الماتى وبلىسىنىڭ مادەنيەت, ارحيۆتەر جانە قۇجاتتاما باسقارماسى مەن ب.ريموۆا اتىنداعى تالدىقورعان دراما تەاترى وسىدان ءبىر جىل بۇرىن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا رەسپۋبليكالىق "ەل تاريحى-جەر تاريحى" درامالىق شىعارمالار بايقاۋىن جاريالاعان بولاتىن.
جاقىندا بايقاۋدىڭ قورىتىندىسى شىعىپ, سالتاناتتى ماراپاتتاۋ راسىمىندە جەڭىمپازدار انىقتالدى. بايقاۋعا قاتىسقان شىعارمالاردى تالداپ, ءادىل باعالارىن كلاسسيك جازۋشى, دراماتۋرگ, قر مەملەكەتتىك سىيلىعىنىڭ لاۋرەاتى دۋلات يسابەكوۆ, «ونەرتانۋ» عىلىمدارىنىڭ كانديداتى, تەاتر سىنشىسى انار ەركەباي مەن اقىن, حالىقارالىق «الاش» سىيلىعىنىڭ لاۋرەاتى, وبلىستىق «جەتىسۋ» گازەتىنىڭ باس رەداكتورى امىرە ءارىن بەردى. ايتا كەتەتىن ءجايىت, مۇنداي درامالىق شىعارمالار بايقاۋى تەاتردىڭ ۇيىمداستىرۋىمەن العاش رەت وتكىزىلىپ وتىر. بايقاۋعا جالپى سانى 8 درامالىق شىعارما قاتىسىپ, ونىڭ 6 ماراپاتتالدى. باق سىناسقاندار ىشىندە الماتى وبلىسىنان, الماتى, سەمەي, وسكەمەن قالالارىنان قالامگەرلەر بولدى.
كورەرمەننىڭ سانا-سەزىمىن ءسوز بەن ارەكەت ارقىلى بىرنەشە ساعات باۋراپ, كوزىن ساحناعا قادالتار قارەكەت, جاندۇنيەسىن تەبىرەنىسكە تۇسىرەر قاقتىعىس تابۋ - قيىننىڭ قيىنى ەكەنى بەلگىلى. دەگەنمەن دە دۋلات يسابەكوۆ توراعالىق ەتكەن بايقاۋعا قاتىسقان قالامگەرلەردىڭ قابىلەت-قارىمىن قازىلار القاسى جوعارى دەپ باعالادى. بايقاۋدىڭ اتاۋىمەن تالاپتارىنا سايكەس پەسالار جەتىسۋ ولكەسىندە بولعان تاريحي وقيعالار مەن تاريحي تۇلعالار جايىندا جازىلعان. كوركەمدىك, مازمۇندىق دەڭگەيىنە قاراي ەڭ ۇزدىك دەپ تانىلعان درامالىق شىعارما وربۇلاق شايقاسىنىڭ 375 جىلدىعىنا ارنالىپ جازىلعان قولعانات مۇراتتىڭ «وربۇلاق» تاريحي دراماسى بولدى. باس جۇلدەنى يەلەنگەن بۇل شىعارما ارنايى ديپلوممەن 700 000 تەڭگە اقشالاي سەرتيفيكاتقا يە بولدى. سونداي-اق 1-ءشى ورىن ۇلپان توقاەۆا, 2-ءشى ورىن زامزاگۇل سارنوقاسوۆا, 3-ءشى ورىن اليشەر ايتۋار سىندى جاس قالامگەرلەرگە بۇيىردى. مۇسا ءجانادىلوۆ پەن ايجارىق سۇلتانقوجا سىندى قالامگەرلەر بەلسەندى قاتىسقانى ءۇشىن ديپلومىمەن 100 000 تەڭگە اقشالاي سەرتيفيكاتتار الدى. جانە ەڭ ماڭىزدى جاڭالىق ب.ريموۆا اتىنداعى تالدىقورعان دراما تەاترىنىڭ ادەبي قورى سۋ جاڭا, ءالى سياسى كەپپەگەن 6 درامالىق شىعارمامەن تولىعىپ, باس جۇلدەنى يەلەنگەن «وربۇلاق» تاريحي دراماسى كەلەر جىلى تەاتردا قويىلادى.
وسىنداي ناتيجەمەن اياقتالعان بۇل بايقاۋ كەلەر جىلى دا ءوز جالعاسىن تابادى دەگەن ۇمىتتەمىز. قازاق ادەبيەتىنىڭ قورى تاريحي شوقتىعى بيىك تۋىندىلارمەن تولىعىپ, ساحنا ارقىلى حالىققا جەتسە, ناعىز رۋحاني جاڭعىرۋ سول بولسا كەرەك-ءتى.
مۇرات قولعانات, باس جۇلدە يەگەرى:
- ءبىر جىل بويى جەتىسۋدىڭ باي تاريحىن, مىقتى تاريحي تۇلعالارىن ءبىراز زەرتتەپ, وربۇلاق شايقاسى تۋرالى جازايىن دەدىم. نەگە؟ سەبەبى مۇنداي ءىرى تاريحي وقيعالار تەاتر ارقىلى, كينو ارقىلى بولسىن جاڭعىرىپ, جاس ۇرپاقتىڭ ساناسىنا جازىلۋ كەرەك. تاۋەلسىزدىگىمىزگە اسەر ەتكەن تاريحي-ساياسي وقيعالاردىڭ ەڭ ماڭىزدىلارى وسى قاسيەتتى جەتىسۋدا بولعان. وربۇلاق شايقاسىنىڭ 375 جىلدىعىنا تارتۋ ەتىپ وتىرعان بۇل شىعارمانى جازۋ ءۇشىن ىزدەنىپ, عىلىمي زەرتتەۋلەردى وقىپ تۇسىنگەنىم, كەلەر ۇرپاعى ءۇشىن قان كەشىپ, بەيبىت زامان ءۇشىن جان بەرگەن باتىرلارىمىزدىڭ وراسان ەڭبەكتەرى, تاريحي وقيعالاردىڭ ماڭىزدىلىعى, باعاسى حالىققا تولىق جەتپەي, ەسكەرۋسىز قالىپ جاتادى. سوندىقتان دا مۇنداي تاريحي وقيعا ساحنا ارقىلى حالىققا, جاس ۇرپاققا جەتسىن دەگەن ماقساتتا جازدىم. باس جۇلدە الامىن دەپ ويلامادىم. ءادىل قازىلار القاسىنا, الماتى وبلىسى اكىمدىگىنە, وبلىستىق مادەنيەت باسقارماسىنا, ب.ريموۆا اتىنداعى تالدىقورعان دراما تەاترىنىڭ ۇجىمىنا شەكسىز العىسىمدى بىلدىرەمىن.
مونشاق بەكايدار.
تالدىقورعان قالاسى.