بەس ينستيتۋتسيونالدى رەفورمانى ىسكە اسىراتىن «100 ناقتى قادام» ۇلت جوسپارىندا مەملەكەت باسشىسى «ازاماتتاردىڭ شەشىم قابىلداۋ پروتسەستەرىنە جەرگىلىكتى ءوزىن-ءوزى باسقارۋدى دامىتۋ ارقىلى بەلسەنە قاتىسۋى كەرەكتىگىنە» (97 قادام) ايرىقشا نازار اۋدارىپ, ونىڭ دامۋ جولىن ءۇش كەزەڭگە بولگەن. 2016 جىلدان باستالعان ءبىرىنشى كەزەڭدە باعدارلامالىق قۇجاتتاردى قابىلداۋ, جەرگىلىكتى ءوزىن ءوزى باسقارۋ قاۋىمداستىقتارىن دامىتۋ قاراستىرىلعان. 2018 جىلدان باستالعان ەكىنشى كەزەڭدە اكىمشىلىك-اۋماقتىق بولىنىستەردەگى 2 مىڭنان استام تۇرعىنى بار ەلدى مەكەندەردە جەرگىلىكتى ءوزىن-ءوزى باسقارۋ بيۋدجەتى مەن كوممۋنالدىق مەنشىك ينستيتۋتىن ەنگىزۋ كوزدەلگەن.
وسى ءىس بويىنشا قابىلدانعان «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ مەن ءوزىن ءوزى باسقارۋ تۋرالى» زاڭعا سايكەس اۋداندىق ءماسليحاتتار (وبلىستىق باعىنىستاعى قالا) جەرگىلىكتى جينالىسقا سايلانعان قاتىسۋشىلاردى جەرگىلىكتى قاۋىمداستىق جينالىسىنىڭ رەگلامەنتى بويىنشا 4 جىل مەرزىمگە بەكىتەتىن بولعان. وسىعان بايلانىستى ءبىز پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال جولداپ, تومەندەگى سۇراقتارعا جاۋاپ بەرۋىن وتىنگەن ەدىك:
1. وبلىستار بويىنشا جەرگىلىكتى ءوزىن ءوزى باسقارۋ قاۋىمداستىقتارىن دامىتۋ بويىنشا قانداي باعدارلامالىق قۇجاتتار قابىلداندى؟
2. بۇگىنگى تاڭدا ايماقتار بويىنشا 2 مىڭنان ارتىق تۇرعىنى بار قانشا اكىمشىلىك-اۋماقتىق بىرلىك بار؟ جەرگىلىكتى قاۋىمداستىقتار جينالىسىنىڭ رەگلامەنتتەرى جاپپاي بەكىتىلدى مە, ولارداعى قاتىسۋشىلارىنىڭ قۇرامى انىقتالدى ما؟
3. جەرگىلىكتى بيۋدجەتتەردى قاراستىرعاندا جەرگىلىكتى قاۋىمداستىقتارمەن كەلىسىلدى مە, ولاردى اۋداندىق ءماسليحاتتار بەكىتتى مە؟
4. جەرگىلىكتى قاۋىمداستىقتىڭ ارقايسىسىنىڭ بيۋدجەتىنە قانشا قاراجات ءبولىندى جانە ولاردىڭ قايدا جۇمسالاتىندىعى جوسپارلاندى ما؟
5. جەرگىلىكتى قاۋىمداستىقتىڭ بيۋدجەتىنە تۇسۋگە ءتيىستى كولىك جانە جەر سالىقتارىنىڭ جالپى كولەمى قانداي بولدى؟
6. جەرگىلىكتى ءوزىن ءوزى باسقارۋدىڭ كوممۋنالدىق مەنشىگىنە قانشا نىسان بەرۋ جوسپارلانعان؟
7. جەرگىلىكتى ءوزىن ءوزى باسقارۋدىڭ دامۋىنا ورتالىقتا جانە جەرگىلىكتى جەردە قانداي مەملەكەتتىك ورگان جاۋاپتى؟
8. ولار ءوز جۇمىستارى جونىندە قانداي مەرزىمدە ەسەپ بەرىپ وتىرادى؟
مىنە, وسى سۇراقتاردىڭ بارىنە جۋىردا ۇكىمەتتەن تولىق جاۋاپ الدىم. وندا قازاقستان رەسپۋبليكاسىنىڭ جەرگىلىكتى ءوزىن ءوزى باسقارۋدى دامىتۋ ماسەلەلەرىنە قاتىستى باعدارلامالىق قۇجاتتار, جەرگىلىكتى قوعامداستىقتىڭ رەگلامەنتى, قوعامداستىقتىڭ بيۋدجەتى, «جەرگىلىكتى ءوزىن ءوزى باسقارۋدىڭ كوممۋنالدىق مەنشىگىنە» بەرىلگەن نىساندار, ءوزىن ءوزى باسقارۋدى دامىتۋدى ۇيىمداستىراتىن ورتالىقتاعى جانە جەرگىلىكتى جەرلەردەگى جاۋاپتى مەملەكەتتىك ورگاندار, سونداي-اق وسى جۇمىستاردىڭ ناتيجەلەرى بويىنشا بەرىلەتىن ەسەپتەر تۋرالى تولىق اقپارات بەرىلىپ, ءبىزدى قاناعاتتاندىردى.
تولەۋبەك مۇقاشەۆ,
سەنات دەپۋتاتى