ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۋزەيىندە اقىن, كومپوزيتور قازاقستان رەسپۋبليكاسىنىڭ مادەنيەت قايراتكەرى ەلدار ءورازاليننىڭ «شىڭعىستاۋ» اتتى كىتابىنىڭ تۇساۋكەسەر ءراسىمى ءوتتى.
تۇساۋكەسەر بارىسىندا اۆتوردىڭ «شىڭعىستاۋ» كىتابى جانە سوعان قوسىمشا اباي شاڭىراعىنان باسىلىپ شىققان جيىرماعا جۋىق كىتاپ توپتامالارى سەمەي قالاسىندا ورنالاسقان اباي كىتاپحاناسىنىڭ ۇجىمىنا سىي رەتىندە بەرىلدى. وسىناۋ رۋحاني قۇندى بايلىقتى اباي اتىنداعى كىتاپحانا ديرەكتورىنىڭ ورىنباسارى گۇلميرا امرەنوۆاعا اباي مۋزەيىنىڭ ديرەكتورى بولات جۇنىسبەكوۆ سالتاناتپەن تابىستاپ, بۇل ەلباسىمىزدىڭ «رۋحاني جاڭعىرۋ» جوباسىنا قوسىپ جاتقان تىڭ ۇلەسىمىز دەپ اتاپ ايتتى. سونداي-اق, كەلگەن قاۋىمدى ەلدار ءورازاليننىڭ شىعارماشىلىعىمەن كەڭىنەن تانىستىرىپ ءوتتى.
- ەلدار كامەن ۇلى ورازالين اباي اۋدانىنىڭ قاراۋىل اۋىلىندا كورنەكتى جازۋشى كامەن ءورازاليننىڭ وتباسىندا دۇنيەگە كەلگەن, - دەدى مۋزەي ديرەكتورى بولات جۇنىسبەكوۆ,-1980 جىلى اباي اتىنداعى ورتا مەكتەپتى, 1986 جىلى سەمەيدىڭ پەداگوگيكالىق ينستيتۋتىن بىتىرگەن. اكە جولىن قۋىپ ادەبيەتكە ەرتە باستان قۇمارتقان البىرت اقىن ەڭبەك جولىن 1986 جىلى اباي اتىنداعى ورتا مەكتەپتە مۇعالىمدىك قىزمەتتەن باستاعان. مەكتەپ جانىنان شىعاتىن «اباي ۇرپاقتارى» قولجازبا جۋرنالىنىڭ كوركەمدىك جەتەكشىسى بولىپ, 13 جىل بويى تابان اۋدارماي قىزمەت ەتكەن. جاس ۇرپاقتى ونەر مەن ءبىلىم جولىندا تاربيەلەۋدەگى جەمىستى ەڭبەگى ءۇشىن 1998 جىلى قازاقستان رەسپۋبليكاسى ءبىلىم مينيسترلىگىنىڭ «قۇرمەت گراموتاسىمەن» ماراپاتتالعان.
وسىلاي دەي كەلە بولات جۇنىسبەكوۆ ەلدار كامەن ۇلىنىڭ كەۋدەسىنە «اباي» مەدالىن تاقتى.
- ەلدار كامەن ۇلى بۇگىندە اباي اۋدانىنىڭ مادەنيەت جانە تىلدەردى دامىتۋ ءبولىمىنىڭ باسشىسى قىزمەتىن اسا ءبىر جاۋاپكەرشىلىكپەن جانە ابىرويمەن اتقارۋدا,-دەدى شەجىرەشى قارت, قالامگەر مولدابەك جانبولات ۇلى, - ەرتىس ءوڭىرى كومپوزيتورلار وداعىنىڭ مۇشەسى بولعانىنا دا 15 جىلداي ۋاقىت بولىپتى. اكەگە تارتىپ تۋعان تالانتتى ۇل, كامەن ورازالين سياقتى شىڭعىستاۋ ەلىنىڭ مارتەبەسىن ارتتىرىپ جۇرگەن جان. ەلدارعا ءاردايىم يگى جول, شىعارماشىلىق تابىس تىلەيمىن.
ابايدىڭ «جيدەباي-ءبورىلى» قورىق-مۋزەيىنىڭ قولداۋىمەن جارىق كورىپ وتىرعان ەلدار ءورازاليننىڭ «شىڭعىستاۋ» اتتى كىتابىنىڭ تۇساۋكەسەرىنە قالامىزداعى زيالى قاۋىم وكىلدەرى مەن اباي اۋدانىنىڭ ونەرپازدارى قاتىستى. كەشتە اباي اندەرى شىرقالۋمەن قاتار, ەلدار كامەن ۇلىنىڭ جىرلارى وقىلىپ, كونتسەرتتىك باعدارلاما قويىلدى.
راۋشان نۇعمانبەكوۆا