باس پروكۋرور قايرات قوجامجاروۆتىڭ توراعالىق ەتۋىمەن قىلمىستىق جازالاردىڭ ورىندالۋى كەزىندە زاڭنامانىڭ ساقتالۋى جانە «ەڭبەك» رەسپۋبليكالىق مەملەكەتتىك كاسىپورنىنىڭ قىزمەتىن تەكسەرۋ قورىتىندىلارى بويىنشا القا وتىرىسى ءوتتى.
وعان پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى, ىشكى ىستەر, دەنساۋلىق ساقتاۋ, ءدىن ىستەرى جانە ازاماتتىق قوعام, اقپارات جانە كوممۋنيكاتسيالار مينيسترلەرى, سونداي-اق مۇددەلى مەملەكەتتىك ورگاندار مەن اكىمدىكتەردىڭ وكىلدەرى قاتىستى.
مەملەكەت باسشىسىنىڭ تاپسىرمالارىن ورىنداۋ اياسىندا باس پروكۋرور قىلمىستىق پروتسەستى ىزگىلەندىرۋ مەن رەپرەسسيۆتىلىگىن ازايتۋ ماقساتىندا كەشەندى شارالاردىڭ قابىلدانعانىن اتاپ ءوتتى.
سونىڭ ناتيجەسىندە تاۋەلسىزدىك جىلدارىندا حالىقارالىق تۇرمە يندەكسى بويىنشا قازاقستان 3-تەن 73-ءشى ورىنعا كوتەرىلگەن. ەلدەگى جازاسىن وتەۋشىلەردىڭ سانى 100 مىڭنان 35 مىڭعا ازايىپ, 8 كولونيا جابىلعان.
ال قاۋىپسىزدىك كەڭەسىنىڭ حاتشىسى نۇرلان ەرمەكباەۆ پەنيتەنتسيارلىق جۇيەدەگى ورىن العان كەمشىلىكتەرگە جانە وندا ناقتى رەفورمالاردىڭ جۇرگىزىلۋى قاجەت ەكەنىنە نازار اۋداردى.
جۇرگىزىلگەن تالداۋ بويىنشا وتكەن جىلدارى سوتتالعاندار اراسىندا جاسالاتىن قىلمىس 44 پايىزعا ارتقان. جابىق مەكەمەلەردەگى جازاسىن وتەۋشىلەر اراسىندا ءوزارا قاقتىعىستار, رەجىمدى قاساقانا بۇزۋ جانە دەنەگە زاقىم كەلتىرۋ قىلمىستارى ءجيى ورىن العان.
سوتتالۋشىلاردىڭ اراسىنداعى ءولىم جاعدايلارىنىڭ ءوسۋى بايقالعان. سونداي-اق بۇگىندە تۇزەۋ مەكەمەلەرىندە مۇمكىندىگى شەكتەۋلى 756 ادام, ىسىك اۋرۋىنا شالدىققان 25 ادام جانە وزدىگىنەن ءجۇرىپ-تۇرا المايتىن 4 ادام قاماۋدا وتىر.
وسىعان وراي, باس پروكۋرور ىشكى ىستەر جانە دەنساۋلىق ساقتاۋ مينيسترلىكتەرىنە باس بوستاندىعىنان ايىرۋ ورىندارىنان مەرزىمدەرىنەن بۇرىن بوساتۋ ءۇشىن اۋرۋلار ءتىزىمىن قايتا قاراۋدى تاپسىردى.
ەڭبەك جانە الەۋمەتتىك قورعاۋ مينيسترىنە شامامەن 800 سوتتالعان-مۇگەدەك مەملەكەتتىك قولداۋمەن قامتاماسىز ەتۋ ۇسىنىلدى. سونىمەن قاتار قاماۋ ورىندارىنان بوساتىلعان ادامداردى ەڭبەكپەن تولىققاندى قامتۋ تەتىگىن ازىرلەۋ قاجەتتىلىگى ايتىلدى.
پروكۋرورلىق تەكسەرۋلەر ناتيجەسىندە سوتتالعانداردى ەڭبەكپەن قامتۋ جانە ماتەريالدىق-تەحنيكالىق قولداۋىن كورسەتۋگە تارتىلعان «ەڭبەك» مەكەمەسىنىڭ قىزمەتىندە مەملەكەتتىك ساتىپ الۋ تۋرالى زاڭدىلىقتىڭ جۇيەلى تۇردە بۇزىلۋى, لاۋازىمدى اسىرا پايدالانۋ, بيۋدجەت قارجىسىن جىمقىرۋ انىقتالدى.
سوڭعى 3 جىلدا سىبايلاس جەمقورلىق قىلمىستارىن جاساعانى ءۇشىن كاسىپورىننىڭ اقتوبە, شىعىس قازاقستان جانە باتىس قازاقستان وبلىستارىنداعى فيليالدارىنىڭ 5 باسشىسى سوتتالدى.
باس پروكۋرور جاۋاپتى لاۋازىمدى تۇلعالاردىڭ باياندامالارى مەن ەسەپتەرىن تالقىلاۋ قورىتىندىسى بويىنشا جازالاردى ورىنداۋ جۇيەسىن جەتىلدىرۋ قاجەتتىلىگىن اتاپ ءوتتى.