قازاقستاننىڭ سىرتقى ىستەر ءمينيسترى قايرات ءابدىراحمانوۆ پاراگۆاي رەسپۋبليكاسىنىڭ سىرتقى ىستەر ۆيتسە-ءمينيسترى فەدەريكو البەرتو گونسالەستى قابىلدادى. ول استاناعا تەڭىزگە شىعا المايتىن دامۋشى ەلدەردىڭ كولىك جانە ساۋدا ماسەلەلەرىنە ارنالعان مينيسترلەر كەزدەسۋىنە قاتىسۋ ءۇشىن ارنايى كەلدى, دەپ حابارلايدى سىرتقى ىستەر مينيسترلىگىنىڭ ءباسپاسوز قىزمەتى.
ءوزارا دوستىق قارىم-قاتىناس جاعدايىندا وتكەن كەزدەسۋ بارىسىندا ەكى ەلدىڭ تەڭىزگە شىعاتىن جولىنىڭ جوقتىعىنا بايلانىستى تاپ بولىپ جاتاتىن وزەكتى دەگەن ماسەلەلەرى ءسوز بولدى. تاراپتار سيريا, سولتۇستىك كورەيا, تاياۋ شىعىس سياقتى ايماقتارداعى ماسەلەلەردى قوسا العاندا حالىقارالىق دەڭگەيدەگى قاۋىپسىزدىك ماسەلەسى بويىنشا دا پىكىر الماستى.
پاراگۆايدىڭ سىرتقى ىستەر ۆيتسە-ءمينيسترى ف.گونسالەس قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە كوتەرگەن باستامالارىنا, سونداي-اق سيريا بويىنشا استانا پروتسەسىنىڭ جۇمىسىنا جوعارى باعا بەردى. ق.ءابدىراحمانوۆ ەكسپو-2017 تۇسىندا استانادا وتكەن قازاقستان-پاراگۆاي سىرتقى ىستەر مينيسترلىكتەرىنىڭ كونسۋلتاتسيالارى ساياسي, ەكونوميكالىق جانە گۋمانيتارلىق باعىتتار بويىنشا ەكىجاقتى بايلانىستاردى نىعايتىپ, ونى ودان ءارى كەڭەيتە تۇسۋگە جاقسى جول سالعاندىعىن اتاپ ءوتتى.
تاراپتار ۆيزالىق رەجيمدى ليبەراليزاتسيالاۋ, ءبىلىم سالاسى مەن وزگە دە بىرقاتار ماسەلەلەردى قوسا العاندا ەكىجاقتى ساياسي كونسۋلتاتسيالار تەتىگىن دامىتۋ جۇمىستارىن جالعاستىرىپ, ىنتىماقتاستىقتىڭ كەلىسىم-قۇقىقتىق بازاسىن كەڭەيتۋ سياقتى ماسەلەلەر بويىنشا ءوزارا كەلىسىمگە كەلدى. قازاقستاننىڭ سىرتقى ىستەر ۆەدومستۆوسىنىڭ باسشىسى پاراگۆايمەن ارادا قالىپتاسقان ءپوزيتيۆتى ديالوگ ساۋدا-ەكونوميكالىق بايلانىستاردى كەڭەيتۋگە يگى ىقپال ەتەتىندىگىنە سەنىم ءبىلدىرىپ, پاراگۆاي كاسىپكەرلەرىن وزدەرىنىڭ بيزنەستەرىن قازاقستاندا دامىتۋ مۇمكىندىكتەرىن جان-جاقتى زەردەلەۋ ءۇشىن ەلگە كەلۋگە شاقىردى.
ق.ءابدىراحمانوۆ ءىرى ەكونوميكالىق بلوكتار اراسىنداعى قارىم-قاتىناستى دامىتۋدىڭ ماڭىزدى ەكەنىن ايتىپ, ەۋرازيالىق ەكونوميكالىق وداق نارىعىنىڭ كاريكوم, مەركوسۋر, اند قوعامداستىعى مەن لاتىنامەريكالىق ەكونوميكا جۇيەسىن قوسا العاندا لاتىن امەريكاسى مەن كاريب باسسەينى مەملەكەتتەرى مەن ۇيىمدارى ءۇشىن الەۋەتىنىڭ زور ەكەندىگىن اتاپ ءوتتى.