داككا قالاسىندا (بانگلادەش) وتكەن يسلام ىنتىماقتاستىعى ۇيىمى سىرتقى ىستەر مينيسترلەرى كەڭەسىنىڭ 45-ءشى سەسسياسىندا قازاقستاندىق ديپلومات اسقار مۋسينوۆ يىۇ باس حاتشىسىنىڭ عىلىم جانە تەحنولوگيالار جونىندەگى ورىنباسارى بولىپ سايلاندى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلايدى.
ا.مۋسينوۆ كادرلىق ديپلومات مامان, بۇرىن قازاقستان سىرتقى ىستەر مينيسترلىگىندە ءتۇرلى لاۋازىمداردا قىزمەت اتقاردى, قازاقستاننىڭ مىسىرداعى, ساۋد ارابياسىنداعى, بىرىككەن اراب امىرلىكتەرىندەگى ەلشىسى, سىرتقى ىستەر مينيسترلىگىنىڭ جاۋاپتى حاتشىسى جانە ءمينيستردىڭ ورىنباسارى بولدى. قازىرگى ۋاقىتتا قازاقستان ۇكىمەتىنىڭ جولداماسىمەن يىۇ باس حاتشىلىعىندا بەيبىتشىلىك جانە قاقتىعىستاردى رەتتەۋ جونىندەگى ءبولىم باسشىسىنىڭ قىزمەتىن اتقارادى.
«بۇل تاعايىنداۋ قازاقستان پرەزيدەنتى نۇرسۇلتان نازارباەۆتىڭ مۇسىلمان الەمىندەگى بەدەلىنىڭ, يسلام الەمىن دامىتۋ بويىنشا بەلسەندى قىزمەتىنىڭ ارقاسىندا مۇمكىن بولدى. قازاقستاندىق وكىلدىڭ سايلانۋى 2017 جىلدىڭ قىركۇيەگىندە استانا قالاسىندا وتكەن يىۇ عىلىم مەن تەحنولوگيالار جونىندەگى ءبىرىنشى ءسامميتىنىڭ ناتيجەلەرىن ىسكە اسىرۋ اياسىندا وتە ماڭىزدى بولىپ تابىلادى», - دەدى سىرتقى ىستەر ءمينيسترى قايرات ءابدىراحمانوۆ.
سايلاۋداعى جەڭىس قازاقستان وكىلى يىۇ-دا وسىنداي جوعارى لاۋازىمعا بۇرىن سوڭدى تاعايىندالماعانىمەن دە ەرەكشە بولىپ وتىر. ا. مۋسينوۆتىڭ سايلاۋداعى قارسىلاسى بانگلادەشتىك ديپلومات كامرۋل احسان بولدى. قازاقستان وكىلىنە يىۇ ازيالىق توپتىڭ 18 مۇشەسىنىڭ 12-ءسى داۋىس بەردى.