«استانا وپەرا» مەملەكەتتىك وپەرا جانە بالەت تەاترىنىڭ كامەرالىق زالىندا كسرو حالىق ءارتىسى, قازاق كسر مەملەكەتتىك سىيلىعىنىڭ لاۋرەاتى, كومپوزيتور قۇددىس قوجامياروۆتىڭ 100 جىلدىق مەرەيتويىنا ارنالعان «ۇيعىر مۇقامىنىڭ سارىنى» اتتى ەسكە الۋ كەشى ءوتتى. سالتاناتتى كەشتە قۇددىس قوجامياروۆتىڭ ءتول تۋىندىلارىمەن قاتار, ونەر يەسىنىڭ شاكىرتتەرى – بەلگىلى كومپوزيتورلار: بالنۇر قىدىربەك, حابيبۋللا سەتەكوۆ, سەرىكجان ءابدىنۇروۆ شىعارمالارى ورىندالدى.
ەلىمىزگە بەلگىلى سازگەر, پەداگوگ, قوعام قايراتكەرى, كاسىبي ۇيعىر مۋزىكاسىنىڭ نەگىزىن قالاۋشى – قۇددىس قوجاميار ۇلىنىڭ قازاق ونەرى مەن مادەنيەتىنىڭ وركەندەپ, دامۋىنا قوسقان ۇلەسى زور. شىعارماشىلىعىن قازاق راديوسىنىڭ كوركەمدىك جەتەكشىسى, قۇرمانعازى اتىنداعى الماتى كونسەرۆاتورياسىنىڭ رەكتورى ءارى پروفەسسورى, كومپوزيتورلار وداعىنىڭ توراعاسى سىندى جاۋاپتى قىزمەتتەرمەن قاتار ورگەن قايراتكەر تۇلعانىڭ وتاندىق مۋزىكانتتاردىڭ ءبىرتۇتاس ءداۋىرىن تاربيەلەپ شىققان ۇستازدىق جولى دا وزىندىك ۇلاعاتىمەن تاعىلىمدى.
– تاۋلار الىستاعان سايىن بيىكتەيدى. وسى ءبىر ۇلاعاتتى ءسوز ءبىزدىڭ ۇلى ۇستازىمىز – قۇددىس قوجاميار ۇلىنا قاراتىلىپ ايتىلعانداي. ارينە ءوزىڭنىڭ سۇيىكتى پروفەسسورىڭدى, ۇستازىڭدى كۇندە كورىپ, ءسات سايىن تىلدەسىپ جۇرگەندە قادىرىن دە, باعاسىن دا ءوز دەڭگەيىندە تۇسىنبەۋىڭ مۇمكىن. پەداگوگتىك قىزمەتتە دە, شىعارماشىلىق پەن باسشىلىق جۇمىستاردا دا ۇلكەن قايراتكەرلىك, تۇلعالىق مىنەز تانىتىپ, قازاق ونەرى مەن مادەنيەتى ءۇشىن قانشالىقتى قىرۋار جۇمىس اتقارىپ كەتكەنىن ەندى ءتۇسىنىپ جاتقاندايمىز. ول كىسى ءبىزدىڭ بويىمىزعا شەبەر مۋزىكانت بولۋمەن قاتار, جاقسى ادام بولۋ تاعىلىمىن دا قوسا ءسىڭىردى. ءالى وڭ-سولىمىزدى تانىماعان, دانالىعىنان شالالىعى باسىم ءبىر-ءبىر ءۇيدىڭ تەنتەگىن تاربيەلەپ, ونەرگە عاشىق ەتە ءبىلدى. سول مەيىرىمىنىڭ, ۇستازدىق ۇلاعاتىنىڭ ارقاسىندا ءبىز مۋزىكانى ءپىر تۇتىپ ەسەيدىك, جەتىلدىك. بۇگىندە جاساعان ءار جۇمىسىمىز بەن جەتكەن جەتىستىگىمىز كەزىندە بالاسىنباي, بىزگە ۇلكەن سەنىم ارتا بىلگەن ۇستازىمىزدىڭ, سۇيىكتى پروفەسسورىمىزدىڭ ارقاسى دەپ بىلەمىن. قۇددىس قوجاميار ۇلى شاكىرت تاربيەلەپ, ءوزىنىڭ ەسىمىن مۋزىكا الەمىندە وشپەستەي ەتىپ قاشاپ كەتتى. ءالى دە جىلدارعا جىلدار جالعاسىپ, تالاي عاسىر العا جىلجىر. بىراق ولمەيتىن ونەر مەن ەسىمىن وشىرمەيتىن شاكىرتتەرى باردا ۇستازىمىزدىڭ قايراتكەرلىك جولى ماڭگىلىك جاساي بەرەتىنىنە سەنەمىن», – دەپ قازاقستان كومپوزيتورلار وداعىنىڭ ءتورايىمى, قۇددىس قوجامياروۆتىڭ شاكىرتى, بەلگىلى كومپوزيتور بالنۇر قىدىربەك ۇستازعا دەگەن ساعىنىشقا تولى لەبىزىن تولقىپ تۇرىپ جەتكىزدى.
ونەر يەسىنىڭ ءتول شاكىرتتەرى مەن قازاق مۋزىكا ونەرىنىڭ تالانتتى تۇلعالارى قاتىسقان ەسكە الۋ كەشىندە العاش رەت قۇددىس قوجامياروۆتىڭ تۋىندىلارى – ىشەكتى اسپاپتار وركەسترىنە ارنالعان مۋزىكا مي مينور, ۆيولونچەلگە ارنالعان كونتسەرت (جارىق كورمەگەن شىعارمالار), «بۋ احشام» ءانى (ب.قىدىربەكتىڭ وڭدەۋى), «نازۋگۋم» وپەراسىنان نازۋگۋم ارياسى (كامەرالىق وركەسترگە ارنالعان ح.سەتەكوۆتىڭ وڭدەۋى) ورىندالدى. سونداي-اق ب.قىدىربەكتىڭ «قالقامان-مامىر» وپەراسىنان قالقامان ارياسى, ح.سەتەكوۆتىڭ «سكەرتسو» گوبوي مەن وركەسترگە ارنالعان كونتسەرتىنىڭ ءبىرىنشى ءبولىمى, س.ءابدىنۇروۆتىڭ «بايدىبەك» سىندى تۋىندىلارى تىڭدارمان نازارىنا ۇسىنىلدى. مەرەيتويلىق كونتسەرتتە وپەرا ترۋپپاسىنىڭ ءسوليسى, قازاقستاننىڭ ەڭبەك سىڭىرگەن قايراتكەرى بيبىگۇل جانۇزاق (سوپرانو), سيمفونيالىق وركەستر مۋزىكانتتارى – حالىقارالىق بايقاۋلاردىڭ لاۋرەاتتارى كۋرۆانجان احاتوۆ (ۆيولونچەل), داميليا ماحپيروۆا (گوبوي) جانە تاعى دا باسقا تالانتتى ونەرپازدار ءان مەن جىردان شاشۋ شاشتى. حالىقارالىق بايقاۋلاردىڭ لاۋرەاتى رۋسلان ءبايمۋرزيننىڭ جەتەكشىلىگىمەن «استانا وپەرا» كامەرالىق وركەسترىنىڭ سۇيەمەلدەۋىندە شىرقالعان قازاق پەن ۇيعىر مۋزىكا جاۋھارلارىنان قۇرالعان ۇزدىك كونتسەرت كورەرمەن كوڭىلىن اۋەزدى ءاننىڭ بەسىگىندە تەربەدى.
نازەركە جۇماباي, «ەگەمەن قازاقستان»