ورالداعى نازارباەۆ زياتكەرلىك مەكتەبىندە سوڭعى قوڭىراۋ سالتاناتى ءوتتى

مەكتەپ ديرەكتورى تيمۋر نۇركەشوۆتىڭ ايتۋىنشا, مەكتەپتىڭ بيىلعى 85 تۇلەگىنىڭ 14-ءى الىس-جاقىن شەتەلدىك ۋنيۆەرسيتەتتەر گرانتىن يەلەنگەن. مىسالى, ءازيز تالاپوۆ ماسكەۋدە وتكەن «ارحيمەد» ونەرتابىستار مەن يننوۆاتسيالىق تەحنولوگيالار سالونىنا ەكى مارتە قاتىسىپ, جۇلدە اتانىپ, «ارحيمەد» مەدالىمەن ماراپاتتالعان. 8-سىنىپ وقۋشىلارى بەكبول بولاتوۆ مەن داستان تىنىشتىق قاراعاندى قالاسىندا وتكەن «روبولاند-2018» حالىقارالىق بايقاۋىنان 3-ورىن, ەلامير قادىرعاليەۆ الماتىدا وتكەن «ينفوماتريكس» حالىقارالىق سايىسىنان 2-ورىندى يەلەنىپتى. 11-سىنىپ وقۋشىسى دانيار ارىستانوۆ رەسپۋبليكالىق ءپان وليمپياداسىندا ورىس ءتىلى مەن ادەبيەتى بويىنشا 1-ورىن, 11-سىنىپ وقۋشىسى ۆارۆارا كاچالو قازاق ءتىلى ءپانى بويىنشا رەسپۋبليكالىق «جارقىن بولاشاق» وليمپياداسىنان 3-ورىن, زارينا ابدۋلليەۆا رەسپۋبليكالىق «ناۋرىز كەزدەسۋلەرى-2018» عىلىمي جوبالار سايىسىنان 3-ورىن العان.

- بيىل نازارباەۆ زياتكەرلىك مەكتەپتەرىنىڭ قۇرىلعانىنا - 10 جىل. ياعني, 10 جىل بۇرىن استانادا جاڭاشىل فورماتتا ءبىلىم بەرەتىن مەكتەپ ءوز جۇمىسىن باستادى. ەلباسى بۇنىمەن توقتاماي, ەلىمىزدىڭ بارلىق وڭىرىندە وسىنداي ءبىلىم ورداسىن اشۋدى قولعا الدى. ناتيجەسىندە 2012 جىلى ورال قالاسىندا دا ءزاۋلىم مەكتەپ ەسىگىن اشتى. سىزدەر - ەڭ باقىتتى ۇرپاقسىزدار. قازىر نازارباەۆ مەكتەپتەرىنىڭ تاجىريبەسىن وزگە دە مەكتەپتەرگە قولدانىپ جاتىرمىز. اسىرەسە, اۋىلدىق مەكتەپتەرگە اسا كوڭىل بولۋدەمىز. ويتكەنى دالا مەن قالانىڭ الشاقتىعىن ازايتۋىمىز قاجەت. «رۋحاني جاڭعىرۋدا» تابىستى ءبولۋدىڭ ەڭ باستى كىلتى ءبىلىم ەكەنى ايتىلادى. بۇل ءۇشىن ەلىمىزدە بارلىق جاعداي جاسالۋدا. سىزدەر سول ءۇمىتتى اقتاپ, الدارىڭىزعا بيىك مەجە قويا بىلىڭىزدەر. ءبىلىم جولىندا قاناتتارىڭىز تالماسىن. اق جول! - دەدى سوڭعى قوڭىراۋ سالتاناتىنا ارنايى قاتىسقان باتىس قازاقستان وبلىسى اكىمى التاي كولگىنوۆ.

بۇگىنگى شارا اياسىندا وسى وقۋ جىلىندا مەكتەپتىڭ «ۇزدىك وقۋشىسى» اتانعان رەسپۋبليكالىق «Nurintech» يننوۆاتسيالىق جوبالار بايقاۋىنىڭ, حالىقارالىق «ارحيمەد» ونەرتابىستار مەن يننوۆاتسيالىق تەحنولوگيالار سالونىنىڭ جۇلدەگەرى 11-سىنىپ وقۋشىسى ءازيز تالاپوۆقا ارنايى سەرتيفيكات پەن سىيلىق تابىستالدى. سونداي-اق «جىلدىڭ ۇزدىك شاڭىراعى», «ۇزدىك وقىرمان», «ۇزدىك ۋيكيپەدياشى», «ۇزدىك TEDx سپيكەرى» ماراپاتتالدى. ۇزدىك وقۋشىلارعا «تۋعان ەلگە تاعزىم» ولكەتانۋ-زەرتتەۋ ەكسپەديتسياسىنىڭ جولداماسىمەن شىمكەنت قالاسىنا جولداما بەرىلدى.

- «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ ونجىلدىعى قارساڭىندا «قولدايىق اۋىل مەكتەبىن» اكتسياسى وتەدى. ەلىمىزدەگى 20 زياتكەرلىك مەكتەپ ءوز وڭىرىندەگى ءبىر اۋىلدىق مەكتەپكە ماتەريالدىق جانە ادىستەمەلىك كومەك كورسەتەدى. ءبىز 28 مامىر كۇنى ءبورلى اۋدانىنداعى كەڭتۇبەك اۋىلدىق ورتا مەكتەبىنە بارىپ, نازارباەۆ زياتكەرلىك مەكتەبى جۇيەسىنىڭ وزىق وقۋ باعدارلاماسىمەن تانىستىرامىز, ناقتى ارىپتەستىك قولداۋ-كومەك كورسەتەمىز, - دەيدى مەكتەپتىڭ ءباسپاسوز حاتشىسى اقمونشاق جۇماەۆ.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان

سۋرەتتى تۇسىرگەن تەمىربولات توقمامبەتوۆ