قازاق فۋتبولىنىڭ جاڭا ماۋسىمى جانكۇيەرلەر ءۇشىن جاقسى جاڭالىقتارمەن باستالدى. فۋتبول جاناشىرلارى ۇلتتىق قۇرامانىڭ ۆەنگريانى ۇتىپ, بولگاريانى ءوز الاڭىنان شىعارماي قويعانىن ايتىپ ءماز. جۋرناليستەر قاۋىمى جاس ورەندەر ەركەبۇلان سەيداحمەت پەن باكتيەر ءزاينۋتدينوۆتىڭ گولدارىن, باپكەر ستانيمير ستويلوۆتىڭ ويىنىن جارىسا جازا باستادى. ساراپشىلار قازاق فۋتبولىنىڭ دامۋ جولى جاڭا ارناعا بەت بۇرعانىن ايتادى.
قازاق فۋتبولىن دامىتۋ ءۇشىن ناقتى قادامدار جاسالۋى ءتيىس. وسى قادامدى ءىس جۇزىندە بەكىتۋ ءۇشىن قازاقستان فۋتبول فەدەراتسياسى الداعى ءتورت جىلعا ارنالعان جاڭا قۇجات قابىلداماق. ستراتەگيا «العا, فۋتبول! العا, قازاقستان» دەپ اتالادى. بۇل جوبا ەلىمىزدىڭ فۋتبول قاۋىمداستىعىنا 25 ءساۋىر, ياعني قازاق فۋتبولىنىڭ كۇنى تانىستىرىلادى.
قازاق فۋتبولىنىڭ دامۋىنا بەي-جاي قاراي المايتىن جانداردىڭ ءبىرى – ايدار كۇمىسبەكوۆ. ەل فۋتبولىنىڭ دامۋىنا قاتىستى باعدارلامالاردى ۇنەمى نازاردا ۇستاپ جۇرەتىن قازاقستان ۇلتتىق قۇراماسىنىڭ ەكس-قورعاۋشىسىن سوزگە تارتقان ەدىك:
- قاي ۋاقىتتا قانداي جولمەن جۇرەمىز؟ وسى ساۋالعا جاۋاپ بەرىپ وتىراتىن قۇجاتتىڭ ماڭىزدى ەكەنى راس. ءار فەدەراتسيانىڭ دامۋ ستراتەگياسى بولۋى مىندەتتى. ستراتەگيا ارقىلى جاڭا جۇيەلەر مەن دامۋ جولدارى پايدا بولادى. قوعامدا قالىپتاسىپ قالعان تۇيتكىلدى ماسەلەلەردى شەشۋگە كومەكتەسۋى ءتيىس.
- ايدار نۇرابەك ۇلى, جاڭادان قابىلداناتىن ستراتەگيا قانداي باعىتتاردى قامتۋى ءتيىس؟
- نەگىزگى باعىت – بالالار مەن جاسوسپىرىمدەر فۋتبولىن دامىتۋ. ياعني, بالالاردى دايىنداۋ. جاس باپكەرلەرگە كوڭىل ءبولۋ قاجەت. بۇعان دەيىن قابىلدانعان باعدارلاما ارقىلى فۋتبول ورتالىقتارى اشىلىپ, ءبىر جۇيەگە كەلتىرىلدى. وسى جۇمىس ءارى قاراي جاڭا باعىتتا ءوربۋى كەرەك ويلايمىن. فۋتبول الاڭدارىن اشىپ, ينفراقۇرىلىمدى دامىتۋ. استانادا سالىنىپ جاتقان فۋتبول ءۇيىنىڭ قۇرىلىسى اياقتالۋعا جاقىن. وسىنداي جابىق كەشەن سالسا دەپ ارماندايتىن ەدىم. ويتكەنى, قىس مەزگىلىندە فۋتبول وينايتىن الاڭ تابۋ قيىن. بۇقارالىق فۋتبولدى دا ۇمىت قالدىرماعان ءجون. قازاق فۋتبولىنىڭ دامۋىنا قاتىستى باعدارلامالاردى نازاردا ۇستاپ جۇرۋگە تىرىسامىن. ءبىزدىڭ بولاشاعىمىز - ەلدىڭ بولاشاعى.