جۋىق ارادا اقتوبە وبلىسىنداعى بارلىق اۋدان ورتالىقتارىندا جاڭا كورىكتى جەرلەر اكەلەر اللەياسىمەن تولىقتىرىلادى. بۇل تۋرالى III رەسپۋبليكالىق اكەلەر فورۋمى بارىسىندا وبلىس اكىمى بەردىبەك ساپارباەۆ حابارلادى.
جوبانىڭ ماقساتى - قوعامنىڭ نازارىن اكەنىڭ ءرولى مەن اكەنىڭ وسكەلەڭ ۇرپاقتى تاربيەلەۋدە قوساتىن ۇلەسى ماسەلەلەرىنە اۋدارۋ.
- مەملەكەت باسشىسى قازاقستاندىق وتباسىلاردىڭ ءال-اۋقاتىن جاقسارتۋعا جانە قولداۋعا ۇلكەن كوڭىل بولەدى. وسى ماقساتتا كوپتەگەن مەملەكەتتىك باعدارلامالار مەن زاڭدار قابىلداندى, وتباسىلىق-دەموگرافيالىق ساياسات جونىندەگى ۇلتتىق كوميسسيا قۇرىلدى. بالالاردى تاربيەلەۋدەگى اكەلەردىڭ ءرولىن باعالاۋ وتە قيىن. وبلىستىڭ بارلىق اۋداندارىندا ۇلگىلى اكەلەردىڭ مارتەبەسىن اسىرۋ ماقساتىندا اكەلەر اللەياسىن سالۋدى جوسپارلاپ وتىرمىز, - دەپ مالىمدەدى بەردىبەك ساپارباەۆ.
وبلىس اكىمى سونداي-اق, قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسياسىنا اقتوبە قالاسىندا اقتوبە وبلىسىنىڭ 2018 جىل بالا جىلى دەپ اتالۋىنا وراي رەسپۋبليكالىق اكەلەر فورۋمىن وتكىزۋ جونىندەگى باستاماسىن قولداعانى ءۇشىن العىس ايتتى.
فورۋم جۇمىسىنا بارلىق وڭىرلەردەن دەلەگاتتار, ۇلتتىق كوميسسيانىڭ باسشىلىعى مەن مۇشەلەرى, قر پارلامەنتى دەپۋتاتتارى, ورتالىق مەملەكەتتىك جانە جەرگىلىكتى اتقارۋشى ورگانداردىڭ باسشىلارى, قوعام قايراتكەرلەرى, ۇكىمەتتىك ەمەس ۇيىمداردىڭ وكىلدەرى, سونداي-اق ۇلگىلى اۋلەت باسشىلارى قاتىسۋدا. فورۋم باستالعانعا دەيىن ولار شىعارماشىلىق اكادەمياسىندا روبوتوتەحنيكا, اقپاراتتىق-كوممۋنيكاتسيالىق تەحنولوگيالار, قولدانبالى ونەر بويىنشا بالالار جۇمىستارىنىڭ كورمەسىمەن تانىستى.
فورۋم مودەراتورى, قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات سۇلەيمەن ءوزىنىڭ قۇتتىقتاۋ سوزىندە پرەزيدەنتتىڭ جارلىعىمەن قابىلدانعان قر 2030 جىلعا دەيىنگى وتباسى جانە گەندەرلىك ساياسات تۇجىرىمداماسىندا بالا تاربيەسىندەگى اتا-انالاردىڭ جاۋاپكەرشىلىگىن ارتتىرۋ جانە اكەلەر ينستيتۋتىن دامىتۋ جونىندە تاپسىرما قويىلعانىن اتاپ ءوتتى.
- بۇگىندە اكەنىڭ وتباسى تاربيەسىندەگى ءرولىن ارتتىرۋ, قوعام نازارىن بالالاردىڭ پاتريوتيزم سەزىمىن قالىپتاستىرۋداعى اكە ءرولىن كۇشەيتۋ ماسەلەلەرىنە اۋدارۋ, «رۋحاني جاڭعىرۋ» باعدارلاماسى شەڭبەرىندە بىلىمگە ۇمتىلدىرۋ - ءبىزدىڭ جۇمىسىمىزدىڭ باسىمدىعى بولىپ تابىلادى, - دەپ اتاپ ءوتتى ل.سۇلەيمەن.
قاتىسۋشىلار اكەلەر ينستيتۋتىنىڭ قوعامدى رۋحاني جاڭعىرتۋداعى ءرولىن, جۇمىستى بالالاردى جاۋاپتى تاربيەلەۋمەن ۇيلەستىرۋدى, اكە تاربيەسىنىڭ ادىستەرىن, قازاقستاندا اكەلەردىڭ قوعامدىق قوزعالىسى دامۋىنىڭ بۇگىنى مەن كەلەشەگىن جانە باسقا دا وزەكتى تاقىرىپتاردى تالقىلادى.
رەسپۋبليكالىق فورۋمنىڭ قورىتىندىسى بويىنشا اكەلەر قوزعالىسىن دامىتۋ جونىندەگى بىرلەسكەن جۇمىستى كۇشەيتۋ تۋرالى قارار قابىلداندى, وندا «اكەلەر كەڭەسى» قب تۇلعاسىنداعى ازاماتتىق قوعام ماڭىزدى ءرول اتقارۋى ءتيىس. فورۋم ناتيجەلەرىنىڭ ءبىرى اتالمىش قوعامدىق بىرلەستىكتىڭ بولىمشەلەرىن ەلىمىزدىڭ بارلىق وڭىرلەرىندە اشىلۋى بولادى دەپ كۇتىلۋدە.
بۇدان باسقا, ۇزدىك ۇلگىلى اكەلەرگە ۇلتتىق كوميسسيا اتىنان العىس حاتتار تابىس ەتىلدى.
ايتا كەتەيك, سول كۇنى اقتوبەدە رەسپۋبليكالىق بالالار شەرۋىنىڭ, «باقىتتى بالا» حالىقارالىق فەستيۆال-بايقاۋىنىڭ اشىلۋ سالتاناتى ءوتتى. بۇل قوعامدى رۋحاني جاڭعىرتۋعا باعىتتالعان الەۋمەتتىك ماڭىزى بار جوبالاردى ىسكە اسىرۋدىڭ لايىقتى ۇلگىسى بولدى.
تەمىر قۇسايىن,
«ەگەمەن قازاقستان»
اقتوبە