اتىراۋدا «ەمبىمۇنايگاز» اق باس كەڭسەسىندە كومپانيانىڭ باستاماسىمەن جانە اقپارات جانە كوممۋنيكاتسيالار مينيسترلىگى جانە ەنەرگەتيكا مينيسترلىگىنىڭ قولداۋىمەن مۇناي-گاز سالاسىنا ساندىق تەحنولوگيالاردى ەنگىزۋدىڭ وزەكتى ماسەلەلەرىنە ارنالعان حالىقارالىق فورۋم ءوتتى. فورۋمعا سالالىق مينيسترلىكتەر وكىلدەرى, ءىرى مۇناي-گاز كومپانيالارىنىڭ باسشىلارى مەن قىزمەتكەرلەرى, حالىقارالىق ساراپشىلار جانە IT سالاسىندا قىزمەت كورسەتەتىن كومپانيالاردىڭ وكىلدەرى, جالپى العاندا 200-دەن استام دەلەگات قاتىستى.
– «تسيفرلى قازاقستان» مەملەكەتتىك باعدارلاماسىنىڭ ءىس-شارالار تىزىمىنە ەنگەن «قازمۇنايگاز» بارلاۋ ءوندىرۋ» اق جۇزەگە اسىرىپ جاتقان «تسيفرلى كەن الاڭى» جانە «قازمۇنايگاز» ۇك» اق-تىڭ «جابدىقتارعا تەحنيكالىق قىزمەت كورسەتۋ جانە جوندەۋدىڭ اۆتوماتتاندىرىلعان جۇيەسىن ەنگىزۋ» جوبالارى مۇناي-گاز سالاسىنداعى نەگىزگى جوبالار بولىپ سانالادى, – دەپ باسا ايتتى ەنەرگەتيكا ۆيتسە-ءمينيسترى بولات اقشولاقوۆ.
ەستەرىڭىزگە سالا كەتەيىك, 2016 جىلعى اقپان ايىندا ەمگ بازاسىندا ۋاز كەڭ الاڭىندا «تسيفرلى كەن الاڭى» قاناتقاقتى جوباسى ىسكە قوسىلىپ, ءوز تيىمدىلىگىن دالەلدەدى. ەلەكتر ەنەرگياسىن قولدانۋ 35 پايىزعا ازايدى. ۇڭعىمالار قورىن پايدالانۋ كوەففيتسيەنتىن كوبەيتۋ ارقىلى قوسىمشا 1360 توننا مۇناي ءوندىرۋ قامتاماسىز ەتىلدى. جەراستى جوندەۋ جۇمىستارىنىڭ كولەمى ازايىپ, ءار ۇڭعىماداعى مۇناي ءوندىرۋ ەسەبى بىرىڭعايلاندى. جيناقتالعان تاجىريبەگە وراي «قازمۇنايگاز» بارلاۋ ءوندىرۋ» اق كومپانيالار توبىنا تاراتۋ ماقساتىندا بارلىق قور جانە مۇناي مەن گاز ءوندىرۋدىڭ 80 پايىزعا جۋىعى كەلەتىن بىرقاتار نەگىزگى كەن الاڭدارى ىرىكتەلدى. 2017 جىلى ەمگ-دا «تسيفرلى كەن الاڭى» تۇجىرىمداماسى پرورۆا كەن الاڭدارى توبىنا دا تاراتىلىپ, بيىلعى جىلى «جايىقمۇنايگاز» مگوب-ءنىڭ جاڭاتالاپ كەن ورنىنا ەنگىزىلۋدە.
– قازىرگى تاڭدا ءىرى مۇناي كومپانيالارىنىڭ بارلىعىندا دەرلىك ينتەللەكتۋالدى كەن الاڭى تۇجىرىمداماسىن ازىرلەپ, ەنگىزۋمەن اينالىساتىن بولىمشەلەرى بار. جالپى العاندا, الەمدىك مۇناي-گاز سالاسى ينتەللەكتۋالدى كەن الاڭدارىن قۇرۋعا الداعى 5 جىلدا 1 ملرد دوللاردان استام قاراجات جۇمساۋدى جوسپارلاپ وتىر. سوندىقتان ءبىز مەملەكەت پەن بيزنەس, IT سالاسىندا قىزمەت كورسەتەتىن كومپانيالار مەن مۇناي كومپانيالارىنىڭ اراسىندا اشىق پىكىر الماسۋ الاڭدارىن قالىپتاستىرۋ, مۇناي ءوندىرۋ سالاسىنداعى وزىق ساندىق تەحنولوگيالاردى تانىستىرۋ ماقساتىندا اتالعان فورۋمدى ۇيىمداستىرۋدى ءجون سانادىق, – دەپ اتاپ ءوتتى ەمگ باسقارما توراعاسى ءانۋار جاقسىبەكوۆ.
فورۋم بارىسىندا قاتىسۋشى دەلەگاتتارعا 11 بايانداما وقىلىپ, تانىستىرىلدى. ونىڭ ىشىندە, 8-ءى – Microsoft, IBM, Schlumberger سىندى كومپانيالاردان كەلگەن حالىقارالىق ساراپشىلار دايىنداعان جۇمىستار. تسيفرلاندىرۋ جۇيەسىنىڭ كەلەشەكتەگى ماسەلەلەرى, قاۋىپتەر جانە باسقا دا تۋىنداعان ساۋالدار ەنەرگەتيكا ۆيتسە-ءمينيسترى ب.اقشولاقوۆتىڭ, حالىقارالىق ساراپشىلاردىڭ, ءىرى مۇناي-گاز جانە سەرۆيستىك كومپانيالار باسشىلارىنىڭ قاتىسۋىمەن پىكىر الماسۋ الاڭىندا كەڭىنەن تالقىلاندى.
باقىتگۇل باباش, «ەگەمەن قازاقستان»