استانادا 3 مىڭنان استام شەتەل ازاماتتارى ەمحانالارعا تىركەلدى

«مىندەتتى الەۋمەتتىك مەديتسينالىق ساقتاندىرۋ تۋرالى» زاڭعا سايكەس, قازاقستان اۋماعىندا تۇرعىلىقتى تۇراتىن شەتەلدىكتەر مەن ازاماتتىعى جوق تۇلعالار ساقتاندىرۋ جۇيەسىندە قر ازاماتتارى سياقتى مىندەتتەر مەن قۇقىقتارعا يە. ياعني بۇل ازاماتتار مىندەتتى الەۋمەتتىك مەديتسينالىق ساقتاندىرۋ جۇيەسىنە قازاقستاندىقتارمەن بىردەي جارنا تولەۋگە مىندەتتى. جارنا تولەگەن سوڭ ولار مەديتسينالىق كومەك الۋعا قۇقىلى بولماق. سوندىقتان «شەتەل ازاماتتارى ءبىزدىڭ ەسەبىمىزدەن تەگىن ەمدەلەدى» دەگەن پىكىردەن قورقۋدىڭ ەشبىر قاجەتى جوق.

سونىمەن قاتار, ءمامس شەڭبەرىندەگى قۇقىقتار مەن مىندەتتەر ەلىمىزدە قر راتيفيكاتسيالاعان حالىقارالىق كەلىسىمدەر نەگىزىندە ۋاقىتشا تۇراتىن شەتەل ازاماتتارى مەن ولاردىڭ وتباسىلارىنا دا بەرىلگەن. ولاردىڭ قاتارىندا ەۋرازيالىق ەكونوميكالىق وداق شەڭبەرىندەگى جۇمىس كۇشىنىڭ ەركىن ءجۇرىپ-تۇرۋىنا قاتىستى نورما دا بار.

«قازاقستان وزگە مەملەكەتتەرمەن تىعىز ساياسي-ەكونوميكالىق بايلانىس ورناتقان مەملەكەت. سوندىقتان ءبىز حالىقارالىق كەلىسىم تالاپتارىن دا ورىنداۋعا مىندەتتىمىز. بىراق شەتەل ازاماتتارى كەپىلدەندىرىلگەن تەگىن مەديتسينالىق كومەك كولەمىنىڭ از عانا بولىگىن پايدالانا الادى. ناقتىراق ايتساق, بۇل ازاماتتار اينالاسىنا قاۋىپ توندىرەتىن اۋرۋلاردان تەگىن ەمدەلەدى», - دەيدى استانا قالاسى بويىنشا «الەۋمەتتىك مەديتسينالىق ساقتاندىرۋ قورى» كەاق فيليالىنىڭ ديرەكتورى نۇرلىبەك قابدىقاپاروۆ.

ال, اتالعان ساناتقا كىرمەيتىن وزگە شەتەلدىكتەر (مىسالى, قازاقستان اۋماعىنا ۆيزا ارقىلى نەمەسە جۇمىس ىستەۋگە كەلگەندەر) ءمامس جارناسىن تولەمەيدى. ولار ەل اۋماعىنا كىرمەس بۇرىن جەكە مەنشىك ساقتاندىرۋ ءپوليسىن ساتىپ الۋعا مىندەتتى.

وسىلايشا, قر اۋماعىندا تۇرعىلىقتى جانە ۋاقىتشا تۇراتىن, ەۋرازيالىق ەكونوميكالىق وداق تۋرالى كەلىسىمشارتقا مۇشە مەملەكەتتەردىڭ ازاماتتارى ءمامس جۇيەسىندە قر ازاماتتارىمەن بىردەي 2020-ءشى جىلدان باستاپ مەديتسينالىق كومەك الۋعا قۇقىلى. شەتەلدىكتەردىڭ ساقتاندىرۋ جارناسىن تولەپ, ەل ازاماتتارىمەن بىرگە مەديتسينالىق قىزمەتتەردى پايدالانۋ تاجىريبەسى بارلىق دامىعان ەلدەردە ورىن العان ءۇردىس.