ارتۋر پلاتونوۆ: ناۋقاس وقۋشىلارعا ەمدىك جاتتىعۋلار قاجەت

وسىعان دەيىن دەنە تاربيەسى ساباقتارىنىڭ ستاندارتتى جۇك­تەمەسىن كوتەرە الماعاندىق­­تان سىرقات نەمەسە مۇگەدەك­تىككە ۇشىراپ قالعان بالالارعا اي­رىقشا كوڭىل بولىنبەيتىن. ون­داي­لار ءتۋابىتتى سىرقاتتار مەن سىرت­قا بىلىنبەيتىن ناۋقاستارى بار وقۋ­شىلار اراسىنان كوبىرەك شى­عىپ وتىردى. ماسەلەن, سونداي­دىڭ كە­سىرىنەن الماتىنىڭ №118, اقتوبەن­ىڭ №41 مەكتەبىندە ەكى جاس و­سكىننىڭ قۇربان بولۋىنا جول بەرىلدى.

دەنساۋلىق ساقتاۋ مينيستر­لىگىنىڭ مالىمەتتەرىنە قارايتىن بولساق, 14 جاسقا دەيىنگى بالالار اراسىندا قايتىس بولعانداردىڭ اراسىندا سوزىلمالى دەرتتەر مەن پاتولوگياعا شالدىققاندار ءجيى كەزدەسەدى. ەكىنشى ورىندا ءتۋابىتتى ناۋقاستار مەن ءتۇرلى دەفورماتسيالار. ال 15-تەن18 جاسقا دەيىنگى جاسوسپىرىمدەر اراسىنداعى اجالدىڭ نەگىزگى بولىگى سىرتقى دەرتتەردىڭ كەسىرىنەن بولادى ەكەن.

وكىنىشكە قاراي, جۇرەكتىڭ كەنەتتەن توقتاپ قالۋى سەبەبىنەن ءبىز جىل سايىن 10-15 جاسوسپىرىمنەن ايىرىلىپ كەلەمىز. مۇنىڭ ىشىندە مەكتەپ وقۋشىلارىمەن قاتار كوللەدجدەر مەن جوو وقۋشىلارى مەن ستۋدەنتتەر دە بار.

دارىگەرلەردىڭ ايتۋىنا قارا­عان­دا, اجالعا سەبەپ «جەدەل جاردەمنىڭ» كەشىگۋى عانا ەمەس, جۇرەگى اۋىرعان ادامدارعا ماڭا­يىنداعىلاردىڭ العاشقى مەدي­تسينالىق كومەك جاساي الماۋى كورىنەدى. بۇرىن العاشقى مەدي­تسينالىق كومەكتى جاساۋدى جوو تۇگىل مەكتەپ قابىرعاسىندا دا ۇيرەتەتىن. قازىر ونى ارتىق ءبىلىم رەتىندە الىپ تاستاعان.

ونىڭ ۇستىنە باس پروكۋراتۋرا مەكتەپتەردەگى مەدبيكە مامان­دار­دىڭ بىلىكتىلىگى تومەن, وزگە تۇگىل العاشقى مەديتسينالىق كومەك­تى قالاي جاساۋدى دا بىلمەي­تىن ادامدار ەكەنىن, سونىمەن قاتار مە­دي­تسينالىق جاراقتاردىڭ تاپشى ەكەنىن انىقتاعان.

وسىعان بايلانىستى ءبىز پرەمەر-ءمينيستردىڭ ورىنباسارى ەربولات دوساەۆقا دەپۋتاتتىق ساۋال جولداپ, ءبىلىم جانە عىلىم, دەنساۋلىق ساقتاۋ مينيسترلىكتەرى اراسىنداعى وسى ماسەلەگە بايلانىستى ءوزارا ءىس-قيمىلداردى جانداندىرۋ جانە دەنە تاربيەسى پانىندە جالپى جۇكتەمەلەردى كوتەرە المايتىن ناۋقاس بالالاردى انىقتاپ, ولارعا ەمدىك جاتتى­عۋلار ۇيىمداستىرۋ قاجەتتىگىن جەتكىزدىك.

ارتۋر پلاتونوۆ, ءماجىلىس دەپۋتاتى