تىسقاققان «ليۆەرپۋل» مەن مىنەزدى «روما»

تاريحتىڭ قاتپار-قاتپارىنان ارشىپ العان ءبىر ستاتيستيكاعا جول بەرسەك. ءدال سول 1984 جىلى «روما» چەمپيوندار ليگاسىنىڭ فينالىنا شىققان كەزدە پەنالتي سەرياسىنان جەڭىلىپ قالىپ ەدى. جەڭىمپاز كوماندا ءدال وسى – «ليۆەرپۋل». مىنە, سودان بەرى «روما» الەمدەگى كلۋبتىق دەڭگەيدەگى ەڭ ءىرى تۋرنيردە قايتادان بريتاندىقتارمەن كەزدەسكەلى تۇر.

قوس ۇجىم ەۋروكۋبوكتاردا 5 مارتە كەزدەسكەن ەكەن. سونىڭ قوس ماتچتان تۇراتىن تەكەتىرەسىندە «ليۆەرپۋل» جەڭىمپاز اتانىپ, كەلەسى اينالىمعا ءوتىپتى. ول عاسىرلار توعىسىندا وتكەن 2000 جىلعى ۋەفا كۋبوگى جارىسى ەدى. مەرسيسايدتىقتار «وليمپيكو» ستاديونىندا وتكەن العاشقى ويىندا 2:0 ەسەبىمەن جەڭىسكە جەتتى. سىرتتاعى ويىندا ەكى گول سوققان مايكل وۋەن, جا­ۋاپتى ويىن الدىندا ۇلكەن باسىمدىلىق جاسادى. الايدا جاۋاپتى ويىندا كەرىسىنشە «روما» جەڭىسكە جەتتى. بىراق يتاليالىقتاردىڭ سوققان جالعىز گولى كەلەسى كەزەڭگە وتۋگە مۇمكىندىك بەرگەن جوق. سول جىلى ۋەفا كۋبوگىن «ليۆەرپۋل» جەڭدى.

سونىمەن قاتار بۇل ەكى ۇجىم 2001/2002 جىلعى چەمپيوندار ليگا­سىنىڭ توپتىق كەزەڭىندە ءبىر توپقا تۇس­كەن. ريمدەگى العاشقى ويىندا تابلوداعى كورسەتكىش ەش وزگەرمەي, ەسەپ 0:0 بولسا, «ەنفيلدتەگى» ماتچتا اعىلشىندار 2:0 ۇتقان. الدىمەن ياري ليتمانەن پەنالتيمەن ەسەپ اشسا, ەميل حەسكي ەكىنشى گولدى سوققان.

2016 جىلى «روما» مەن «ليۆەرپۋل» اقش-تىڭ سەنت-لۋيس قالاسىندا جول­داستىق كەزدەسۋ وتكىزىپتى. وندا يتاليا­لىق­تار 2:1 ەسەبىمەن جەڭگەن. سول ويىندا ءبىر قىزىعى ەدين دجەكودان كەيىن, ەكىنشى گولدى «ليۆەردىڭ» قازىرگى ليدەرى موحامەد سالاح سوققان.

جالپى العاندا, چەمپيوندار ليگا­سى­نىڭ جارتىلاي فينالىندا «ليۆەرپۋل» «رو­ماعا» قاراعاندا كوپ ويناعان. 9 مار­تە جارتىلاي فينالدا ويناپ, سونىڭ تەك ەكەۋىندە عانا فينالعا وتە الماعان. سوڭ­عى ءۇش جارتىلاي فينالدىڭ ۇشەۋىندە دە «لي­ۆەرپۋل» وتانداس كوماندا «چەلسي­مەن» كەزدەسىپتى. ءۇش ويىننىڭ ەكەۋىندە في­نالعا ءوتىپ, تەك بىرەۋىندە عانا «اقسۇيەك­تەرگە» جول بەرگەن.

«رومانىڭ» ءبىر ەرەكشەلىگى, العاشقى كەزدەسۋدە جەڭىلىپ قالسا دا, مىنەز كورسەتىپ كەلەسى اينالىمعا وتە الاتىندىعىندا. بيىلعى پلەي-وفف كەزەڭدەرىندە ول وسىنداي جىگەردى ءبىر ەمەس, ەكى رەت كورسەتتى. ال­دىمەن دونەتسكىنىڭ «شاحتەرىن», ودان كەيىن اتاقتى «بارسەلونانى» اينالىپ ءوتتى. ال قازىر وسى ويىن الدىندا بۋك­مە­كەرلىك كەڭسەلەر كەلەسى كەزەڭگە سەنىمدى تۇردە «ليۆەرپۋل» وتەدى دەپ وتىر. ويىن استانا ۋاقىتىمەن 00:45-تە باستالادى.

ەرمۇحامەد ماۋلەن, «ەگەمەن قازاقستان»