بۇگىن «ادامي رەسۋرستاردى باسقارۋ: بولاشاق ۇيىمى» تاقىرىبىن ارقاۋ ەتكەن XIII حالىقارالىق HR-كونفەرەنتسياسى ءوز جۇمىسىن باستادى. شارانىڭ رەسمي بولىمىندە «سامۇرىق-قازىنا» اق باسقارما توراعاسى احمەتجان ەسىموۆ حولدينگتىڭ جاڭا كادرلىق ساياساتىن تانىستىردى, دەپ حابارلايدى كومپانيانىڭ ءباسپاسوز قىزمەتى.
«بىرىنشىدەن, ءبىز باسقارۋشى دەڭگەيدەگى قىزمەتكەرلەردىڭ سانىن قىسقارتىپ, شاعىن ءارى ءتيىمدى باسقارۋ قۇرىلىمىن بەكىتتىك. بۇل شۇعىل تۇردە شەشىم قابىلداۋعا مۇمكىندىك بەرەدى, ياعني كەلىسىم بەرۋ پروتسەدۋرالارىنا جۇمسالاتىن ۋاقىتتى ەداۋىر ازايتادى. ەكىنشىدەن, بارلىق قورجىن كومپانيالاردا جۇمىسقا قابىلداۋ كەزىندە, كونديداتتاردى ىرىكتەۋدىڭ اشىقتىعىن قامتاماسىز ەتەتىن كونكۋرستىق ىرىكتەۋدىڭ بىرىڭعاي جۇيەسى ەنگىزىلەتىن بولادى», - دەدى «سامۇرىق-قازىنا» اق باسقارما توراعاسى احمەتجان ەسىموۆ.
سونداي-اق, ا.ەسىموۆ باسقارۋشى لاۋازىمىنا تاعايىنداۋدىڭ ساباقتاستىق قاعيداتتارى قابىلداناتىنىن ايتتى. ناتيجەسىندە, كومپانيا قىزمەتكەرلەرى اراسىنان بىلىكتى كادرلىق رەزەرۆى قالىپتاسادى. باسقارما توراعاسى شەتەلدىك مامانداردى جۇمىلدىرۋ ماسەلەسىنە دە توقتالدى. «سامۇرىق-قازىنا» شەتەلدەن كەلگەن ازاماتتاردىڭ قىزمەتىنەن تولىقتاي باس تارتپايدى, دەگەنمەن ولاردىڭ ورنىن باساتىن مامانداردى دايىنداۋ - باستى نازاردا: باسىمدىلىق جەرگىلىكتى ازاماتتارعا بەرىلەدى.
ۇلتتىق ءال-اۋقات قورىنىڭ باسقارما توراعاسى ساتىپ الۋ سالاسىنا ۇلكەن ءمان بەرىلەتىنىن ايتتى. ماسەلەن, ءدال وسى باعىتتا بوس ورىن قاراستىرۋشىلاردى پوليگراف كومەگىمەن تەستىلەۋدەن وتكىزۋ مۇمكىندىگى قاراستىرىلۋدا.
احمەتجان ەسىموۆ «سامۇرىق-قازىنا» كورپوراتيۆتىك ۋنيۆەرسيتەتىنە 1 جانە 2 دەڭگەيدەگى باسشىلار ءۇشىن كوشباسشىلىقتىڭ مىندەتتى باعدارلاماسىن ازىرلەۋدى جانە ەندىرۋدى, كومپانيا قىزمەتكەرلەرىنە تسيفرلىق داعدىلاردى مەڭگەرتۋدى جانە كۇندەلىكتى HR-وپەراتسيالاردى جالپى قىزمەت كورسەتۋ ورتالىعى ارقىلى ورىنداپ, تسيفرلىق فورماتقا كوشىرۋدى تاپسىردى.
اتالعان كونفەرەنتسيا بارىسىندا ۇلتتىق, كۆازيمەملەكەتتىك كومپانيالاردىڭ جانە باسقا مەكەمەلەردىڭ باسشىلارى ءسوز سويلەدى: قر پرەزيدەنتى اكىمشىلىگى مەملەكەتتىك قىزمەت جانە كادر ساياساتى ءبولىمىنىڭ مەڭگەرۋشىسى مارات داۋەشوۆ, «قازاقستان» رترك اق باسقارما توراعاسى ەرلان قارين, قازۇوۋ رەكتورى, قازاقستاننىڭ حالىق ءارتىسى ايمان مۇساحودجاەۆا.
سونىمەن بىرگە, ءىس-شارا باعدارلاماسىندا الەمگە ايگىلى عالىم جانە زەرتتەۋشى روبەرت كۋينن (اقش) (كورپوراتيۆتى مادەنيەتكە دياگنوستيكا جۇرگىزۋ ادىستەمەسىنىڭ اۆتورى); پرەمەر-ليگا (FIFA) سپورتشىلارىنىڭ تۇلعالىق دامۋى بويىنشا كەڭەسشىسى جانە كوۋچى ەندي بارتون ( ۇلىبريتانيا); Microsoft قىزمەتكەرلەرىن دايارلاۋ قىزمەتىنىڭ جەتەكشىسى كسەنيا پلەتنەر (رەسەي) سەكىلدى دۇنيەجۇزىنە بەلگىلى شەتەلدىك سپيكەرلەردىڭ باياندامالارى جوسپارلانعان. سونىمەن بىرگە HR-قاۋىمداستىعىنىڭ كەڭەيتىلگەن وتىرىسى وتەدى.