اتىراۋدا ەكىنشى دۇنيەجۇزىلىك سوعىستا قازا تاپقانداردى قۇرمەتپەن ەسكە الدى

بۇگىن, 9 مامىردا جەڭىس ساياباعىندا ماڭگىلىك الاۋ مەموريالىنا گۇل قويۋ سالتاناتتى ءراسىمى باستالدى. ۇلى جەڭىستىڭ 73 جىلدىعىنا ارنالعان شاراعا 10 سوعىس ارداگەرى قاتىستى.

قالالىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى نۇرلى حابيەۆانىڭ ايتۋىنشا, اتىراۋ وبلىسىندا قازىر 30 سوعىس ارداگەرى, 1 كونتسلاگەر تۇتقىنى, 1 حابارسىز كەتكەن سوعىسقا قاتىسۋشىنىڭ جەسىرى بار. -جەڭىس كۇنىنە وراي اتىراۋ وبلىسىنداعى سوعىس ارداگەرلەرى جەرگىلىكتى بيۋدجەتتەن 300 مىڭ تەڭگە الدى. جىل سايىن دەمەۋشىلەر ەسەبىنەن قاريالار قازاقستان مەن تمد ەلدەرىندەگى شيپاجايلارعا جىبەرىلەدى. بۇگىنگى شاراعا دەنساۋلىقتارىنا بايلانىستى كوپ ارداگەرلەر قاتىسا المادى, كوپشىلىگى توسەك تارتىپ جاتقان ادامدار, -دەدى نۇرلى حابيەۆا.

ماڭگىلىك الاۋعا گۇل قويۋ راسىمىنە جالپى سانى 10 مىڭنان استام ادام قاتىستى. ءداستۇرلى ءۇنسىز ەسكە الۋ مينۋتىنان كەيىن اتىراۋ وبلىسى تۇرعىندارى مەن قوناقتارى ماڭگىلىك الاۋعا گۇل قويدى.

-اتىراۋ وبلىسىنان 43 مىڭعا جۋىق جاۋىنگەر سوعىسقا اتتاندى, 13 مىڭى قايتا ورالمادى. قازىر 3 مىڭ تىل ارداگەرى مەن 30 سوعىس ارداگەرى ورتامىزدا بار. ەرلىكتەرىڭىزگە قۇرمەتپەن باس يەمىز. مەملەكەت باسشىسى ايتقانداي, ءار وتباسىندا سوعىس سالعان ءىز قالدى. سوندىقتان بۇل كۇندى ۇرپاقتار جادىندا اتالارىمىزدىڭ, اكەلەرىمىزدىڭ ەرلىگى, باتىرلىعى قالۋى ءۇشىن اتاپ وتەمىز, - دەدى قاتىسۋشىلارعا اتىراۋ وبلىسىنىڭ اكىمى نۇرلان نوعاەۆ.