وسى وداقتىڭ ارقاسىندا وبلىستا 2000-نان استام شارۋا قوجالىقتارى مەملەكەتتىك قولداۋ شارالارىن الدى, - دەپ حابارلايدى اتىراۋ وبلىسىنىڭ وڭىرلىك كوممۋنيكاتسيالار قىزمەتى.
«قازاقستاننىڭ فەرمەرلەر وداعى» رەسپۋبليكالىق قوعامدىق بىرلەستىگى اتىراۋدا ءوزىنىڭ وڭىرلىك فيليالىن اشتى. اتالعان وداق قىزمەتىنىڭ نەگىزگى باعىتى – اتىراۋ وبلىسىندا اۋىل شارۋاشىلىعى ونىمدەرىن وندىرۋشىلەردى قولداۋ, سونداي-اق فەرمەرلەردىڭ زاڭدى مۇددەلەرىن قورعاۋ. قازىرگى تاڭدا اتىراۋ وبلىسىندا 2000-نان استام فەرمەرلىك شارۋا قوجالىقتارى تىركەلگەنىن اتاپ وتكەن ءجون. بۇگىنگى كۇنى ءوڭىر فەرمەرلەرى وندىرەتىن ءونىم ساپاسى ارتۋدا, تاۋارلار گەرمانيا, پولشا, ۋكراينا, رەسەي, فرانتسيا جانە وزبەكستان سياقتى ەلدەرگە ەكسپورتتالادى. - ەگەر 2016 جىلى 1 ميلليارد 771,4 ملن. توننا ءونىم ەكسپورتتالسا, 2017 جىلى ەكسپورتقا 1 ميلليارد 776 ميلليون توننا وندىرىلگەن ءونىم جونەلتىلدى, ەكسپورتتىڭ وڭ ءوسۋ ديناميكاسى بايقالادى. فەرمەرلەر وداعى فيليالىنىڭ اشىلۋى ءبىرىنشى كەزەكتە ءوز بيزنەسىن باستاعىسى كەلەتىندەرگە كەڭەستەر بەرۋ جانە زاڭدى كومەك كورسەتۋ ارقىلى اۋىل شارۋاشىلىعىن دامىتۋعا باعىتتالعان, - دەدى اتىراۋ وبلىسى اۋىل شارۋاشىلىعى باسقارماسى باسشىسىنىڭ ورىنباسارى سەرىك سارسەكەنوۆ. شارۋا قوجالىقتارىنىڭ يەلەرى جىل سايىن رەسپۋبليكالىق بيۋدجەتتەن سۋبسيديالار الادى. اتاپ ايتقاندا, ەگەر 2016 جىلى وڭىردە اۋىل شارۋاشىلىعىن دامىتۋعا 2 ميلليارد 463 ملن.تەڭگە سۋبسيديا بولىنسە, 2017 جىلى بۇل سوما ءوسىپ, 2 ميلليارد 631,2 ملن.تەڭگەنى قۇرادى. «فەرمەرلەر وداعىنىڭ» وڭىرلىك فيليالى شارۋا قوجالىقتارى يەلەرىنىڭ بارلىق سۇراقتارىنا جاۋاپ بەرۋگە دايىن.