الماتى وبلىسىندا اپاتقا ۇشىراعان ياك-12م ۇشاعىنىڭ سەبەبى انىقتالدى

اۋە اپاتىنىڭ نەگىزگى سەبەبى اۋە كەمەسىنىڭ رۇقسات ەتىلمەيتىن شاعىن بيىكتىك پەن ۇشۋ جىلدامدىعىندا اۋە كەمەسىنىڭ مانەۆرلەردى (رۇقسات ەتىلگەن ەڭ جوعارى وراممەن بۇرىلۋ) ورىنداۋى بولىپ وتىر.

وسىنداي مانەۆرلەر, سونداي-اق ۇشاقتى باسقارۋ كەزىندە ۇشۋ بيىكتىگى مەن جىلدامدىعىن باقىلاۋدى جوعالتۋدىڭ سالدارىنان ۇشۋ بيىكتىگىنىڭ جوعالۋىنا جانە اۋە كەمەسىنىڭ جەر بەتىمەن وڭ جاعىمەن سوقتىعىسۋىنا الىپ كەلدى.

اۋە كەمەسىنىڭ جەر بەتىمەن سوقتىعىسۋى ناتيجەسىندە ۇشاق قۇرىلىمى بۇزىلىپ, ءورت شىقتى, سونىڭ ناتيجەسىندە ۇشقىش پەن جولاۋشى (شارۋا قوجالىعىنىڭ وكىلى) قازا بولدى.

بۇدان باسقا, اۆياتسيالىق وقيعانى تەكسەرۋ بارىسىندا كەلەسىدەي ىقپال ەتۋشى فاكتورلار مەن كەمشىلىكتەر انىقتالدى:

- اۋە كەمەسى كومانديرىنىڭ ۇشۋ الدىنداعى دەمالىس كەزىندە الكوگولدى اسىرا پايدالانۋى, بۇل ۇشۋدىڭ قاۋىپسىز ورىندالۋىن جانە اياقتالۋىن قامتاماسىز ەتپەدى;

- ۇشاقتى باسقارۋعا جولاۋشىنىڭ ادەيى ەمەس ارالاسۋ مۇمكىندىگى (ۇشاق ەكى جاقتى باسقارۋ ەلەمەنتتەرىمەن جابدىقتالعان);

- اۋە كەمەسى كومانديرىنىڭ وسى اۋە كەمەلەرىنە ارنالعان رۇقسات ەتىلگەن ماسسادان اساتىن ماسسامەن ۇشۋى; ۇشقىش كابيناسىندا ۇشۋ تاپسىرماسىن ورىنداۋعا بايلانىسى جوق بوگدە ادامنىڭ بولۋى.

«تەكسەرۋ قورىتىندىسى بويىنشا, قر يدم ازاماتتىق اۆياتسيا كوميتەتىنە «كازاۆيا» جشس اۆياتسيالىق جۇمىستاردى ورىنداۋعا ارنالعان كۋالىكتەردى قايتارۋ جانە ەكيپاج مۇشەلەرىنىڭ ۇشۋ الدىنداعى دەمالىس رەجىمىن ساقتاۋ, سونداي-اق ۇشۋ تاپسىرماسىنا قاتىسى جوق رۇقسات ەتىلمەگەن تۇلعالاردىڭ اۋە كەمەسىنىڭ كابيناسىندا بولۋىنا جول بەرمەۋ بولىگىندە بازالىق اەرودرومداردان تىس جەرگە وتىرعىزۋ الاڭدارىندا ءار ءتۇرلى اۋە جۇمىستارىن ورىندايتىن اۋە كەمەلەرىنىڭ پايدالانۋشىلارىنا باقىلاۋدى جانە قاداعالاۋدى كۇشەيتۋ مۇمكىندىگىن قاراستىرۋ ۇسىنىلدى», - دەلىنگەن حابارلامادا.

ايتا كەتەيىك, 2017 جىلعى 27 شىلدەدە ياك-12م ۇشاعى اپاتقا ۇشىراعان بولاتىن. اۋە اپاتىنان 54 جاستاعى حاليت اقبەردينوۆ پەن 39 جاستاعى شارۋا قوجالىقتىڭ باسشىسى ءماسىمجان ءماسىموۆ كوز جۇمعان. ۇشاق كومانديرىنىڭ 33 جىلدىق ءوتىلى بولعان.