اۋدان ورتالىعى باياناۋىل مەن مايقايىڭ كەنتىنىڭ اراسى 85 شاقىرىم. كەنتتەن تاڭعى ساعات 5 تە جاياۋ جۇگىرىپ شىققان ولجاس كاكىمجانوۆ باياناۋىلعا كەشكى ساعات 4 تە جەتتى.
جۇگىرۋ بارىسىندا ءتورت رەت قانا ايالداپتى. ارىپتەسى دانيار ءتاشىموۆ كولىكپەن سوڭىنان ىلەسىپ, ءجۇرىپ وتىرعان. تورايعىر اۋىلىنىڭ بۇرىلىسىنان شاكىرتى باقتيار ءتاشىموۆ ۇستازىنىڭ قاتارىنا قوسىلادى. اۋدان ورتالىعىندا ولجاستى اۋدان اكىمدىگىنىڭ ءبولىم قىزمەتكەرلەرى, جاستار قارسى الدى. ولجاس جەڭىل اتلەتيكاعا بالا كەزىنەن باستاپ قىزىققان ەكەن. اسكەر قاتارىندا ءجۇرىپ تە جىلدامدىققا جۇگىرۋدەن جاقسى نəتيجە كورسەتىپتى. قازىر مايقايىڭ كەنتىندەگى ورتا مەكتەپتكە دەنەشىنىقتىرۋ پانىنەن ساباق بەرەدى. جاس مامان سپورتتىڭ ءار تۇرىنە وقۋشىلارىن ۇيرەتىپ ءجۇر.
اۋداندىق سپورت ءبولىمىنىڭ حابارىنشا, ولجاس اۋداندا وتكىزىلەتىن سپورتتىق جارىستارعا ءجيى قاتىسادى. اقپان ايىندا مايقايىڭ كەنتىندە اۋداننىڭ اۋىلدىق اۋماقتارى اراسىندا سپورتتىڭ وليمپيادالىق, ۇلتتىق جانە حالىقتىق تۇرلەرى بويىنشا ءXXى اۋداندىق كەشەندى سپارتاكياداسى وتكەن. اۋىل سپورتشىلارى نىسانانى مىلتىقپەن اتۋ, كۇشتى جەتىلدىرۋ جاتتىعۋلارى مەن قاشىقتىعى 5 جانە 3 شاقىرىمداعى شاڭعى جارىسىنا قاتىستى. شاڭعى تەبۋ جارىسىندا ولجاس ەكى جىل قاتارىنان 2-ءشى ورىن يەلەنىپتى. مەكتەپتە اتاۋلى مەرەكە كۇندەرى مۇعالىمدەر اراسىندا دا سپورتتىق جارىستار وتەدى. جارىستار جۇگىرۋ, سەكىرۋ, كەدەرگىلەردەن ءوتۋ, دوپپەن جۇگىرۋ, ارقان تارتۋ تۇرلەرىنە ارنالادى. جەڭىل اتلەتيكادان باسقا قازاق كۇرەسىمەن دە اينالىسادى.
- بۇل جۇگىرگەن جولىمدى جالپى, مامىر مەرەكەلەرىنە ارنادىم. ماقساتىم سپورتتى ناسيحاتتاپ, سالاۋاتتى ءومىر سالتىنا جۇرتشىلىقتىڭ نازارىن اۋدارۋ, جاستاردىڭ ساناسىنا سپورتپەن اينالىسۋ قاجەتتىگىن قالىپتاستىرۋ, - دەيدى ولجاس كاكىمجانوۆ.
فاريدا بىقاي, «ەگەمەن قازاقستان»
پاۆلودار وبلىسى