بۇۇ باس حاتشىسى انتونيۋ گۋتەرريش گەرمانيانىڭ SVT ارناسىنا بەرگەن سۇحباتىندا سيرياعا قاتىستى ءوز پىكىرىمەن ءبولىسىپ, ونداعى جاعدايدى تۇراقتاندىرۋ قيىن ماسەلە ەكەنىن مالىمدەدى.
باس حاتشىنىڭ ايتۋىنشا, سيرياداعى احۋالدى تولىقتاي شەشۋ جالعىز بۇۇ-نىڭ قولىنان كەلەتىن شارۋا ەمەس. ول اسىرەسە, بۇۇ قاۋىپسىزدىك كەڭەسى ورتاق شەشىمگە كەلە الماي جاتقاندا جاعدايدىڭ قيىنداپ كەتكەنىن ايتىپ ءوتتى.
«سيريادا الەمنىڭ تۇكپىر-تۇكپىرىنەن كەلگەن ءتۇرلى اسكەري توپتار ارەكەت ەتىپ جاتىر. وندا مۇددەلەر توعىسىپ, قىرعي-قاباق سوعىستىڭ ءورتى تۇتاندى. شەيىتتەر مەن سۇننيتتەر قىرقىسىپ, ايماقتى بولىكتەرگە ءبولىپ تاستادى. بۇۇ-نىڭ تاڭعاجايىپ جولمەن بۇكىل ماسەلەنى شەشىپ تاستاۋىنا سەنۋ تىم اڭعىرتتىق بولار ەدى», دەدى ا.گۋتەرريش.
سونىمەن قاتار بۇۇ باس حاتشىسى تاياۋدا اقش تاراپى سيرياعا جاساعان اۋە شابۋىلى جونىندە دە ءوز پىكىرىن ءبىلدىرىپ, قىرعي-قاباق سوعىستىڭ قايتا باستالعانىن, الايدا قازىرگى جاعدايدىڭ بۇرىنعىدان وزگەشە ەكەنىن ايتىپ وتكەن.
«بۇرىن شيەلەنىس اقش پەن كسرو اراسىندا بولعان ەدى. قازىرگى تاڭدا اقش پەن رەسەي بۇرىنعىداي ءبارىن باقىلاۋدا ۇستاي المايدى. تۇركيا, يران, ساۋد ارابياسى سەكىلدى كوپتەگەن ەلدەر ايماقتا بەلسەندىلىك تانىتىپ جاتىر. قىرعي-قاباق سوعىسى كەزىندە كەلىسسوز جۇرگىزۋگە, باقىلاۋعا جانە بايلانىس ورناتۋعا, ءتىپتى وقيعا شيەلەنىسىپ كەتكەندە دە ونى شەكتەن شىعارماۋعا مۇمكىندىك بولاتىن. قازىر ونداي قۇرال جوق. سوندىقتان ونداعى احۋال تىم كۇردەلى», دەدى ا.گۋتەرريش.
دەگەنمەن باس حاتشى سيرياداعى احۋالدىڭ تۇراقتانۋىنان ءالى ءۇمىتتى ەكەنىن جەتكىزدى. ونىڭ پايىمداۋىنشا, الداعى ۋاقىتتا ايماقتاعى تۇيتكىلدىڭ شەشىمى تابىلۋى ءتيىس. الەمدە بەيبىتشىلىك پەن قاۋىپسىزدىك ورناتۋ ءۇشىن بارلىق تاراپ ورتاق كەلىسىمگە كەلۋى قاجەت. سونداي-اق ا.گۋتەرريش بۇۇ قاۋىپسىزدىك كەڭەسىندەگى كەلىسپەۋشىلىككە نارازى ەكەنىن اتاپ ءوتتى.
اۋعانستاندا قايتىس بولعاندار سانى 63-كە جەتتى
اۋعانستان استاناسى كابۋلداعى جانە باعلان پروۆينتسياسىنداعى تەرروريستىك شابۋىلدان قايتىس بولعاندار سانى ارتىپ كەلەدى.
داۋىس بەرۋ ۋچاسكەلەرىندەگى جارىلىستان قازا تاپقاندار سانى 63-كە جۋىقتاپ, جۇزدەگەن ادام جاراقات العان. اۋەلى كابۋلدەگى كۋالىك بەرۋ مەكەمەسىندە جانكەشتى وزىندەگى بومبانى جارىپ جىبەرگەن. سونىڭ سالدارىنان 57 ادام مەرت بولعان. كەيىنىرەك باعلان پروۆينتسياسىندا بومبا تيەلگەن جۇك كولىگى داۋىس بەرۋ ۋچاسكەسىنە بارىپ سوعىلعان. وندا قايتىس بولعاندار سانى التىعا جەتىپتى.
Al Jazeera ارناسىنىڭ مالىمەتىنە سۇيەنسەك, يليم/دايش ۇيىمى كابۋلداعى تەرروريستىك شابۋىلدى ءوز موينىنا العان. ازىرگە باعلانداعى وقيعانى كىم ۇيىمداستىرعانى بەلگىسىز. ارنانىڭ حابارلاۋىنشا, كابۋلداعى جارىلىس كەزىندە كوپتەگەن بالالار مەن ايەلدەر قازا تاپقان كورىنەدى.
Associated Press اگەنتتىگىنە سۇحبات بەرگەن قوعامدىق دەنساۋلىق ءمينيسترىنىڭ وكىلى ۆاحيد مادجرونىڭ ايتۋىنشا, وقيعا ورنىندا 21 ايەل, 5 بالا مەرت بولعان. ول قازا تاپقاندار سانى كوبەيۋى دە مۇمكىن ەكەنىن جەتكىزدى.
ايتا كەتۋ كەرەك, بيىلعى قازاندا اۋعانستاندا پارلامەنتتىك سايلاۋ وتەدى. كابۋلداعى جارىلىس – داۋىس بەرۋگە قارسى جاسالىپ وتىرعان ءتورتىنشى شابۋىل.
ارمەنيا پرەمەر-ءمينيسترى وتستاۆكاعا كەتتى
ارمەنيا پرەمەر-ءمينيسترى سەرج سارگسيان ەلدەگى بىرنەشە كۇنگە سوزىلعان نارازىلىق شەرۋىنەن كەيىن قىزمەتتەن كەتتى. بۇل تۋرالى پرەمەر-ءمينيستردىڭ رەسمي سايتى مالىمدەدى.
«نيكول پاشينياندىكى (قارسىلىق اكتسياسىنىڭ جەتەكشىسى رەد.) دۇرىس, مەنىكى قاتە بولدى. بولعان وقيعادان شىعاتىن بىرنەشە جول بار, الايدا مەن ونىڭ بىردە-بىرىنە بارمايمىن. بۇل ماعان لايىق ەمەس. مەن مەملەكەت باسشىسى قىزمەتىنەن, ياعني پرەمەر-مينيسترلىكتەن باس تارتامىن. سىزدەردىڭ تالاپتارىڭىزدى ورىندايمىن. ەلىمىزگە بەيبىتشىلىك تىلەيمىن», دەلىنگەن سايتتا جاريالانعان مالىمدەمەدە.
تاياۋدا س.سارگسيان پرەمەر-مينيستر بولىپ سايلانعان ەدى. بۇل شەشىمگە كەلىسپەگەن حالىق جاپپاي كوشەگە شىعىپ, نارازىلىعىن ءبىلدىردى. ولار ەل استاناسى ەرەۆاننىڭ ورتالىعىنا جينالىپ, ۇكىمەت عيماراتتارىنا كىرۋگە كەدەرگى جاساعان ەدى.
جەكسەنبى كۇنى وپپوزيتسيانىڭ تالابىمەن ەرەۆاندا س.سارگسيان جانە نيكول پاشينيان اراسىندا كەلىسسوزدەر جۇرگىزىلگەن بولاتىن. سول كۇنى ن.پاشينيان باستاعان بىرقاتار وپپوزيتسيا وكىلدەرى تۇتقىنعا الىندى. الايدا دۇيسەنبى كۇنى ولار بوساتىلدى.
2015 جىلى ارمەنيادا كونستيتۋتسياعا وزگەرىستەر ەنگىزىلىپ, ەل باسقارۋ پرەزيدەنتتىك بيلىكتەن پارلامەنتتىك جۇيەگە اۋىسقان بولاتىن. سوعان سايكەس, پرەمەر-مينيستر ەل تىزگىنىن ۇستايدى.
ايتا كەتۋ كەرەك, س.سارگسيان ارمەنيانىڭ پرەزيدەنتى قىزمەتىن 2008-2018 جىلدارى اتقاردى. ال جاقىندا وتكەن سايلاۋدا ەل پرەزيدەنتى بولىپ ارمەن ساركيسيان تاعايىندالدى.
شولۋدى ازىرلەگەن
اباي اسانكەلدى ۇلى, «ەگەمەن قازاقستان»