بۇل تۋرالى اقتاۋ قالاسىنداعى نازارباەۆ زياتكەرلىك مەكتەبىندە «پەداگوگ تاجىريبەسىندەگى زەرتتەۋشىلىك ارەكەت: سۇراقتار مەن شەشۋ جولدارى» تاقىرىبىندا وتكەن وبلىستىق كونفەرەنتسيادا ايتىلدى.
ءىس-ارەكەتتى زەرتتەۋ (Action Research) جانە ساباقتى زەرتتەۋ (Lesson Study) شەڭبەرىندە ەكىنشى رەت ۇيىمداستىرىلعان كونفەرەنتسياعا 100-دەن اسا مۇعالىم قاتىسىپ, ءىس-تاجىريبە الماستى.
كونفەرەنتسيانىڭ باستى ماقساتى – مۇعالىمدەردىڭ ساباقتى زەرتتەۋىنە قاتىستى پىكىر الماسۋ الاڭىن قۇرۋ, ءوز تاجىريبەسىندە زەرتتەۋ جۇرگىزىپ جۇرگەن ۇستازدارعا ارى قاراي دامۋ ءۇشىن جاعداي جاساۋ. وزەكتىلىگى كۇن ساناپ ارتىپ كەلە جاتقان كونفەرەنتسياعا بىلتىر 80 مۇعالىم قاتىسسا, بيىل 100-دەن اسا مۇعالىم قاتىسۋعا قىزىعۋشىلىق ءبىلدىردى, دەيدى مەكتەپ ديرەكتورىنىڭ عىلىمي-ادىستەمەلىك ىستەرى جونىندەگى ورىنباسارى باقىتگۇل جاقسىلىقوۆا.
ولكە مۇعالىمدەرىنىڭ باسىن قوسقان جيىندا مەكتەپ ديرەكتورى ەرمەك پايزوۆ, ءىس ارەكەتتى زەرتتەۋ تاجىريبەسى زياتكەرلىك مەكتەپ مۇعالىمدەرىنىڭ تاجىريبەسىن شىڭداۋعا وڭ ىقپالىن تيگىزىپ جاتقانىن اتاپ ءوتتى. ونىڭ ايتۋىنشا, ساباقتى زەرتتەۋمەن اينالىسقان ۇستازدار سانى كۇن ساناپ ارتىپ كەلەدى.
2016 جىلى مەكتەبىمىزدەگى ماتەماتيكا ءپانى مۇعالىمى دۋبليندەگى «European Conference on Educational Research” دۇنيەجۇزىلىك كونفەرەنتسياسىنا قاتىسىپ, ءوز تاجىريبەسىمەن بولىسسە, 2017 جىلى بۇل كونفەرەنتسياعا دانياعا بارىپ, مەكتەبىمىزدەن 3 مۇعالىم قاتىسىپ كەلدى. ال بيىل, بۇل جيىنعا قاتىسۋعا مەكتەبىمىزدەن 18 زەرتتەۋ جۇمىسى جىبەرىلىپ, سونىڭ 7-ەۋى ىرىكتەۋدەن ءوتىپ, شاقىرتۋ الدى, دەدى ەرمەك پايزوۆ.
ونىڭ سوزىنشە, شاقىرتۋ العان مۇعالىمدەر 2018 جىلدىڭ قىركۇيەگىندە يتالياداعى بولزانو قالاسىنا بارىپ, دۇنيە ءجۇزىنىڭ تۇكپىر-تۇكپىرىنەن جينالعان پەداگوگتارمەن تاجىريبە الماسادى, ءوز زەرتتەۋلەرىمەن بولىسەدى.
مەكتەپ ديرەكتورى مۇنداي كونفەرەنتسياعا باسقا دا مەكتەپتەردەن مۇعالىمدەردىڭ قاتىستىرۋ ماقساتىندا ۇيىمداستىرىلىپ جاتقاندىعىن ەرەكشە ايتىپ ءوتتى.
كونفەرەنتسيا «وقۋ جانە وقىتۋ», «سارالاپ وقىتۋ جانە باعالاۋ», «مۇعالىمنىڭ كوشباسشىلىعى جانە زەرتتەۋشىلىك» سەكتسيالارىنان تۇردى. وبلىستاعى جالپى ءبىلىم بەرۋ مەكتەپتەرىنەن جينالعان ۇستازدار دا ءوز تاجىريبەلەرىمەن ءبولىسىپ, ۇسىنىستار ايتىلدى. ايتا كەتۋ كەرەك, اقتاۋداعى پەداگوگيكالىق شەبەرلىك ورتالىعىنىڭ تاجىريبەلى ترەنەرلەرى ۇستازدار الدىندا وزەكتى تاقىرىپتى قوزعاپ, كوپ كومەك بەردى.
- 2014 جىلى دەڭگەيلىك كۋرستان وتكەن بولاتىنمىن. سول ۋاقىتتان بەرى ساباقتى زەرتتەۋ ۇردىسىنە قاتىسىپ ءجۇرمىن. ساباقتى جانە بالانىڭ ءىس-ارەكەتىن زەرتتەۋ جاقسى ناتيجە بەرپدى دەپ ايتا الامىن. ويتكەنى, ءوزىم ساباق بەرەتىن سىنىپتارداعى بالالاردىڭ دەڭگەيىن, ولاردىڭ دامۋ باعىتتارى انىقتالىپ, جاقسى ناتيجە كورسەتتى. زەرتتەۋىمدى ءالى دە جالعاستىرامىن, سەبەبى بۇل – بالا مەن مۇعالىم ەڭبەگىنىڭ كورىنىسى, دەيدى بەينەۋ گيمنازياسىنداعى حيميا-بيولوگيا ءپانى مۇعالىمى ايگۇل قيلىباەۆا.
كونفەرەنتسياعا سوڭىندا قاتىسۋشىلارعا سەرتيفيكاتتار تابىستالدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى