تارباعاتاي تاۋىنىڭ ەڭ بيىك شىڭدارىنىڭ ءبىرى «اقپەرلى شىڭى» دەپ اتالادى. قاي جىلى تۋىپ, قاشان قايتىس بولعانى بەيمالىم اقپەرلى دەگەن كىسىنىڭ بويىندا كورىپكەلدىك قاسيەت بولعان دەسەدى.
دۇنيەدەن وتەرىندە: «مەن سەندەرگە نايزاعاي جارقىلداتىپ, كۇن كۇركىرەتىپ مازا بەرمەيمىن عوي. مەنى ەتەككە جەرلەمەڭدەر. تارباعاتايدىڭ ەڭ بيىك شىڭىنا اپارىپ قويىڭدار» دەپ امانات قالدىرىپتى ۇرپاقتارىنا. جەرگىلىكتى جۇرتتىڭ ايتۋىنشا, «اقپەرلى» شىڭىنىڭ باسىنا بۇلت ۇيىرىلسە, مىندەتتى تۇردە كۇن كۇركىرەپ, جاڭبىر جاۋادى ەكەن. سول ماڭنان مال ايداپ وتكەن ادامدار دۇعا قىلماي, مالدارى قىرىلىپ قالعان جاعدايلار دا بولىپتى.
جاقىندا ءۇرجار اۋدانىنىڭ بەستەرەك اۋىلى ماڭىندا ءومىرى زەرتتەپ-زەردەلەۋدى قاجەت ەتەتىن وسىناۋ جۇمباق تۇلعانىڭ قۇرمەتىنە «اقپەرلى» دەپ اتالاتىن بايگە الاڭى سالتاناتتى تۇردە اشىلدى. «اۋدانىمىزدا ۇلتتىق سپورت تۇرلەرى كەڭ قانات جايىپ كەلەدى. جىل باسىندا رەسپۋبليكالىق بۇركىتشىلەر سايىسى دا وسى بەستەرەك اۋىلىندا وتكەنى بەلگىلى. قولدارىنان ۇيالى تەلەفوندارىن تاستامايتىن بۇگىنگى جاستار ءبىر ۋاق تازا اۋادا سەرۋەندەپ, اتقا مىنسە دەگەن نيەتپەن اشىپ جاتىرمىز بۇل بايگە الاڭىن», دەيدى ءىس-شارانى ۇيىمداستىرۋشىلاردىڭ ءبىرى سايات بايقاداموۆ.
قارلى شىڭدارى مەنمۇندالاپ الىستان كوزگە تۇسەتىن تارباعاتاي تاۋى باۋرايىنداعى بايگە الاڭىنىڭ ءبىر اينالىمى - ءۇش شاقىرىم. بۇل كۇنى بايگە الاڭىنىڭ اشىلۋ قۇرمەتىنە وراي تاي, قۇنان, ات جارىسى ۇيىمداستىرىلىپ, جينالعان جۇرتتى ءبىر سەرپىلتىپ تاستادى.
ازامات قاسىم, «ەگەمەن قازاقستان»
شىعىس قازاقستان وبلىسى,
ءۇرجار اۋدانى,
بەستەرەك اۋىلى