اقتوبەدە استانانىڭ مادەني كۇندەرى ءوتىپ جاتىر

ءۇش كۇن ىشىندە اقتوبەلىكتەر انشىلەردىڭ ونەرىن, ۇزدىك قويىلىمدار مەن ەكسپوزيتسيانى تاماشالايدى, دەپ حابارلايدى استانا اكىمدىگىنىڭ رەسمي سايتى مادەنيەت جانە سپورت باسقارماسىنا سىلتەمە جاساپ. 

ايماقتاعى ەلوردا كۇندەرىن «استانادان اق تىلەك» مەرەكەلىك كونتسەرتىمەن اشادى. بۇگىن ساعات 17.00-دە «ونەر ورتالىعى» كونتسەرت زالىندا اقتوبەلىكتەر ءۇشىن «سارىارقا» حالىق اندەرى ءانسامبلى, «شالقىما» حالىق ءبيى, ەسترادالىق بي, كلاسسيكالىق, ەسترادا جانە حالىق ۆوكالىنىڭ سوليستەرى ونەر كورسەتەدى. 

شىعارماشىلىق كەشتىڭ شىرايىن ەلىمىزدىڭ ەڭ سۇرانىسقا يە ازىلكەشى تۇرسىنبەك قاباتوۆ اشا تۇسپەك. ونىمەن بىرگە ساحنادا وتاندىق ەسترادا جۇلدىزدارى دا مەرەكەنىڭ جانداندىرا تۇسەدى.  ساحنادا بەيبىت قورعان, كلارا تولەنباەۆا, رينات مالتساگوۆ, قايرات باەكەنوۆ جانە «فورمات» توبى, ارت-دومبىرا جوباسى وزدەرىنىڭ حيت اندەرىن شىرقايدى. 

كەلەسى كۇنى اقتوبەلىكتەر ولاردى Open air فورماتىندا وتەتىن كەشتە تاعى كورە الادى. كول-كوسىر شاتتىق پەن جارقىن ازىلدەر, نون-ستوپ مۋزىكاسى ءوز قوناقتارىن كۇتەدى. وندا كورەرمەندەر كەشكىسىن ەلىمىزدىڭ باس قالاسىنىڭ 20 جىلدىعىنا ارنالعان كونتسەرتتە تانىمال ارتيستەردى تىكەلەي ساحنادان تاماشالايدى.  اشىق اسپان استىندا «فونوگرامماسى از – اۋەنى كوپ» اتتى ۇرانمەن وتەتىن كونتسەرتتە جۇرگىزۋشى تەك مەرەكەلىك اتموسفەرانى عانا ەمەس, جاس استانانىڭ قالىپتاسۋ جولدارىن دا ەسكە سالىپ تۇرادى. ديسكوتەكا فورماتىندا وتەتىن كونتسەرت 13 مامىر ساعات 20:00-دەن 23:00-گە دەيىن قازاقستان رەسپۋبليكاسىنىڭ ءبىرىنشى پرەزيدەنتىنىڭ ورتالىق ساياباعىندا وتەدى.  

12-13 مامىر كۇندەرى ت. احانوۆ اتىنداعى اقتوبە وبلىستىق دراما تەاترىندا ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترى «جۇت» دراماسى مەن «قىزىل ورامالدى شىنارىم» قويىلىمىن ۇسىنادى. باشقۇرت رەسپۋبليكاسىنىڭ قوعام قايراتكەرى, رەجيسسەر ا. ابۋشاحمانوۆتىڭ «جۇت» سپەكتاكلىن دراماتۋرگ و. جانايداروۆا استانا تەاترى ءۇشىن لايىقتاپ قويدى. 

گاسترولدە تاعى ءبىر ش. ايتماتوۆتىڭ «قىزىل ورامالدى شىنارىم» اتتى شىعارمانىڭ جەلىسى بويىنشا تەاتردىڭ كوركەمدىك جەتەكشىسى تالعات تەمەنوۆتىڭ سپەكتاكلى ۇسىنىلادى. 

مادەني باعدارلامانى باس قالادان كەلگەن قوناقتار استانا قالاسىنىڭ قازاق وركەسترى مەملەكەتتىك اكادەميالىق فيلارمونياسىنىڭ «ەلوردادان ەلگە سالەم» اتتى كونتسەرتى تولىقتىرا تۇسپەك. اتالمىش كونتسەرت 13 مامىر كۇنى ساعات 17.00-دە «ونەر ورتالىعىنىڭ» كونتسەرت زالىندا بولادى. وركەسترمەن بىرگە ساحنادا «شالقىما» بي ءانسامبلى, ەسترادا, حالىق جانە  كلاسسيكالىق ۆوكالدىڭ سوليستەرى ونەر كورسەتەدى.

اقتوبەدەگى گاسترولدىڭ ەڭ شەشۋشى ءساتى «اق تىلەكپەن, استانا!» اتتى تاۋەلسىزدىك سارايى دايىنداعان ەكسپوزيتسياسى بولماق. كورمە 12-نەن 14 مامىرعا دەيىن جۇمىس ىستەيدى, ونى «ونەر ورتالىعى» كونتسەرت زالىنان تاڭعى ساعات 10-نان كەشكى 20:00-دەيىن تاماشالاۋعا بولادى, كىرۋ تەگىن. 

ۇيىمداستىرۋشىلار وتاندىق سۋرەتشىلەردىڭ ەڭ ۇزدىك 100-گە جۋىق جۇمىسىن جينادى. كورمەدە ومىربەك تىلەۋليەۆتىڭ قازاق حالقىنىڭ وتكەنى تۋرالى سىر شەرتەتىن «ەلىم-اي» سەرياسىن دا ۇسىنادى.