استانادا مەديتسينالىق ۋنيۆەرسيتەت توڭىرەگىندەگى داۋعا قاتىسى بار ەكى كۇدىكتى انىقتالدى, - دەپ حابارلايدى كتك تەلەارناسى.
استانا مەديتسينالىق ۋنيۆەرسيتەتىنەن وقۋدان شىعىپ قالعان ستۋدەنتتەردىڭ ءبىرىنىڭ ايتۋىنشا, ۋنيۆەرسيتەت مەملەكەت گرانتىن پايدالانعانى ءۇشىن 5 ميلليون تەڭگە قارىزدى موينىنا ءىلىپ بەرگەن. بىراق ول وسى بىلىقتىڭ بارىنە ءبىلىم مەكەمەسىنىڭ ءوزىن ايىپتايدى.
"2017 جىلدىڭ قىركۇيەكتىڭ 26-سى كۇنى دەكاناتتان قوڭىراۋ شالىپ, IELTS سەرتيفيكات جالعان ەكەنىن ايتتى. بىراق قۇجات تاپسىرعان كەزدە قابىلداۋ كوميسسياسى قايدا قارادى؟ نەگە سول كەزدە جالعان ەكەنىن تەكسەرىپ, بىزگە ايتقان جوق", دەيدى ول.
رەزيدەنتۋرا عانا ەمەس, ميلليونداعان قارىزدى گرانتتا وقىعان قالعان 116 ماگيسترانت پەن دوكتورانتتاردىڭ ءبارى دە وتەۋ كەرەك.
"اي سايىن رەزيدەنتۋرا, ماگيستراتۋرا بويىنشا ءبىلىم الۋشىلارعا 61 561 شاكىرتاقى تولەنەدى. دوكتارانتۋرادا وقيتىن ءبىلىم الۋشىلارعا 81 998 تەڭگە شاكىرتاقى تولەنەدى. ودان بولەك, اي سايىن وقۋعا ماگيستراتۋراعا 65 مىڭ تەڭگە, رەزيدەنتۋرادا 67 مىڭ تەڭگە جانە دوكتارانتۋرادا 120 مىڭ تەڭگە تۇرادى", - دەيدى جوعارعى وقۋ ورنىنان كەيىنگى ءبىلىم بەرۋ دەكانى ەرنار تۇرسىنبەت.
ال پوليتسيا بۇل بىلىققا قاتىستى ەكى كۇدىكتىنى انىقتاپتى. بۇلاردىڭ اراسىندا مەديتسينالىق ۋنيۆەرسيتەتتىڭ وقىتۋشىلارى دا بولۋى ابدەن مۇمكىن. ويتكەنى, ۋنيۆەرسيتەتتىڭ ماگيستراتۋراسىنا تۇسۋگە كومەكتەسەتىندەرىن ايتىپ, تالاپكەرلەرگە وزدەرى حابارلاسقان. ال وقۋ ورنى باسشىلارى بۇل جايتتان حابارى جوق ەكەنىن ايتىپ وتىر. ء"بىر ايەل دەپ ايتتى. ول قانداي ايەل, نەعىلعان ايەل؟ بىرەۋلەرى كوشەدە جولىقتىردىم دەيدى, بىرەۋلەرىنە وزدەرى حابارلاسقان. مەنىڭ ويىمشا, ستۋدەنتتەر ءبارىن اشىپ ايتپاي وتىر", - دەيدى استانا مەديتسينالىق ۋنيۆەرسيتەتىنىڭ رەكتورى ءماجيت شايداروۆ.
ازىرگە استانا قالاسىنىڭ ىشكى ىستەر دەپارتامەنتى تەرگەۋ قۇپيالىعىنا بايلانىستى كۇدىكتىلەردىڭ ەسىمدەرىن اتاعان جوق.
ايتا كەتەيىك, ءبىلىم جانە عىلىم مينيسترلىگى 117 ستۋدەنتتىڭ جالعان قۇجاتپەن وقۋعا تۇسكەنىن انىقتاعان. ولاردىڭ ۋنيۆەرسيتەتكە تاپسىرعان اعىلشىن تىلىنەن حالىقارالىق IELTS سەرتيفيكاتتارى جالعان بولىپ شىققان.