جاپونيانىڭ قازاقستانداعى ء«شوپ تامىرى» الەۋمەتتىك جوباسىنا وراي سەمەيدەگى ەسكىرگەن مەكتەپتەردىڭ ەسىك-تەرەزەلەرىن جوندەۋگە كۇنشىعىس ەلى بەلسەنە اتسالىسۋدا. شاتىرلارى جابىلىپ, تەرەزەلەرى جوندەلىپ, تاعى باسقا كەرەك-جاراقتارى قامتىلعان مەكتەپتەردىڭ سىرتقى كەلبەتى قالاي وزگەرگەندىگىن كوزبەن كورۋ ءۇشىن قازاقستانداعى جاپونيانىڭ توتەنشە جانە وكىلەتتى ەلشىسى يتيرو كاۆاباتو مىرزا سەمەيگە ارنايى كەلدى.
– ء«شوپ تامىرى» جوباسىن قولعا العاننان بەرى شىعىس قازاقستان وبلىسىندا 22 جوبانى جۇزەگە اسىردىق. ونىڭ جالپى قۇنى 1 ملن 400 مىڭ اقش دوللارى تۇرادى, – دەدى ەلشى يتيرو كاۆاباتو مىرزا. وسى قارجىنىڭ قوماقتى بولىگى سەمەي مەكتەپتەرىنىڭ تەرەزەلەرىن جوندەۋگە, ياعني زاماناۋي پلاستيك تەرەزەلەرگە اۋىستىرۋعا جۇمسالدى. ءبىز وسى ء«شوپ تامىرى» جوباسى ارقىلى الەۋمەتتىك, مەديتسينالىق, ءبىلىم بەرۋ مەكەمەلەرىنە كومەك كورسەتەمىز. قازىرگى ۋاقىتتا سەمەيدە 8 مەكتەپ جوندەلدى.
قوناقتار ءۇشىن سەمەيدەگى پريگورود مەكتەبى, №29 مەكتەپ سياقتى ءبىلىم وشاقتارى ارنايى باعدارلاما ازىرلەپ كورسەتتى. ولار ەلشىنى ءوز جەتىستىكتەرىمەن تانىستىردى.
– ءبىزدىڭ قالا بيۋدجەتىنە جاپونيا ەلىنىڭ قارجىسى ءبىرشاما كومەك بولىپ وتىر, – دەدى سەمەي قالالىق ءبىلىم ءبولىمىنىڭ باسشىسى ناتاليا فەسەنكو. ماسەلەن, ءبىر مەكتەپتىڭ تەرەزەسىن اۋىستىرۋ 20 ملن تەڭگەدەن اسىپ جىعىلادى. 2018 جىلى قالا بيۋدجەتىنەن №21 مەكتەپتىڭ تەرەزەلەرىن جاڭالاۋعا عانا قارجى بەرىلگەندىكتەن, قالعان مەكتەپتەردى جوندەۋگە بىزگە كۇنشىعىس ەلىنىڭ پايداسى ءتيدى.
راۋشان نۇعمانبەك,
جۋرناليست
سەمەي