مەملەكەت باسشىسى ن.نازارباەۆتىڭ جارلىعىنا سايكەس ازاماتتاردى كوكتەمگى اسكەرگە شاقىرۋ جۇمىستارى قارقىندى جۇرگىزىلۋدە.
قورعانىس مينيسترلىگىنىڭ مالىمەتتەرىنە قاراعاندا, بيىل كوكتەمگى جانە كۇزگى شاقىرتۋلاردا ەلىمىزدە 35 مىڭداي جاس جىگىت اسكەر قاتارىنا قابىلدانادى. وسى جۇمىستار اياسىندا استانانىڭ وزىنەن ماۋسىم ايىنا دەيىن 800-گە جۋىق ادام وتان الدىنداعى بورىشىن وتەۋگە بارادى. ەلوردالىق جاستار قارۋلى كۇشتەرگە, شەكارا قىزمەتىنە, مەملەكەتتىك كۇزەت قىزمەتىنە جانە ۇلتتىق ۇلانعا تەڭدەي بولىنەدى. ال 7 مامىر – وتان قورعاۋشى كۇنى قارساڭىندا بولاشاق 40 ساربازدى اتا-انالارى, استانا قالاسى اكىمدىگى, قورعانىس مينيسترلىگى, ارداگەرلەر ۇيىمى, قورعانىس ىستەرى دەپارتامەنتىنىڭ باسشىلىعى سالتاناتتى جاعدايدا شىعارىپ سالادى.
اسكەرگە بارۋ – ازاماتتىق بورىشمويىنداۋ كەرەك, قازىر قازاقستاندىق ساربازداردىڭ قارىدارى-توق, كويلەكتەرى-كوك. اسكەري دوكترينا تالاپتارى قازاق اسكەريلەرىنىڭ بۇگىنى مەن بولاشاعىن ايقىنداپ بەردى. ال وتان قورعاۋدىڭ ازاماتتىق پارىز, ابىرويلى مىندەت ەكەندىگىن ەلباسى – قارۋلى كۇشتەردىڭ جوعارعى باس قولباسشىسى ن.نازارباەۆ ۇنەمى ەسكە سالىپ وتىرادى. «وتان ءۇشىن وتقا ءتۇس – كۇيمەيسىڭ», دەگەن باۋىرجان باتىردىڭ ۇلاعاتتى ءسوزى ءاربىر جاستىڭ جۇرەگىنەن ورىن تاپقان.
قازاقستان رەسپۋبليكاسى قارۋلى كۇشتەرى باس شتابى ۇيىمداستىرۋ – جۇمىلدىرۋ دەپارتامەنتىنىڭ باسشىسى ءمۇسىلىم دايىروۆتىڭ ايتۋىنشا, ەلباسىنىڭ تاپسىرماسىنا سايكەس اسكەردىڭ 30 پايىزى قىسقا مەرزىمدى مىندەتىن وتەۋشىلەردەن قۇرالۋى ءتيىس. ونىڭ ۇستىنە الەمدىك گەوساياسي جاعدايلاردىڭ وزگەرىسىنەن تۋىنداعان ماسەلەلەر كوپتەگەن مەملەكەتتەردىڭ ىشكى مۇمكىندىگىن ايشىقتاپ بەردى.
– الەمدەگى سوڭعى وقيعالار, اسىرەسە سيرياداعى سوعىس ەر-ازاماتتاردىڭ بارلىعىنىڭ اسكەري داعدىلاردى جەتىك بىلۋگە تيىستىلىگىن كورسەتتى. سوعىستىڭ بەتىن اۋلاق قىلسىن, بىراق ءبىز كەز كەلگەن جاعدايعا دايىن بولۋىمىز كەرەك. ءبىز ەشبىر مەملەكەتپەن سوعىسۋعا مۇددەلى ەمەسپىز, سوعىس ءبىزدىڭ ساياساتىمىزعا قايشى. بىراق قورعانىستى ۇمىتپاۋىمىز قاجەت, – دەدى م.دايىروۆ.
ونىڭ ايتۋىنشا, ەر-ازاماتتىڭ تولىققاندى قالىپتاسۋىنا اسكەري تاربيە اۋاداي قاجەت. ءاربىر ءۇيدىڭ ەركەسى تارتىپكە كوندىگىپ, وڭ مەن سولىن تانيتىن جەر دە – اسكەر. وسى ورايدا, اسكەرگە قابىلداۋدا دەنە ءبىتىمى كەلىستى, دەنساۋلىعى مىعىم, ويى ۇشقىر, ارناۋلى ءبىلىمى بار جاستارعا باسىمدىق بەرىلىپ وتىر.
«سوڭعى جىلدارى اسكەري تەحنيكالار جەتىلدىرىلدى, ەلەكتروندى باسقارۋ قۇرالدارى كوبەيدى. قازىر اسكەرگە IT-تەحنولوگيا دا جات ەمەس. ەندى بىزگە سول زاماناۋي قارۋ مەن قۇرىلعىلاردى باسقارا الاتىن ساۋاتتى ساربازدار قاجەت. جاستاردىڭ باستاپقى ءبىلىمى مەن ىنتاسى بولسا, قات ماماندىقتار بويىنشا ۇيرەتىپ الامىز», دەيدى مينيسترلىك وكىلى.
قازىر اسكەري بورىشىن وتەۋشىلەردىڭ الەۋمەتتىك جەڭىلدىگى جوق بولعانىمەن, قولىنا قارۋ ۇستاپ, ءتارتىپتىڭ قىر-سىرىنا كوندىككەن جاستارعا جۇمىس بەرۋشىلەردىڭ قىزىعۋشىلىعى جوعارى بولاتىنى تالاس تۋدىرمايدى. ونىڭ ۇستىنە قورعانىس مينيسترلىگى بۇرىنعى ساربازدارىنىڭ جوعارى وقۋ ورىندارىنا تۇسۋگە قانداي دا ءبىر جەڭىلدىكتەرگە يە بولعاندىعىن قالايدى. بۇعان قاتىستى ءتيىستى ۇسىنىستار دا ازىرلەنۋدە.
م.دايىروۆتىڭ مالىمدەۋىنشە, بۇگىندە وتان قورعاۋشىلاردىڭ سەگىزدەن ءبىرى قىز-كەلىنشەكتەر. ەر ازاماتتارمەن قاتار ساپتا تۇراتىن ولاردىڭ باسىم بولىگى ايەل زاتىنا ءتان ۇقىپتىلىق, تياناقتىلىقتى قاجەت ەتەتىن قارجى, ەسەپ-قيساپ, مەديتسينا سالالارىندا بورىشتارىن وتەۋدە. ال ورتا مەكتەپتەردە العاشقى اسكەري دايارلىق پاندەرى جاڭا وقۋ-ادىستەمەلىك قۇرالدار ارقىلى وقىتىلۋدا.
جالپى, گەنەرال م.دايىروۆتىڭ ءوزى اسكەري ۋچيليششەدەن باستاپ, اۋعانستانداعى قان مايداننىڭ ورتاسىندا 2,5 جىل بورىشىن وتەگەن كاسىبي اسكەري قىزمەتكەر. سوندىقتان ونىڭ بۇگىنگى اسكەردىڭ جايلى جاعدايىنا بايلانىستى باعاسى اقيقاتتان الشاق جاتپاعاندىعىنا سەنۋگە بولادى.
تاربيەنىڭ كوزى – قازاق باتىرلارىنىڭ جولىقازاق حالقى باتىرلاردان كەندە ەمەس. ساربازداردىڭ ساناسىنا قابانباي, بوگەنباي, ەسەت سىندى كوپتەگەن باتىرلاردىڭ ەرلىك ىستەرىن ءسىڭىرىپ, پاتريوتتىق تاربيەنىڭ قازاقستاندىق ۇلگىسىن قالىپتاستىرۋ تۋرالى از ايتىلىپ جۇرگەن جوق. ءتىپتى, اسكەري بولىمدەردى قازاقتىڭ داڭقتى ۇلدارىنىڭ ەسىمىمەن اتاۋ تۋرالى دا ۇسىنىستار بولدى.
اسكەردىڭ قورعانىس قابىلەتتىلىگىنىڭ نەگىزى پاتريوتتىق تاربيەدەن باستاۋ الاتىندىعىن «قارۋلى كۇشتەر ارداگەرلەرى» رەسپۋبليكالىق قوعامدىق بىرلەستىگى توراعاسىنىڭ ورىنباسارى, گەنەرال-مايور مارات نۇعىمانوۆ جاقسى بىلەدى. وسى سالادا 36 جىل تەر توككەن قارت ارداگەردىڭ تاربيە مەن تالاپقا بايلانىستى ءوز پايىمى بار.
– پاتريوتتىق سەزىم وتباسىنان باستالىپ, مەكتەپ قابىرعاسىندا شىڭدالىپ, اسكەر ساپىندا تولىسادى. بابالارىمىز وسىناۋ بايتاق جەردى اق نايزانىڭ ۇشىمەن, اق بىلەكتىڭ كۇشىمەن قورعاپ قالدى. تاريحتى تۇگەندەر بولساق, قازاق بالالارىنا ۇلگى بولارلىق باتىرلار جەتكىلىكتى. كەشەگى ۇلى وتان سوعىسىنىڭ وزىندە قازاقستاننان بەس جۇزدەي باتىر شىقتى. وسى جاستاردىڭ جارقىن بولاشاعى ءۇشىن كەۋدەلەرىن وققا توسقان اتالارىنىڭ قاي قايسىسى دا ۇلگى بولۋى ءتيىس, – دەيدى م.نۇعىمانوۆ.
ونىڭ ايتۋىنشا, اسكەرگە بارماعان نەمەسە وتان الدىنداعى بورىشىن وتەۋگە ق ۇلىقسىز جاستاردىڭ سانا-سەزىمىن سىلكىپ الىپ, ءومىرىنىڭ ورنەكتى ساتتەرىنەن قۇر قالعاندىعىن سەزىنەرلىك ىقپال بولۋى ءتيىس.
م.نۇعىمانوۆ, سونداي-اق مەديتسينالىق وقۋ ورىندارىندا پەدياتريا فاكۋلتەتتەرىنىڭ جابىلۋىنىڭ, اياق-كيىمدەردىڭ مەملەكەتتىك ستاندارتتارىنىڭ بولماۋىنىڭ وسكەلەڭ ۇرپاق دەنساۋلىعىنا كەرى اسەرىن تيگىزگەندىگىن قىنجىلىسپەن ايتادى. ونىڭ ۇستىنە ول ورتا ءبىلىم بەرۋ ۇيىمدارىندا جالاقىنىڭ ازدىعىنان ەر ازاماتتاردىڭ تۇراقتاماي, بالالار تاربيەسى تەك ايەل ادامعا جۇكتەلۋىنىڭ كەرى اسەرى سەزىلىپ وتىرعاندىعىن جەتكىزدى.
ايتا كەتەرلىگى, قارت گەنەرالدىڭ قىزى مەن جيەنى دە اسكەري سالانى تاڭداعان.
بولاشاق ساربازدار ساپقا تۇردىاسكەري بورىشىن وتەۋگە اتتاناتىن جاستاردى استانا قالاسى اكىمىنىڭ ورىنباسارى ەرمەك امانشاەۆ تا قۇتتىقتاپ, ساربازداردىڭ اسكەري مىندەتتى ابىرويمەن ورىنداپ, ورالۋلارىنا تىلەكتەستىك ءبىلدىردى. سونىمەن قاتار كاسىبي اسكەريلەر ناعىز ۇرىس دالاسىنا ءتان ءىس-قيمىلداردىڭ ۇلگىسىن كورسەتىپ, جاس كادەتتەر دوڭگەلەنە بيلەپ بەردى. وتانشىل سەزىمگە بولەيتىن اندەر دە ورىندالدى.
بۇل سالتاناتتى كورگەن بولاشاق ساربازداردىڭ ءبىرىنىڭ اكەسى مۇراتبەك نۇرقادىل ءوز ۇلىنىڭ ناعىز جىگىتكە ءتان اسكەري سالاعا جەكە قىزىعۋشىلىعىمەن تاڭداۋ جاساعاندىعىنا ريزالىعىن ءبىلدىردى.
«وتان قورعاۋ – ەردىڭ پارىزى. بالام مۇعالىمدىك قىزمەتىن قيىپ تاستاپ, اسكەري بورىشىن وتەۋگە اتتانىپ بارادى. ونىڭ تاڭداۋىنا قارسى بولمادىق», دەگەن اكە تىلەگى سول كۇنگى بارشا جاستىڭ اتا-اناسىنا ءتان ەدى.
سەرىك ابدىبەك, «ەگەمەن قازاقستان»