كەشە ساعات 19.00-24.00 ارالىعىندا اقتوبە وبلىسىنىڭ مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن وبلىستىق تاريحي-ولكەتانۋ, وبلىستىق ونەر, كەڭەس وداعىنىڭ باتىرى ءا.مولداعۇلوۆانىڭ مەموريالدى مۋزەيلەرىنىڭ ۇيىمداستىرۋىمەن «رۋحاني جاڭعىرۋ» باعدارلاماسى اياسىندا 18 مامىر – حالىقارالىق مۋزەيلەر كۇنىنە وراي «مۋزەيدەگى ءتۇن - 2018» اكتسياسى وتكىزىلدى.
بيىلعى «مۋزەيدەگى ءتۇن - 2018» اكتسياسى وبلىس اكىمى ب.ساپارباەۆتىڭ «باقىتتى بالا» جوباسىن قولداۋ ماقساتىندا جۇزەگە اسىرىلعان.
«مۋزەيدەگى ءتۇن - 2018» اكتسياسى مەرەكەلىك شاراعا ساي جابدىقتالعان وبلىستىق ونەر مۋزەيى عيماراتىندا جانە سىرتقى الاڭىندا وتكىزىلىپ, قالا تۇرعىندارى مەن قوناقتارىن مۋزەيلىك قۇندىلىقتارمەن تانىستىرۋ, كوپشىلىكتىڭ مۋزەي جۇمىسىنا دەگەن قىزىعۋشىلىقتارىن ارتتىرۋ ماقساتىن كوزدەدى.
وبلىستىق تاريحي-ولكەتانۋ مۋزەيى «شەبەردىڭ قولى ورتاق» وبلىس قولونەر شەبەرلەرىنىڭ بۇيىمدارىنان ساتىلىم كورمەسىن, «جادىگەر جەردە قالماسىن» اكتسياسى بارىسىندا قالا جانە وبلىس تۇرعىندارى تاپسىرعان جادىگەرلەردىڭ, قالالىق تەحنيكالىق شىعارماشىلىق ورتالىعىنىڭ بالالارى دايىنداعان عارىش, ۇشاق جانە كەمە ماكەتتەرىنىڭ كورمەلەرىن ۇسىنىلدى جانە «جۇلدىزدى بالا» شوۋ-باعدارلاماسىندا تالانتتى بالالاردىڭ ونەرلەرى كورسەتىلدى.
«قازاقستاننىڭ جاس ديزاينەرى» اتانعان ايانا مۇراتوۆانىڭ كيىم ۇلگىلەرىنەن بالالار دەفيلەسى, «تابيعات الەمىنە ساياحات» تاقىرىبىندا تانىمدىق ويىندار ۇيىمداستىرىلعان بۇل كەشتە –قازاق ەرتەگىلەرى مەن زاماناۋي مۋلتفيلمدەردىڭ كەيىپكەرلەرى دە ورتادان تابىلدى. كەلۋشىلەر ويىن-ساۋىق ورتالىعى ارقىلى قازاقتىڭ ۇلتتىق ويىندارىنا (اسىق, ارقان تارتىس ت.ب.) قاتىسىپ, قالالىق جاس تۋريستەر ستانساسىنىڭ كورمەسىن تاماشالاي الادى. سونىمەن قاتار, «اشىق اسپان استىنداعى وبسەرۆاتوريا» تەلەسكوپى ارقىلى جۇلدىزدار مەن اسپان دەنەلەرىن باقىلاپ, عارىش كەڭىستىگىن باقىلاپ, استرونوميا بويىنشا عىلىمي-تانىمدىق كىتاپتار كورمەسىن جانە كوسموناۆتيكا جونىندە بەينەفيلمدەردى دە كورە الدى.
وبلىستىق ونەر مۋزەيى ينتەراكتيۆتى كورمە, سكوچتان جاسالعان مۇسىندەر ينستاللياتسياسىن, جاندى داۋىستاعى اندەر, ۇلكەن فورماتتاعى بەينەلەۋ ونەرى شەبەر-كلاسىن, ء«بارىمىز سۋرەت سالامىز...» اكتسياسىن, مۋزەي الاڭىندا اقتوبە وبلىسىنا تانىمال شەبەرلەردىڭ كورمە-جارمەڭكەسىن جانە فوتوايماق ۇيىمداستىردى.
كەڭەس وداعىنىڭ باتىرى ءا.مولداعۇلوۆانىڭ وبلىستىق مەموريالدىق مۋزەيى «الەمدى بەينەلە» بالالار اراسىندا سۋرەت سالۋ بايقاۋى, «سوعىس جاڭعىرىعى» ۇلى وتان سوعىسى جىلدارىنداعى ارتەفاكتاردان كورمەسى, «دالالىق پوچتا», «جاۋىنگەرلىك كۋحنيا» جانە «سوعىس تاريحىنداعى ساندار» ينستاللياتسيالارى وزدىرىلىپ, كاراوكە ارقىلى «اسكەري پاتريوتتىق اندەر», ء«اليا. مانشۇك. حيۋاز» قاھارمان قىزدارى تۋرالى كينولەنتا كورسەتىلدى. ءارى فوتوسەسسيا جاساپ, ۇيىمداستىرۋشىلار كەلۋشىلەرگە ۇمىتىلماستاي مادەني كەش سىيلادى.
تەمىر قۇسايىن,
«ەگەمەن قازاقستان»
اقتوبە