قازاقستان رەسپۋبليكاسى «اتامەكەن» ۇلتتىق كاسىپكەرلەر پالاتاسىنىڭ تورالقا توراعاسى تيمۋر ق ۇلىباەۆ باتىس قازاقستان وبلىسىنا جۇمىس ساپارىمەن كەلىپ, وبلىستىق كاسىپكەرلەر پالاتاسى وڭىرلىك كەڭەسىنىڭ وتىرىسىنا قاتىستى.
كەڭەستىڭ باستى تاقىرىبى – باتىس قازاقستان وڭىرىندەگى كاسىپكەرلىكتىڭ دامۋى, جەرگىلىكتى كاسىپكەرلەر كەزدەسەتىن ءتۇرلى قيىندىقتاردى شەشۋ جولى, بيزنەس باستامالاردى مەملەكەتتىك ورگاندار تاراپىنان قولداۋ ماسەلەلەرى بولدى.
- وڭىردە 1 مامىرداعى مالىمەت بويىنشا, 38,6 مىڭ كاسىپكەرلىك نىسان جۇمىس ىستەپ تۇر. بۇل وتكەن جىلعىدان 4,5 پايىزعا ارتىق. 113 مىڭ ادام شاعىن جانە ورتا كاسىپكەرىك سالاسىندا جۇمىس ىستەيدى. وسى سەكتوردىڭ وزىنەن 52 ملرد. تەڭگەدەن استام سالىق ءتۇستى. وبلىس بيۋدجەتى 185 ملرد. تەڭگەنى قۇرايدى, سونىڭ 53 ملرد. تەڭگەسى شاعىن جانە ورتا كاسىپكەرلىكتەن تۇسەدى. وتكەن جىلى وڭىردە 1,4 ترلن. تەڭگەنىڭ ءونىمى ءوندىرىلدى, بۇل 2016 جىلعى كورسەتكىشتەن 150 ملرد. تەڭگەگە ارتىق دەگەن ءسوز. ءبىز بۇل ناتيجەلەرگە مەملەكەتتىك قولداۋدىڭ جانە كاسىپكەرلەردىڭ بەلسەندىلىگىنىڭ ارقاسىندا قول جەتكىزدىك. كاسىپكەرلىكتىڭ دامۋىنا كەدەرگى كەلتىرەتىن توسقاۋىلدار, تەكسەرىستەر ازايدى. بيىل ەلباسىنىڭ تاپسىرماسىمەن «پرەزيدەنتتىڭ بەس الەۋمەتتىك باستاماسى» بويىنشا اۋىلعا بولىنەتىن شاعىن نەسيە كولەمى ەكى ەسە كوبەيدى. «باستاۋ» جوباسى بويىنشا بىلتىر بەس اۋداندا كاسىپكەرلىك نەگىزدەرىنە 938 ادام وقىتىلسا, بيىل 12 اۋدان مەن اقساي قالاسىندا وقىتۋ كوزدەلگەن. وسىنىڭ ءوزى كاسىپكەرلىكتى جاڭادان باستاعان اۋىل تۇرعىندارىنا ۇلكەن كومەك بولادى دەپ ويلايمىن. «بيزنەستىڭ جول كارتاسى» بويىنشا 830 جوبا مەملەكەتتىك قولداۋعا يە بولدى, - دەدى باتىس قازاقستان وبلىسىنىڭ اكىمى التاي كولگىنوۆ وڭىردەگى قالىپتاسقان احۋال تۋرالى.
وڭىردەگى بيزنەس باستامالاردى قولداۋ ماسەلەسىندە «اتامەكەن» وتە ۇلكەن جاردەم بەرىپ وتىر. وڭىردەگى كاسىپكەرلەر پالاتاسى ديرەكتورىنىڭ مىگندەتىن اتقارۋشى ساكەن كاريننىڭ ايتۋىنشا, كاسىپكەرلەر تاراپىنان جىل باسىنان بەرى بيزنەستى قورعاۋ تۋرالى 100-دەن اسا شاعىم تۇسكەن. ونىڭ باسىم بولىگى وڭىنان شەشىلگەن. بىلتىرعى جانە بيىلعى ءبىرىنشى توقساندى قوسا العاندا كاسىپكەرلەردىڭ 160 ملن تەڭگە كولەمىندە م ۇلىكتىڭ قۇقىعى قورعالعان.
– بەس جىل بۇرىن جۇمىستىڭ باسىم بەس باعىتى بەلگىلەندى. سونىڭ ءبىرى – كاسىپكەرلەردىڭ قۇقىعى مەن زاڭدى مۇددەلەرىن قورعاۋ. بۇل باعىتتا بىرقاتار جۇمىس اتقارىلدى. باس پروكۋراتۋرامەن كاسىپكەرلەردىڭ قۇقىعىن قورعاۋ باعىتىندا تۇراقتى نەگىزدە جۇمىس جاسالۋدا, كەڭەستەر قۇرىلدى. ءبىز زاڭدىلىقتاردىڭ ساقتالۋىن قاراپ قويماي, سۇراقتاردىڭ قايدان تۋىندايتىنىن زەرتتەپ, مەمورگانداردىڭ كاسىپكەرلىكتىڭ دامۋىنا كەرى ىقپال ەتۋ مۇمكىندىكتەرىن ازايتۋ ءۇشىن ءتيىستى زاڭنامالارعا وزگەرىستەر ەنگىزەمىز, - دەدى تيمۋر ق ۇلىباەۆ.
جيىندا وڭىرلىك كەڭەس مۇشەلەرى, «وتدەلستروي» جشس-نىڭ ديرەكتورى ۆالەنتينا ميحنو وڭىردە ينجەنەرلىك ينفراقۇرىلىم بويىنشا ەلەكتروندىق كارتا قۇرۋ, كاسىپكەر ۆالەري كرىلوۆ «بيزنەستىڭ جول كارتاسى-2020» باعدارلاماسى شەڭبەرىندە نەسيە پايىزدارىن سۋبسيديالاۋ, «شاعىن بيزنەس ورتالىعى» زاڭدى تۇلعالار بىرلەستىگىنىڭ ديرەكتورى شولپان جۇماتاەۆا استانا قالاسىنىڭ تاجىريبەسى نەگىزىندە كوشە ساۋداسىن ۇيىمداستىرۋ, «ح. قاپانوۆ اتىنداعى حالىقارالىق گيمنازيا» جشس-نىڭ ديرەكتورى حايدار قاپانوۆ جەكە بالاباقشالاردى جان باسىنا قاراي قارجىلاندىرۋ, «وتاۋالان» جشس-نىڭ ديرەكتورى ليانا تۇرسىنوۆا مەكتەپ جانىنداعى اسحانالاردا وقۋشىلارعا ىستىق تاماق ۇيىمداستىرۋ, «مەدتسەنتر» جشس-نىڭ ديرەكتورى رافحات يستاەۆ جەكە ەمحانانى مەملەكەتتىك قارجىلاندىرۋ ماسەلەلەرىنە بايلانىستى ساۋالدار قويىپ, ءتيىستى جاۋاپ الدى.
- ءبىز ۇلتتىق پالاتا قۇرىلعالى وتكەن بەس جىل بويى وڭىرلەردەگى كاسىپكەرلەر پالاتالارىمەن تۇراقتى جۇمىس ىستەپ كەلەمىز. مەملەكەتتىك قۇرىلىمدار جانە بيزنەس وكىلدەرىمەن بىرگە شاعىن جانە ورتا بيزنەستى دامىتۋ ماسەلەسىمەن الداعى جۇمىستاردى دا اقىلداسىپ وتىرامىز. بۇگىنگى جيىندا ورتاعا سالىنعان بارلىق ماسەلە ۇلتتىق پالاتانىڭ الداعى جيىنىندا كۇن تارتىبىنە الىناتىن بولادى. جەرگىلىكتى اكىمدىكتەر ءاردايىم بىزگە قولداۋ بىلدىرەدى, ارىپتەستىك تۋرالى كەلەسىمدەرىمىز بار. ەندەشە كاسىپكەرلىكتى قولداۋ جالعاسا بەرەدى, - دەدى تيمۋر ق ۇلىباەۆ قورىتىندى سوزىندە.
قازبەك قۇتتىمۇرات ۇلى, «ەگەمەن قازاقستان»
باتىس قازاقستان