ءساۋىر ايىنىڭ 23-25-ءى ارالىعىندا وتكەن «سكوتوكراد» رەسپۋبليكالىق جەدەل-پروفيلاكتيكالىق شاراسى كەزىندە وبلىستا 30 مال ۇرلىعى وقيعاسى تىركەلدى. ونىڭ ىشىندە بۇرىن ورىن العانى دا, بۇرناعى جىلدارى ۇرلىق تا, جاقىندا ۇرلاعانى دا بار. وبلىستىق ىشكى ىستەر دەپارتامەنتى قىزمەتكەرلەرى وتكىزگەن جەدەل پروفيلاكتيكالىق شارا كەزىندە مال ۇرلىعىمەن اينالىسقان توپتى ۇستادى. ولاردىڭ كەلتىرگەن زيانى 5 ميلليون تەڭگەدەن اسادى.
امانكەلدى اۋدانىنداعى جەرگىلىكتى پوليتسيانىڭ ۋچاسكەلىك ينسپەكتورى توقتاتقان «فولكسۆاگەن» جەڭىل ماشيناسىنىڭ باگاجىنان جاڭا سويىلعان سيىردىڭ ەتى شىققان. ماشينا يەسىنىڭ ول ەتتى قايدان العانى تۋرالى قۇجاتتارى بولماعان. ماشينا ايداپ كەلە جاتقان 36 جاستاعى جىگىتتىڭ جايىلىمداعى سيىردى سويىپ اكەلە جاتقانى بەلگىلى بولدى. سيىر جەرگىلىكتى 53 جاستاعى تۇرعىننىڭ مالى ەكەندىگىن دە پوليتسەيلەر انىقتادى. قر قك «ۇرلىق» 188 بابى بويىنشا قىلمىستىق ءىس قوزعالدى.
پوليتسەيلەر اۋليەكولدەن 14 مال ۇرلىعىن تىركەدى. بارىمتاشىلار ءىرى قارا ۇرلاۋدى مەڭدىعارا, قوستاناي, دەنيسوۆ, فەدوروۆ اۋداندارىندا دا «ورىستەتكەن». ۇستالعانداردىڭ تۇسىندىرۋىنشە, بارىمتاشىلار ءبىر اۋىلعا كەلەدى دە, كولىگىن اۋىلدىڭ سىرتىنا تاستاپ, وزدەرى جۇرتتىڭ سارايىن باقىلايدى. قوراداعى سيىردى اۋىلدىڭ سىرتىنا ايداپ شىعادى دا, سويىپ, جىلىكتەپ الىپ كەتەدى. ولار ونى قوستانايعا اكەلىپ, كەلىسىم بويىنشا ەت ساتاتىن دۇكەندەرگە وتكىزەدى. تومەن باعامەن وتكىزەدى دە, اقشاسىن قولما-قول الادى.
جەدەل-پروفيلاكتيكالىق شارا كەزىندە ۇستالعان توپتاعى بارىمتاشىلاردىڭ بارلىعى دا 1991 جىلعى تەپسە تەمىر ۇزەتىن جىگىتتەر. ەكىنشى 6 ادامنان تۇراتىن قىلمىستىق توپتى پوليتسەيلەر فەدوروۆ اۋدانىنان ۇستادى. 21-27 جاس ارالىعىنداعى جىگىتتەر اۋدان وڭىرىندە 13 رەت ۇرلىق جاساعان, سونىڭ ەكەۋى مال ۇرلىعى, قالعانى ءۇي مەن دۇكەندى توناعان.
ءنازيرا جارىمبەت,
«ەگەمەن قازاقستان»
قوستاناي