قازاقستان پرەزيدەنتى بەس الەۋمەتتىك باستامانى جۇزەگە اسىرۋعا باعىتتالعان قاراجاتتىڭ ءاربىر تيىنى ءتيىستى جەرىنە جەتۋى كەرەكتىگىن, بۇل باعىتتا قوعامدىق باقىلاۋ دۇرىس جۇرگىزىلۋى كەرەكتىگىن اتاپ ءوتتى, دەپ حابارلايدى قازاقپارات.
استانادا پرەزيدەنت نۇرسۇلتان نازارباەۆتىڭ قاتىسۋىمەن ءوتىپ جاتقان «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسىندا سەناتور باقىتجان جۇماعۇلوۆ بەس الەۋمەتتىك باستامانى ىسكە اسىرۋدا قوعامدىق باقىلاۋ قولعا الىنعانىن ايتتى. ايتا كەتەرلىگى, «نۇر وتان» پارتياسىنىڭ مۇرىندىق بولۋىمەن پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋىن باقىلاۋ جونىندەگى قوعامدىق كەڭەستىڭ توراعاسى بولىپ باقىتجان جۇماعۇلوۆ تاعايىندالعان بولاتىن.
«ەلىمىز ءۇشىن ەرەكشە ماڭىزى بار, حالىقتىڭ كەمەل كەلەشەككە دەگەن سەنىمىن نىعايتقان بەس الەۋمەتتىك باستاماڭىز ەلدە ۇلكەن ۇمىتپەن قابىلدانىپ, قولداۋ تاۋىپ جاتىر. وسى يگى ءىستى باقىلاۋدى «نۇر وتان» پارتياسىنا تاپسىردىڭىز. بۇل ءاربىر نۇروتاندىققا دەگەن ۇلكەن جاۋاپكەرشىلىك پەن سەنىم دەپ بىلەمىز. وسىعان وراي, قوعامدىق كەڭەس قۇرىلىپ, ءوز جۇمىسىن باستادى. بىزگە جۇكتەلگەن ماقسات-مىندەتتەر ايقىن ءارى انىق. ەڭ باستىسى مىندەتىمىز - باستامالاردى ءتيىمدى جۇزەگە اسىرۋ ءۇشىن پارتيانىڭ جانە قوعامنىڭ بەلسەندى كۇشتەرىن جۇمىلدىرىپ, مەملەكەتتىك ورگاندارعا جان-جاقتى كومەك كورسەتۋ. سوندىقتان, قوعامدىق كەڭەسكە اۋقىمدى مىندەتتەر جۇكتەلىپ وتىر», - دەدى باقىتجان جۇماعۇلوۆ.
اتاپ ايتقاندا, بىرىنشىدەن - بەس الەۋمەتتىك باستامانىڭ جۇزەگە اسۋىنا قوعامدىق مونيتورينگ جانە باقىلاۋ جاساۋ, ۇيلەستىرۋ. ەكىنشىدەن - الەۋمەتتىك باستامالاردىڭ جۇزەگە اسىرىلۋى تۋرالى اقپاراتتى حالىققا دەر كەزىندە جەتكىزۋ. ۇشىنشىدەن - باستامالاردى جۇزەگە اسىرۋ كەزىندەگى ماسەلەلەردى انىقتاۋ جانە ولاردى شەشۋ جونىندە ۇسىنىستار دايارلاپ, مەملەكەتتىك ورگاندارعا ولاردىڭ ساپالى ورىندالۋىنا اتسالىسۋ.
«ۇكىمەت بەكىتكەن جول كارتاسى ءبىزدىڭ وسى باعىتتاعى جۇمىستارىمىزدىڭ نەگىزى بولىپ تابىلدى. بەس باعىت بويىنشا كەڭەستىڭ جۇمىس توپتارى جانە وڭىرلىك كەڭەستەر قۇرىلدى. مەملەكەتتىك ورگاندار مەن جەتەكشى ساياسي پارتيالارمەن, قحا, ۇلتتىق كاسىپكەرلىك پالاتاسىمەن, كاسىپكەرلىك فەدەراتسياسىمەن, ۇەۇ-لارمەن بىرلەسە جۇمىس ىستەۋدىڭ تۇراقتى مەحانيزمى قاراستىرىلدى. سەنات پەن ءماجىلىستىڭ دەپۋاتتىق كورپۋسى باستامالاردى ءتيىمدى جۇزەگە اسىرۋدى قامتاماسىز ەتەتىن زاڭنامالاردىڭ دايىندالۋىنا جانە قابىلدانۋىنا جۇيەلى قولداۋ كورسەتىپ كەلەدى. كەڭەستىڭ 4 مامىر كۇنى وتكەن العاشقى وتىرىسىندا جانە ودان كەيىن دە جۇمىس توپتارى بويىنشا كەڭىنەن تالقىلاندى. وعان بارلىق جاۋاپتى مينيسترلىكتەر مەن ۇلتتىق بانك وكىلدەرى بەلسەنە قاتىستى», - دەدى ول.
قوعامدىق كەڭەس توراعاسىنىڭ ءسوزىن تىڭداعان پرەزيدەنت باقىلاۋدى ناقتى تۇردە جۇزەگە اسىرۋ كەرەكتىگىن اتاپ ءوتتى. «قارجىلىق باقىلاۋ دا جۇرگىزىلۋى ءتيىس. مەن ناتاليا نيكولاەۆنا گودۋنوۆاعا (ەسەپ كوميتەتىنىڭ ءتورايىمى - اۆت.) تاپسىردىم. باقىلاۋ ءۇشىن بىرلەسە جۇمىس اتقارۋى كەرەك. ءاربىر تيىن ءتيىستى جەرىنە جەتۋى كەرەك. ءبىز 2008 جىلعى داعدارىس كەزىندە ءدال وسىلاي جۇمىس ىستەگەنبىز. قازىر دە سولاي جۇمىس اتقارۋ كەرەك», - دەدى نۇرسۇلتان نازارباەۆ.
سونداي-اق ەلباسى «ديپلوممەن اۋىلعا» باعدارلاماسىن توقتاتپاۋ كەرەكتىگىن باسا ايتتى. «ديپلوممەن اۋىلعا» باعدارلاماسىن توقتپاۋىمىز كەرەك. اۋىلدان ءبارىبىر قالاعا كوشۋ بار, ونى توقتاتا المايسىڭ. ۋربانيزاتسيا بۇكىل الەمدە ءجۇرىپ جاتىر, بىزدە دە بولادى. ەگەر وعان ماماندىق بەرىپ تۋعان اۋىلىنا بەكىتىپ, جۇمىسىنىڭ باستاپقى كەزەڭىندە نازار اۋداراتىن بولساق, وندا بوي ۇيرەتىپ, جۇمىس ىستەيتىن بولادى", - دەپ اتاپ ءوتتى مەملەكەت باسشىسى.
وسى رەتتە ەلباسى جاستاردىڭ اۋىلدا ەڭبەك ەتۋىنە جاعداي جاساۋدا «نۇر وتان» جان-جاقتى جۇمىستار جۇرگىزۋى قاجەتتىگىن باسا ايتتى. «نۇرلانعان وتان جاسايمىز دەپ اتىن قويدىق قوي. وتان دەگەنىمىز - ەلىڭ, جەرىڭ, وتباسىڭ, بالا-شاعاڭ. «نۇر وتان» وتانشىلداردىڭ پارتياسى, وتانىن سۇيگەندەردىڭ پارتياسى. «وتانىن سۇيگەندەر - ءاربىر ءوز ازاماتىن سۇيگەندەر» دەپ ساناۋ قاجەت. ءبىز وسىنداي بولۋىمىز كەرەك. ءبىرىنشى دارەجەدەگى ۇيىمدارىمىز, اۋدانداردا, قالالاردا, وبلىستاردا بار. ولارعا دۇرىس ادامداردى قويىپ, جۇمىس ىستەتە ءبىلۋىمىز كەرەك. ورتالىقتان جۇرگىزىپ جاتقان ماسەلەلەر, ءبىزدىڭ قابىلداپ وتىرعان باعدارلامالارىمىزدىڭ بارلىعى قاراپايىم ادامدار ءۇشىن", - دەدى نۇرسۇلتان نازارباەۆ.