ايماق باسشىسىنىڭ وكىمىمەن ارمان سارباي ۇلى ورازعۇلوۆ يندۋستريالىق-يننوۆاتسيالىق دامۋ باسقارماسىنىڭ باسشىسى بولىپ بەكىتىلدى.
ا.ورازعۇلوۆ 1986 جىلى باتىس قازاقستان وبلىسىندا تۋعان. ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىن, قر پرەزيدەنتى جانىنداعى مەملەكەتتىك قىزمەت اكادەمياسىن كەدەن ءىسى سالاسىنداعى مامان, زاڭگەر, مەملەكەتتىك جانە جەرگىلىكتى باسقارۋ ماگيسترى ماماندىقتارى بويىنشا تامامداعان.
ەڭبەك جولىن 2006 جىلى استانا قالاسىندا جەكەمەنشىك ۇيىمداردا كەدەن دەكلارانتى بولىپ باستاعان. 2008-2009 جىلدارى يندۋستريا جانە ساۋدا مينيسترلىگى ساۋدا ساياساتىن دامىتۋ دەپارتامەنتى ىشكى ساۋدا ساياساتىن رەتتەۋ باسقارماسىنىڭ ساراپشىسى بولعان. 2009-2014 جىلدارى يندۋستريا جانە ساۋدا مينيسترلىگى سىرتقى ساۋدا ساياساتى دەپارتامەنتى سىرتقى ساۋدا كەلىسسوزدەرى باسقارماسىنىڭ ساراپشىسى, باس ساراپشىسى قىزمەتتەرىن اتقارعان.
2014-2017 جىلدارى ەكونوميكا جانە بيۋدجەتتىك جوسپارلاۋ مينيسترلىگى سىرتقى ساۋدا ساياساتى دەپارتامەنتىنىڭ باسقارماسىنا جەتەكشىلىك ەتكەن.
وسى كەزگە دەيىن «New Texnolody» جارىق تەحنولوگيالىق جارىقتاندىرۋ جشس-ءنىڭ ديرەكتورى بولعان.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى