قوستاناي قالاسىن دامىتۋ ماسەلەلەرىنە ارنالعان كەڭەسكە قاتىسقان ينۆەستور "BazisWest" كوسپانياسىنىڭ اتقارۋشى ديرەكتورى مارات جولمۇحامەدوۆ قوستاناي قالاسىندا الەمگە ايگىلى التى قاباتتىق Ramada Encore جەلىسىندەگى قوناق ءۇي سالاتىنىن ءمالىم ەتتى.
قوناق ۇيدە 163 بولمە بولادى. التى قاباتتىق قوناقۇيدە مەيرامحانا, فيتنەس-زالى بولادى. قوناق ءۇيدى ينۆەستور جەرگىلىكتى بيلىكتىڭ كومەك-قولداۋىمەن قالانى ءتىلىپ اعاتىن توبىل وزەنىنىڭ جاعاجايىنا سالاتىن بولادى. ونىڭ قۇرىلىسى بيىل باستالادى.
«Ramada Encore قوناق ءۇي جەلىسى الەمگە ايگىلى. الەمنىڭ 63 ەلىندە 800 قوناق ءۇيى بار. ءبىزدىڭ كومپانيا قوستانايدا قوناق ۇيمەن شەكتەلىپ قالمايدى, قالانىڭ ورتالىعىنان زاماناۋي ستيلدەگى, زاماناۋي قۇرىلىس ماتەريالدارىن قولدانىپ, 20 قاباتتىق تۇرعىن ۇيلەر سالامىز. سونىمەن بىرگە «بەرەكە» دەپ اتالاتىن شاعىن تۇرعىن اۋداننان ءتورت قاباتتىق 28 ءۇي سالۋدى دا جوسپارلاپ وتىرمىز» دەدى مارات جولمۇحامەدوۆ.
ينۆەستور كومپانيا "BazisWest" قوستانايداعى يندۋستريالىق ايماقتان سيليكات كىرپىش جانە تەمىر-بەتون بۇيىمدارىن شىعىراتىن زاۋىت تا سالاتىنىن حاباردار ەتتى. وسىنىڭ بارلىعىنا ينۆەستور 10-15 ميلليارد تەڭگە شاماسىندا ينۆەستيتسيا سالاتىن بولادى.
ء«بىز وسىنداي ينۆەستوردى كۇتكەن ەدىك. مۇنداي قوناق ءۇي قالامىزعا كەرەك-اق. بىزدە قوناق ۇيلەر بارشىلىق. بىراق تۋريستەرگە ورىن جەتە بەرمەيدى. سوندىقتان قالانىڭ بەت بەينەسى بولاتىنداي زاماناۋي قۇرىلىستار كەرەك. ال 20 قاباتتىق ۇيلەردى نەگە سالماسقا؟ قالا كولدەنەڭىنەن ەمەس, تىگىنەن ءوسۋى كەرەك. جايىلا بەرگەن قالا اۋىل بولادى» دەدى وبلىس اكىمى ارحيمەد مۇحامبەتوۆ.
ءنازيرا جارىمبەت,
«ەگەمەن قازاقستان»
قوستاناي