بيىلعى وقۋ جىلىنان باستاپ ەلىمىزدەگى مەكتەپتەردىڭ 5-7 سىنىپ وقۋشىلارى جاڭارتىلعان ءبىلىم بەرۋ باعدارلاماسىمەن وقىپ جاتقانى بەلگىلى.
ارينە اتى ايتىپ تۇرعانداي, جاڭا باعدارلامانى وقىتۋ ءۇشىن جاڭا, زاماناۋي وقۋلىقتار مەن كورنەكىلىك قۇرالدارىنىڭ قاجەتتىگى ايتپاسا دا تۇسىنىكتى. كورنەكىلىك قۇرالدار دەمەكشى, جاقىندا وبلىس اكىمى دانيال احمەتوۆ جۇمىس ساپارىمەن تارباعاتاي اۋدانىنا بارىپ, سونداعى شوقان ءۋاليحانوۆ اتىنداعى مەكتەپتى ارالاۋ بارىسىندا بيولوگيا ءپانى كابينەتىندەگى 80-جىلدارداعى, كەڭەستىك زاماندى ەسكە سالاتىن كورنەكىلىك قۇرالدارىنا كوزى ءتۇسىپ: «بيىل وبلىس قازىناسىنان ءبىلىم سالاسىنا عانا 106 ميلليارد تەڭگە قارجى ءبولىندى.
بۇل – جەرگىلىكتى بيۋدجەتتىڭ ۇشتەن ءبىر بولىگى. ال مەكتەپتەردەگى وقۋ قۇرال-جابدىقتارىنىڭ ءتۇرى مىناۋ. جاۋاپتى تۇلعالارعا تەز ارادا قاراجاتتىڭ جۇمسالۋىنا كەشەندى تەكسەرۋ جۇرگىزۋدى تاپسىرامىن», دەگەن-ءدى. ارينە مۇنداي كورنەكىلىكتەر جالعىز تارباعاتاي اۋدانىندا عانا ەمەس, وبلىستىڭ وزگە اۋداندارىنداعى مەكتەپتەردە دە بولۋى ابدەن مۇمكىن. تەكسەرۋ بارىسىندا ايقىندالا جاتار. ەگەر وعان دەيىن وڭىردەگى مەكتەپتەر «اش پالەدەن قاش پالە» دەپ وزدەرىندە بار كورنەكىلىكتەردەن قۇتىلىپ ۇلگەرمەسە.
تارباعاتايدىڭ اتالعان مەكتەبىندە كورنەكىلىك قۇرالدارى عانا ەمەس, ءبىلىم ورداسىنىڭ ءوزىنىڭ دە توزىعى جەتىپ تۇر. ايماق باسشىسى بۇل وقۋ وشاعىنا اۋەلى كەشەندى تەكسەرۋ جۇرگىزىلەتىنىن, سودان كەيىن عيماراتقا جوندەۋ جۇمىستارى جاسالاتىنىن جەتكىزدى. رەتى كەلگەندە ايتا كەتەيىك, قازىر اۋداننىڭ اقجار اۋىلىندا 600 ورىندىق مەكتەپ پەن 300 ورىندىق ينتەرنات سالىنىپ جاتىر. بۇل نىساندار الداعى وقۋ جىلىندا قولدانىسقا بەرىلۋى ءتيىس.
ازامات قاسىم, «ەگەمەن قازاقستان»
شىعىس قازاقستان وبلىسى