«نۇر وتان» پارتياسى الماتى قالالىق فيليالىنىڭ ءباسپاسوز ورتالىعىندا بىرىڭعاي ۇلتتىق تەست تاپسىرۋدىڭ بارىسى تۋرالى بريفينگ ءوتتى.
ۇلتتىق بىرىڭعاي تەست تاپسىرۋدىڭ جاي-جاپسارى تۋرالى الماتى قالاسى ءبىلىم باسقارماسىنىڭ باسشىسى گ.م.حودجابەرگەنوۆا باياندادى. ءبىلىم باسقارماسى باسشىسىنىڭ ايتۋىنشا, ۇبت تاپسىرۋ ەرەجەلەرىندە ايتارلىقتاي وزگەرىستەر جوق. بيىلعى جىلى الماتى مەكتەپتەرىن 9 153 تۇلەك بىتىرەتىن بولسا, ولاردىڭ 81 پايىزى ۇبت تاپسىرۋعا ءوتىنىش بىلدىرگەن, ياعني تەستىلەۋدەن وتەتىن تۇلەكتەر سانى – 7300. ال ەڭ تومەنگى شەكتىك بالل – 50. ۇبت تاپسىرۋ سەرتيفيكاتتارىن العان تۇلەكتەر ادەتتەگىدەي ەلىمىزدەگى جوعارى وقۋ ورىندارىنا وقۋعا تۇسە الادى. ال قالعان تۇلەكتەر ەلىمىزدەگى كوللەدجدەر مەن شەتەلدەردە ءوز ەركىمەن ءبىلىم الۋعا مۇمكىندىكتەرى بار. ۇبت تاپسىرۋ مەرزىمى مامىر ايىنىڭ 29-ى مەن 9 ماۋسىم ارالىعىنا قاراستىرىلىپ وتىر.
ورتا مەكتەپ تۇلەكتەرى مەكتەپ ءبىتىرۋ ەمتيحاندارىن دا, ۇلتتىق بىرىڭعاي تەستىلەۋدى دە بەس ءپان بويىنشا تاپسىرادى. وتكەن جىلداردا تۇلەكتەر ۇبت-نى قازاق, ورىس تىلدەرىندە تاپسىرعان بولسا, بيىلعى جىلى الماتى قالاسى بويىنشا اعىلشىن تىلىندە تاپسىرۋعا 46 تۇلەك ءوتىنىش بىلدىرگەن.
ءبىلىم باسقارماسىنىڭ باسشىسى وتكەن جىلى التىن بەلگى يەگەلەرى ءۇشىن مەملەكەتتىك گرانتتى ءبولۋ كەزىندە ورىن العان ولقىلىقتاردىڭ الدىن الۋ ماقساتىندا ۇبت تاپسىرۋ ەرەجەسىنە وزگەرىستەر ەنگىزىلگەندىگىن ەسكەرتتى. ەگەر التىن بەلگى يەگەرلەرىنىڭ تەست تاپسىرۋ قورىتىندىسى باسقا تۇلەكتەرمەن تەڭ ءتۇسىپ جاتقان جاعدايدا, گرانت التىن بەلگى يەگەرىنىڭ ەنشىسىنە تيەدى, ال كەرىسىنشە جاعداي ورىن العاندا, گرانت قاتارداعى تالاپكەرگە بەرىلەدى.
ۇبت قابىلداۋ پۋنكتتەرى جىلداعىداي الماتى قالاسىنداعى سەگىز جوعارى وقۋ ورنىنا بەكىتىلگەن. ناقتى ايتقاندا, الاتاۋ اۋدانىنىڭ مەكتەپتەرى – حالىقارالىق ءبىلىم بەرۋ كورپوراتسياسىندا, المالى اۋدانى – الماتى تەحنولوگيالىق ۋنيۆەرسيتەتىندە, اۋەزوۆ اۋدانى – قازۇاۋ, بوستاندىق اۋدانى – ءال-فارابي اتىنداعى قازۇۋ, جەتىسۋ اۋدانى – حالىقارالىق بيزنەس ۋنيۆەرسيتەتىندە, مەدەۋ اۋدانى – اباي اتىنداعى قازۇپۋ, ناۋرىزباي اۋدانى – قازاق مەملەكەتتىك قىزدار پەداگوگيكالىق ۋنيۆەرسيتەتىندە, تۇركسىب اۋدانىنىڭ مەكتەپتەرى نارحوزدا تاپسىراتىن بولادى. ۇبت قابىلداۋ پۋنكتتەرى تەست تاپسىرۋ قاۋىپسىزدىگىن قامتاماسىز ەتۋ ماقساتىندا ارنايى قۇرال-جابدىقتارمەن قامتاماسىز ەتىلگەن.
ەلۆيرا سەرىكقىزى, «ەگەمەن قازاقستان»