ۇجىمعا جاڭا باسشىنى شىعىس قازاقستان وبلىسىنىڭ اكىمى دانيال احمەتوۆ تانىستىردى. بۇل تۋرالى وبلىس اكىمىنىڭ ءباسپاسوز قىزمەتى حابارلادى. ايماق باسشىسىنىڭ وكىمىمەن ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ لاۋازىمىنا بۇعان دەيىن جولاۋشى كولىگى جانە اۆتوموبيل جولدارى باسقارماسىن باسقارعان مۇرات مۇساتاەۆ تاعايىندالدى.
مۇرات حابدىلجاپپار ۇلى 1963 جىلى ناۋرىزدىڭ 21-ىندە بۇرىنعى سەمەي وبلىسى, بورودۋليحا اۋدانى, بورودۋليحا اۋىلىندى دۇنيەگە كەلدى. 1991 جىلى سەمەي مەملەكەتتىك مەديتسينا ينستيتۋتىن, 1996 جىلى قر پرەزيدەنتى جانىنداعى مەملەكەتتىك باسقارۋ ۇلتتىق جوعارى مەكتەبىن بىتىرگەن. 2005 جىلى استراحان مەملەكەتتىك تەحنيكالىق ۋنيۆەرسيتەتىن ءتامامدادى. ەكونوميكا عىلىمدارىنىڭ دوكتورى.
ەڭبەك جولىن 1980 جىلى سەمەيدە «پرومستوي» قب «اسەم» كومسومول - جاستار بريگاداسىندا بالتاشى – بەتونشى, سودان كەيىن بىرنەشە جىل «اسىل-ينۆەست» يجق مەڭگەرۋشى, الماتى قالاسىندا ستراتەگيالىق جوسپارلاۋ اگەنتتىگىنىڭ باسقارمانىڭ باس مامانى, ءبولىم باسشىسى جانە باسشىسى قىزمەتتەرىن اتقاردى. 2002 جىلى استانادا قر پرەزيدەنتى اكىمشىلىگىنىڭ ۇيىمداستىرۋ-باقىلاۋ ءبولىمىنىڭ مەملەكەتتىك ينسپەكتورى, 2007 جىلى قاراعاندى وبلىسى اكىمىنىڭ ورىنباسارى, 2013 جىلدان باستاپ قر پرەمەر-ءمينيسترىنىڭ كەڭەسشىسى بولىپ قىزمەت ەتتى. كەيىن استانا قالاسىنداعى «ەۋرازيا» عىلىمي ورتالىعىن باسقاردى. ال 2017 جىلدىڭ مامىرىنان شقو جولاۋشى كولىگى جانە اۆتوموبيل جولدارى باسقارماسىنىڭ باسشىسى لاۋازىمىندا بولدى.
«مۇرات حابدىلجاپپار ۇلى تاجىريبەسى مول, ۇيىمداستىرۋشىلىق قابىلەتى جوعارى مامان. ەڭبەك جولىندا ءوزىن ءتارتىپتى جانە بىلىكتى قىزمەتكەر رەتىندە كورسەتتى. بۇل قىزمەتىندە تابىستار تىلەيمىز» – دەدى جاڭا باسشىنى تانىستىرعان دانيال احمەتوۆ.
ازامات قاسىم, «ەگەمەن قازاقستان»