قازاقستاننىڭ سىرتقى ىستەر ءمينيسترى قايرات ءابدىراحمانوۆ جاقىن ارادا ديپلوماتيالىق ميسسياسىنىڭ اياقتالۋىنا بايلانىستى قازاقستانداعى ەۋروپالىق وداق وكىلدىگىنىڭ باسشىسى ترايان حريستەانى قابىلدادى.
ق.ءابدىراحمانوۆ ت.حريستەانىڭ قازاقستان رەسپۋبليكاسى مەن ەۋرووداق اراسىنداعى ساياسي ديالوگتى تەرەڭدەتۋگە, ەكونوميكالىق ءوزارا ىقپالداستىقتى دامىتۋعا جانە مادەني-گۋمانيتارلىق بايلانىستاردى نىعايتۋعا باعىتتالعان ءتيىمدى قىزمەتىن ەرەكشە اتاپ ءوتتى.
كەزدەسۋ بارىسىندا 2015 جىلى قازاقستان جانە ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمگە قول قويۋلۋى ەكىجاقتى قارىم-قاتىناستاردى جاڭا ساپالى دەڭگەيگە كوتەرگەنى ءسوز ەتىلدى. كەلىسىم ىنتىماقتاستىقتىڭ 29 سالاسىن قامتىپ, 2016 جىلدىڭ 1 مامىرىنان باستاپ جارتىلاي قولدانىسقا ەنگەن بولاتىن. ول ەۋرووداقتىڭ بارلىق 28 مۇشە ەلدەرىمەن جانە ەۋروپارلامەنتپەن راتيفيكاتسيالانۋىنان كەيىن تولىق كۇشىنە ەنەتىن بولادى. قازىرگى تاڭدا كەلىسىم ەو-نىڭ 23 مەملەكەتىمەن جانە ەۋروپارلامەنتپەن ماقۇلداندى.
تاراپتار ەكى جاقتى ساۋدانى ودان ءارى كەڭەيتۋ جانە ءارتاراپتاندىرۋ, قازاقستان ازاماتتارىنا ۆيزالىق رەجيمدى جەڭىلدەتۋ, سونداي-اق ەو-ورتالىق ازيا فورماتىنداعى ىنتىماقتاستىقتى تەرەڭدەتۋ بويىنشا جوسپارلاردى تالقىلادى. سونىمەن قاتار, 2018 جىلعى 10-11 مامىرعا جوسپارلانعان قازاقستان رەسپۋبليكاسى - ەۋروپالىق وداق پارلامەنتتىك كوميتەتىنىڭ جىل سايىنعى وتىرىسىنا ەرەكشە نازار اۋدارىلدى. بۇل ينستيتۋت 1999 جىلدان بەرى جۇمىس ىستەپ, ەكى جاقتى پارلامەنتارالىق ديالوگتىڭ ءتيىمدى الاڭىنا اينالدى.
ق.ءابدىراحمانوۆ ەۋرووداق ەلشىسىنە مەملەكەتتىك ناگرادا – قازاقستان رەسپۋبليكاسىنىڭ قۇرمەت گراموتاسىن سالتاناتتى تۇردە تابىستادى. قازاقستان پرەزيدەنتى نۇرسۇلتان نازارباەۆتىڭ ءتيىستى جارلىعىندا ت.حريستەا قازاقستان رەسپۋبليكاسى جانە ەۋروپالىق وداق اراسىنداعى تابىستى ىنتىماقتاستىقتى دامىتۋعا سىڭىرگەن ەڭبەگى ءۇشىن جوعارى ناگرادا بەرىلىپ وتىرعانى اتاپ وتىلگەن.
ت.حريستەا ەكىجاقتى ىنتىماقتاستىقتى نىعايتۋعا قوسقان ۇلەسىن جوعارى باعالاعانى ءۇشىن قازاقستان رەسپۋبليكاسىنىڭ باسشىلىعىنا جانە ەو وكىلدىگىمەن ناتيجەلى ءوزارا ءىس-قيمىلى ءۇشىن سىرتقى ساياسي ۆەدومستۆوعا العىسىن ءبىلدىردى.
كەزدەسۋدىڭ سوڭىندا ەۋرووداق ەلشىسى ق.ابدىراحمانوۆقا ەۋرووداقتىڭ ارگەنتينا, ءۇندىستان, وار ءتارىزدى ستراتەگيالىق سەرىكتەس ەلدەرىمەن قاتار قازاقستانعا تەحنيكالىق جانە قارجىلىق كومەك كورسەتۋ, وزىق تاجىريبە مەن ءبىلىم تابىستاۋ, ۇشجاقتى جوبالاردى ىسكە اسىرۋ بويىنشا پيلوتتىق رەجيمدە ارنايى شارتتار بەرىلەتىنى تۋرالى ەۋروپالىق كوميسسيانىڭ شەشىمى تۋرالى حابارلادى.