استانا قالاسىنا جۇمىس ساپارىمەن رەسەي فەدەراتسياسى ۇلتتىق ۇلانى اسكەرى فەدەرالدى قىزمەتى ديرەكتورىنىڭ – رف ۇلتتىق ۇلانى اسكەرى باس قولباسشىسىنىڭ ورىنباسارى گەنەرال-پولكوۆنيك سەرگەي زاحاركين باستاعان دەلەگاتسيا كەلدى.
اسكەري دەلەگاتسيا وكىلدەرىن ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ قارسى الىپ, ەكىجاقتى كەزدەسۋ اياسىندا تاراپتار اراسىنداعى ءوزارا ىنتىماقتاستىقتى تەرەڭدەتۋگە باعىتتالعان ارىپتەستىك تۋراسىندا اڭگىمە ءوربىدى. سونداي-اق رەسەيلىك ماماندار ساپار اياسىندا ۇلتتىق ۇلاننىڭ قۇرىلىمى مەن دامۋ باسىمدىقتارى جانە تاپسىرمالاردى ورىنداۋ مۇمكىندىكتەرىمەن تانىستى.
ال ورايى كەلگەندە ءوز پىكىرىن بىلدىرگەن سەرگەي زاحاركين رەسەي ۇلتتىق ۇلان اسكەرى فەدەرالدى قىزمەتىنە قازاقستاندىق ارىپتەستەرىمەن تاجىريبە الماسۋ ماڭىزدى ەكەنىن تىلگە تيەك ەتتى.
«بۇل ءبىزدىڭ اسكەرىمىزگە جۇرگىزىلگەن رەفورمادان كەيىنگى قازاقستانعا جاساعان العاشقى ساپارىمىز. وزدەرىڭىز بىلەتىندەي, رەسەي فەدەراتسياسىنىڭ ىشكى اسكەرى 2016 جىلدان باستاپ رەسەي فەدەراتسياسى ۇلتتىق ۇلان اسكەرى فەدەرالدى قىزمەتى بولىپ قايتا قۇرىلدى. رەسەي مەن قازاقستان ۇلاندارىنىڭ تاپسىرمالار ورىنداۋداعى كەيبىر سالالارىندا عانا ايىرماشىلىق بولماسا, نەگىزىنەن قىزمەت ءتۇرى بىردەي», – دەدى ول.
سونىمەن قاتار س.زاحاركين رەسەي ۇلتتىق ۇلانى رەفورمالانعاننان كەيىن ەكسترەميزم مەن تەرروريزمگە كۇرەس جۇرگىزۋ باعىتتارى كەڭەيگەندىگىن اتاپ ءوتتى.
ال ر.جاقسىلىقوۆ بولسا, قوعامعا تونەتىن قاۋىپ-قاتەر تۇرلەرىنىڭ دە كۇشەيۋى ىرگەلەس ەلدەردى ءوزارا ىنتىماقتاستىققا ۇندەيتىنىن جەتكىزدى.
«وسى ورايدا, ەكىجاقتى تاجىريبە الماسۋدىڭ ماڭىزى زور ەكەنى ءسوزسىز. ءبىز وسى كەزگە دەيىن دە بىرنەشە رەت بىرلەسكەن وقۋ-جاتتىعۋلار وتكىزدىك. ونىڭ ءبىرى – وتكەن جىلى ۇيىمداستىرىلعان «نەرۋشيموە براتستۆو-2017» وقۋ-جاتتىعۋ شاراسى. ال بيىل قازاقستان «كوبالت-2018» وقۋ-جاتتىعۋ جيىنىن وتكىزۋدى مىندەتىنە الىپ وتىر. بولاشاقتا جۇزەگە اسىراتىن بىرلەسكەن ماقسات-مىندەتتەرىمىز دە از ەمەس. سوندىقتان دا ءبىز ارقاشان دا تىعىز قارىم-قاتىناسىمىزدى ودان سايىن تەرەڭدەتۋگە دايىنبىز دەپ ايتقىم كەلەدى», دەدى گەنەرال-لەيتەنانت ر.جاقسىلىقوۆ.
كەزدەسۋ اياسىندا الداعى مامىر ايىندا الماتى وبلىسىندا وتەتىن ۇقشۇ (ۇجىمدىق قاۋىپسىزدىك شارت ۇيىمى) جاۇك (جەدەل ارەكەت ەتۋ ۇجىمدىق كۇشتەرى) «كوبالت-2018» وقۋ-جاتتىعۋلارىن وتكىزۋ ماسەلەسى دە تالقىلاندى. ءسويتىپ ءوزارا قۇرمەت نەگىزىندەگى تىعىز بايلانىس پەن كەڭ كولەمدى ەكىجاقتى ىنتىماقتاستىقتى دامىتۋعا ۋاعدالاستى. اتاپ ايتقاندا, ولار اسكەري كادرلار دايارلاۋ مەن ماماندار بىلىكتىلىگىن ارتتىرۋ, ۆەدومستۆوارالىق قارىم-قاتىناستى قامتاماسىز ەتۋ مەن ۇيىمداستىرۋدا تاجىريبە الماسۋ, مادەني جانە سپورتتىق ىقپالداستىق ورناتۋعا نەگىزدەلگەن.
كەزدەسۋ سوڭىندا تاراپتار رف ۇلتتىق ۇلان اسكەرىنىڭ اسكەري وقۋ ورىندارىندا قازاقستان رەسپۋبليكاسى ۇلتتىق ۇلانى اسكەري قىزمەتشىلەرىن وقىتۋ تۋرالى كەلىسىمشارتقا قول قويدى. ەستەرىڭىزگە سالار بولساق, تاراپتار اراسىنداعى العاشقى كەلىسىمشارتقا 2009 جىلى قول قويىلىپ, سودان بەرى قازاقستاندىق اسكەري بايلانىسشىلار, كينولوگتەر, تەحنيكا ماماندارى رەسەيلىك اسكەري وقۋ ورىندارىندا ءبىلىم العان ەدى.
ساپار اياسىندا رەسەيلىك دەلەگاتسيا وكىلدەرى ۇلتتىق ۇلاننىڭ اسكەردى باسقارۋ ورتالىعىن ارالاپ, ۇلتتىق قورعانىس ۋنيۆەرسيتەتىندە بولدى. سونىمەن قاتار ۇلتتىق ۇلاننىڭ استانالىق جەدەل بريگاداسىندا بولىپ, اسكەري قالاشىقتىڭ ينفراقۇرىلىمى مەن تەحنيكا, قارۋ-جاراق ۇلگىلەرى جانە تاعى باسقا نىساندارىمەن تانىستى.
سەرىك ابدىبەك,
«ەگەمەن قازاقستان»