مەملەكەت باسشىسىنىڭ قازاقستان حالقىنا ارناعان بەس الەۋمەتتىك باستاماسى اتاپ كورسەتىلگەن ۇندەۋ قازاقستاندىقتاردى ءبىر سەرپىلتىپ تاستاعان بولاتىن. ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا اتاپ كورسەتىلگەن مىندەتتەردى ورىنداۋدا بۇل ۇندەۋدىڭ الاتىن ورنى ەرەكشە دەپ ويلايمىن.
سەبەبى وسى جولداۋدا اتاپ كورسەتىلگەندەي, تاۋەلسىز قازاقستاننىڭ باستى بايلىعى ادام كاپيتالى ەكەنى راس. ياعني, جولداۋدا بەلگىلەنگەن ەل ەكونوميكاسى دامۋىنىڭ 10 ستراتەگيالىق مىندەتىن جۇزەگە اسىراتىن قازاقستان ازاماتتارى ەكەندىگىن ەسكەرسەك, رەسپۋبليكا تۇرعىندارىنىڭ الەۋمەتتىك ماسەلەلەرىن شەشۋدى جەڭىلدەتۋگە باعىتتالعان بۇل ۇندەۋدىڭ ماڭىزى ەسەلەپ ارتا تۇسەرى انىق.
سونداي-اق ۇندەۋدە «جۇمىس ىستەيتىن ءاربىر ادام نەسيەگە پاتەر ساتىپ الىپ, ونى وتباسىلىق بيۋدجەتىنىڭ مۇمكىندىكتەرى اياسىندا تولەي الاتىنداي بولۋى ءۇشىن ارزان رەسۋرستار ۇسىناتىن تەتىكتەر قاجەت. سوندىقتان مەن «7 – 20 – 25» باعدارلاماسىن ۇسىنامىن. جۇمىس ىستەيتىن ءاربىر قازاقستاندىق تومەندەگىدەي شارتتار بويىنشا تەڭگەمەن نەسيە الۋ مۇمكىندىگىنە يە بولادى. نەسيە ءوسىمىنىڭ مولشەرلەمەسى قازىرگىدەي 14-16 ەمەس, جىلىنا 7 پايىزدان اسپايتىن بولادى», دەپ ناقتىلانۋىن بالالارىمىز ءۇشىن, بولاشاق ۇرپاق ءۇشىن جاسالىپ جاتقان ۇلكەن اكەلىك قامقورلىق, تەڭدەسسىز تارتۋ دەپ تۇسىنگەن ابزال. تومەنگى پايىزبەن بەرىلەتىن يپوتەكالىق تۇرعىن ۇيلەر ەل جاستارىنىڭ باسپانا ماسەلەسىن ءبىرجولا شەشۋگە باعىتتالعان ماڭىزدى بەتبۇرىس دەپ ەسەپتەيمىن.
ۇندەۋدەگى «سالىستىرمالى تۇردە جالاقىسى تومەن قازاقستاندىقتاردى قولداۋ ءۇشىن 2019 جىلدىڭ 1 قاڭتارىنان باستاپ ولاردىڭ سالىق جۇكتەمەسىن 10 ەسەگە ازايتىپ, 1 پايىز عانا سالىق سالۋدى ۇسىنامىن. اي سايىن ەڭ تومەنگى ەسەپتىك كورسەتكىشتىڭ 25 ەسەلەنگەن كولەمىنەن از جالاقى الاتىندارعا سالىناتىن جەكە تابىس سالىعىن ازايتۋ ارقىلى ولاردىڭ سالىق جۇكتەمەسىن جەڭىلدەتۋ كەرەك. ال وسىلايشا سالىقتى ازايتۋدان شىعاتىن قارجى ولاردىڭ جالاقىسىن كوبەيتۋگە جۇمسالۋى قاجەت», دەگەن جولدار تۇرمىسى تومەن وتباسىلاردىڭ جاعدايىن جاقسارتۋعا, الەۋمەتتىك تەڭسىزدىكتى ازايتۋعا, تۇرعىنداردىڭ ءال-اۋقاتىن كوتەرۋگە باعىتتالعان وڭ شەشىم. مەنىڭشە, دەر كەزىندە قابىلدانعان وسى باعدارلاما قازاقستاندىقتاردىڭ تۇرمىسىن جاقسارتۋمەن بىرگە, ەلدەگى كەيبىر الەۋمەتتىك توپتاردىڭ اراسىندا ورىن الىپ جاتقان تەرىس تۇسىنىكتەردىڭ الدىن الۋعا سەپتەسەتىندىگى انىق.
ەڭ باستىسى, ستۋدەنتتەرگە ارناپ 75 مىڭ ورىندىق جاتاقحانالار سالۋ تۋرالى باستاما بۇقارا حالىق پەن جاستارىمىزدىڭ ۇلكەن ريزاشىلىق سەزىمىن تۋعىزدى. ۇندەۋدە ايتىلعان ۇسىنىستار جاستاردىڭ ەلىمىزدىڭ جانە شەتەلدەردىڭ جوو-دا تولىققاندى جانە تەگىن ءبىلىم الۋىنا جاڭا كوكجيەكتەر اشىپ وتىر دەپ تۇسىنەمىن.
بۇگىندە قازاقستان حالقىنىڭ ەداۋىر بولىگى ورتا جانە شاعىن كاسىپپەن اينالىسۋدا. نارىق زاڭدىلىعى دا وسىنى تالاپ ەتەدى. الەمدىك ەكونوميكالىق داعدارىس جاعدايىندا تۇرعىنداردىڭ ءوزىن-ءوزى ەڭبەكپەن قامتۋى ءۇشىن بۇل دا اسا ماڭىزدى ماسەلە. وسى ورايدا مەملەكەت باسشىسىنىڭ «2018 جىلى قوسىمشا 20 ميلليارد تەڭگە ءبولىپ, شاعىن نەسيەلەردىڭ جالپى سوماسىن 62 ميلليارد تەڭگەگە جەتكىزۋدى تاپسىرامىن», دەگەن باستاماسىن دەر كەزىندە كوتەرىلگەن وتە باعالى شەشىم رەتىندە باعالايمىن.
ۇندەۋدەگى ء«بىز قاراوزەك (قىزىلوردا وبلىسى) – جەزقازعان – قاراعاندى –تەمىرتاۋ – استانا باعىتىندا ماگيسترالدى گاز قۇبىرىن سالۋ جوباسىن جۇزەگە اسىرۋىمىز كەرەك», – دەگەن جولداردى وقىعاندا كەۋدەمىزدى ماقتانىش كەرنەدى. وسى ورايدا ءبىز, قىزىلوردالىقتار ەلىمىزدىڭ جۇرەگى – استاناعا كوپتەن بەرى جەتپەي تۇرعان كوگىلدىر وتىننىڭ قىزىلوردا وبلىسىنىڭ تەرريتورياسىنان تارتىلاتىندىعىنا شىن جۇرەكتەن قۋانعانىمىزدى جەتكىزگىمىز كەلەدى. مىنە, پرەزيدەنتتىڭ باستاماسىمەن «سىر – الاشتىڭ اناسى» دەگەن ءسوز شىندىققا اينالدى.
سەرىكباي قوسان,
قىزىلوردا وبلىستىق «رۋحاني جاڭعىرۋ» ورتالىعىنىڭ ءبولىم مەڭگەرۋشىسى