسۋعا نيەت بىلدىرگەن. سونىمەن قاتار اتالعان ەلدەردىڭ قىزدار قۇراماسى دا استانادا ءوز باقتارىن سىناماق. قازاقستان كۋبوگىندا ەرلەر تولىق 10 سالماق بويىنشا, قىزدار ءتورت سالماق, ياعني 51, 57, 60 جانە 75 كيلو سالماقتا جۇدىرىقتاسادى.
بولات ءابدىراحمانوۆتىڭ ايتۋىنشا, بوكستان VI قازاقستان پرەزيدەنتى كۋبوگىنا ەڭ كوپ بوكسشى تايلاند ەلىنەن كەلگەن. «جارىسقا قاتىسۋشى 15 ەلدىڭ ىشىنەن ەڭ كوپ بىلعارى قولعاپ شەبەرى تايلاند قۇراماسىنا تيەسىلى. 17 بوكسشى. ەكىنشى ورىندا 16 بوكسشى اكەلگەن وزبەكستان قۇراماسى بولسا, ءۇندىستاننان 14 بىلعارى قولعاپ شەبەرى كەلدى. سونىمەن قاتار جارىسقا قاتىسۋشىلاردىڭ باسىم بولىگى ءوز ەلىنىڭ ءنومىرى ءبىرىنشى بوكسشىلارى. مىسالى, وزبەكستان قۇراماسىنان وليمپيادا چەمپيوندارى – حاسانبوي دۋسماتوۆ (49 كگ) پەن شاحوبيددين زويروۆ (56 كگ), تايلاند قۇراماسى ساپىنداعى ەكى دۇركىن ازيا چەمپيونى ۆۋتتيچاي ماسۋك (64 كگ) جانە 2015 جىلعى قۇرلىق چەمپيونى چاتچاي بۋتدي (52 كگ). سونداي-اق 2015 جىلعى الەم چەمپيوناتىندا دانيار ەلەۋسىنوۆپەن كەزدەسكەن فيليپپيندىك ەۋمير مارسيال (69 كگ) مەن چارلي سۋارەس (60 كگ) دە كەلدى», دەيدى ول.
ال قۇراما باس جاتتىقتىرۋشىسى مىرزاعالي ايتجانوۆ بوكستان پرەزيدەنت كۋبوگى ازيا ويىندارىنا باراتىن قۇرامدى انىقتاپ بەرەدى دەيدى. سونداي-اق ول اتالعان تۋرنير ازيا ەلدەرىنىڭ قۇرامالارى ءۇشىن ازيا ويىندارى الدىنداعى سوڭعى دايىندىق ىسپەتتى ەكەنىن ايتتى. ء«بىرىنشى كەزەكتە بوكستان پرەزيدەنت كۋبوگى ازيا ويىندارى الدىندا وتكىزىلىپ جاتقانى زور ماڭىزعا يە. تۋرنيرگە ءبىزدىڭ ازياداعى باس- تى قارسىلاستارىمىز وزبەكستان, قىتاي, موڭعوليا سياقتى قۇرامالار ءوز ەلىنىڭ ۇزدىكتەرىن الىپ كەلدى. بۇل ءبىز ءۇشىن دە جاقسى تاجىريبە الماسۋ جانە ازيا ويىندارى الدىندا كۇشىمىزدى ءبىر بايقاپ الۋعا جاقسى مۇمكىندىك. وسى جارىستان سوڭ ازيا ويىندارىنا باراتىن قۇراما ءبىرشاما انىقتالىپ قالادى. دەگەنمەن ءبىر-ەكى سالماقتا ءالى دە ىرىكتەۋ بولادى», دەيدى باس جاتتىقتىرۋشى.
بوكستان VI قازاقستان پرەزيدەنتى كۋبوگى 10 ماۋسىمعا دەيىن جالعاسادى. بوكس جانكۇيەرلەرى جەكپە-جەكتەردى «Qazsport» تەلەارناسىنان تاماشالاي الادى.
ءالي بيتورە,
«ەگەمەن قازاقستان»