«قۇداي ساقتادى» دەگەن وسى شىعار. زىريان اۋدانىنىڭ مالەەۆ اۋىلى تۇرعىندارىن سۋ تاسقىنىنان قۇتقارۋ جۇمىستارىنىڭ باسى-قاسىندا جۇرگەن اۋدان اكىمىنىڭ ورىنباسارى جاننا اسقاروۆا جانىنداعى ءۇش كىسىمەن بىرگە سۋعا كەتىپ قالا جازداپ, اللانىڭ القاۋىمەن امان قالدى.
وقيعا بىلاي بولىپتى. 31 ناۋرىزدان 1 ساۋىرگە قاراعان ءتۇنى اۋدان اكىمدىگى قىزمەتكەرلەرى سۋ باسقان مالەەۆ اۋىلىنىڭ تۇرعىندارىنىڭ كەيبىرىن اۋىل مەكتەبىنە ورنالاستىرىپ, كەيبىرىن اۆتوبۋستارمەن زىريان قالاسىنا تاسي باستايدى. ءبىر ۋاقىتتا اۋىلداعى ءبىر كوشەدە قۇتقارىلماعان ادام بار دەگەن حابار جەتەدى. قول قۋسىرىپ, قاراپ تۇراتىن ۋاقىت ەمەس. «نيۆاعا» وتىرىپ سول كوشەگە قاراي تارتادى. «اكىمدىكتەن كولىك كەلىپ, اۋدان اكىمىنىڭ ورىنباسارى جاننا اسقاروۆا قانداي كومەك قاجەتتىگىن سۇرادى. بىزبەن سويلەسكەننەن كەيىن كەلەسى ۇيگە قاراي كەتتى. بۇل كەزدە تاسقىن سۋى جولدى باسىپ بارا جاتقان ەدى. ءبىر مەزەتتە ەكپىنى قاتتى قارعىن سۋ كولىكتى اعىزا جونەلدى», - دەيدى وقيعاعا كۋا بولىپ, سوڭىنان اۋىل تۇرعىندارىن كومەككە شاقىرعان مالەەۆ ەلدى مەكەنىنىڭ تۇرعىنى ەۆدوكيا ساناروۆا.
كولىك ىشىندە ج.اسقاروۆامەن بىرگە مالەەۆ اۋىلدىق وكرۋگى اكىمدىگىنىڭ باس مامانى ناتاليا زايتسەۆا, مەكتەپ ديرەكتورى ايگۇل باشاەۆا مەن جۇرگىزۋشى الەكساندر حاباروۆ بولعان ەكەن. «كولىكتى قاپ-قارا تاسقىن شىر اينالدىرىپ اكەتتى. اينالا تاستاي قاراڭعى, سۋدىڭ گۇرىلىنەن باسقا ەشتەڭە ەستىلمەيدى. اۋەلدە كومەككە شاقىرىپ ايعايلاپ كورىپ ەدىك, ناتيجە شىقپادى. ءبىر كەزدە كولىككە سۋ كىرە باستادى. اياقتان ورلەگەن سۋ كەۋدەگە جەتكەندە, ومىردەن كۇدەر ءۇزىپ, وتباسىمىزعا حابارلاسا باستادىق. ءۇي-ىشىمىزبەن قوشتاسىپ جاتقاندا باسقا كولىكتىڭ جارىعى كوزگە شالىندى. ءبىزدى ىزدەپ جۇرگەن شىعار دەگەن ۇمىتپەن تەلەفوننىڭ شامىن جاعىپ, بەلگى بەرۋگە تىرىستىق. سول ارەكەتىمىزدەن ناتيجە شىعىپ, ىزدەۋشىلەر ءبىزدى تاۋىپ الدى. تالعات ەسىمدى جىگىت كولىكتىڭ تەرەزەسىن تەۋىپ سىندىرىپ, ءبىزدى كەزەكپەن سىرتقا شىعاردى. ولاردىڭ ءىسى ناعىز ەرلىك ەدى. ءوز باستارىن تاۋەكەلگە تىگىپ, ءبىزدى قۇتقاردى», - دەيدى اۋدان اكىمىنىڭ ورىنباسارى.
قانشا دەگەنمەن ايەل ادامنىڭ اتى ايەل ادام عوي. «سۋىق تيگىزىپ العان جوقسىز با؟ دەنساۋلىعىڭىز قالاي؟ بالكىم, ۋاقىتشا دەمالىس الارسىز», - دەپ سۇرادىق. «انام مەن ءسىڭىلىم دە تەلەفون سوعىپ, الاڭداۋشىلىعىن ءبىلدىرىپ جاتىر. مەن ولارعا: «قۇداي اجالدىڭ اۋزىنان ساقتادى. اۋرۋدان دا ساقتايدى» دەپ باسۋ ايتتىم. اۋداندا توتەنشە جاعداي رەجيمى ءالى الىنعان جوق. بۇقتىرمانىڭ سۋى تۇسە باستاعانىمەن, ونداعان ءۇي مۇز بەن سۋدىڭ قۇساۋىندا تۇر. سوندىقتان ءالى دە ساعاتپەن ساناسپاي جۇمىس ىستەۋگە ءماجبۇرمىز. تاسقىن سالدارى جويىلىپ, جاعداي تۇراقتالعان سوڭ, تولىق مەديتسينالىق تەكسەرۋدەن وتەتىن شىعارمىن» - دەپ قىسقا قايىردى.
رەتى كەلگەندە ايتا كەتەيىك, قازىرگى ۋاقىتتا زىريان اۋدانىنىڭ ءبىر ەمەس, بىرنەشە اۋىلىن سۋ باسىپ جاتىر. وبلىستىق توتەنشە جاعدايلار دەپارتامەنتىنىڭ تاراتقان مالىمەتتەرىنە سۇيەنسەك, اۋدانداعى 300-دەن استام ءۇي سۋ استىندا قالىپ وتىر. سوڭعى بىرنەشە كۇندە اۋداندا 811 (ونىڭ 200-گە جۋىعى - بالالار) تۇرعىن قاۋىپسىز جەرگە كوشىرىلىپتى.
ازامات قاسىم,
«ەگەمەن قازاقستان»
شىعىس قازاقستان وبلىسى,
زىريان اۋدانى