تاران اۋدانىندا «دينامو» دەنەشىنىقتىرۋ-سپورت قوعامىنىڭ قولداۋىمەن وتكەن كوكپارعا 150 كوكپارشى قاتىستى. وبلىستىق ىشكى ىستەر دەپارتامەنتىنىڭ كومانداسىنداعى جىگىتتەر ەپتى دە مىقتى كوكپارشى ەكەنىن كورسەتىپ, ءبىرىنشى ورىندى جەڭىپ الدى.
كوماندا كاپيتانى, دەپارتامەنت قىزمەتكەرى باقداۋلەت اسانوۆقا اۋدارىسپاقتا قارسىلاس شاق كەلمەدى, ول ءبىرىنشى ورىندى الدى.
ات سپورتى ويىندارى, اسىرەسە, كوكپار سوڭعى جىلدارى قوستاناي وڭىرىندە كەڭ تاراپ كەلەدى. پوليتسەي باقداۋلەت اسانوۆتىڭ ايتۋىنشا, وبلىستىق ىشكى ىستەر دەپارتامەنتىنىڭ باسشىلىعى ۇلتتىق ات سپورتى ويىندارىن دامىتۋعا ەرەكشە كوڭىل بولەدى. ەكى جىلدان بەرى پوليتسەيلەر كومانداسى كوكپاردان ۇزبەي جاتتىعۋلار وتكىزەدى.
«كوكپار مەن اۋدارىسپاق ويىندارى جىگىتتىڭ بويىندا ەپتىلىك پەن مىقتىلىقتى قالىپتاستىرادى. كومانداداعى پوليتسەيلەردىڭ ءبارى ات سپورتىمەن بالا كەزدەن اينالىسقان جىگىتتەر. كوكپار ءبىزدىڭ قانىمىزعا سىڭگەن, اتالارىمىز اتتىڭ قۇلاعىندا ويناعان عوي», دەيدى باقداۋلەت.
ال سپورت, ونىڭ ىشىندە كوكپار قازاق حالقىنىڭ, ورتا ازيا حالىقتارىنىڭ ەڭ سۇيىكتى ۇلتتىق ويىنى بولىپ سانالعان. ەلىن, جەرىن جاۋدان قورعاعان باتىرلارىمىزدىڭ بارلىعى دا وسى كوكپار مەن اۋدارىسپاقتا شىنىققان. ال ەلدىڭ تىنىشتىعىن قورعايتىن پوليتسەيلەر ات سپورتى ناعىز شىنىعۋ ەكەنىن ايتادى.
ءنازيرا جارىمبەت, «ەگەمەن قازاقستان»