بۇگىندە ەكى مىڭ جىلدان استام تاريحى بار كونە تاراز شاھارىنىڭ ساۋلەتتىك كەلبەتىن وزگەرتۋ, تىڭ يدەيالار مەن بىرىڭعاي باستامالار ارقىلى قالا كوركىن قالىپتاستىرۋ جۇمىستارى جالعاسىپ كەلەدى.
بۇل ورايدا شاھار شەڭبەرىندە ءتۇرلى جوبالار قولعا الىنىپ, جەمىستى جۇزەگە اسۋدا. اسىرەسە شاھار تۇرعىندارى مەن قوناقتارى ءۇشىن ساياباقتاردى قايتا جاڭعىرتۋ, كوشەلەردى اباتتاندىرۋ سياقتى ماسەلەلەر شەشىمىن تابۋدا. الايدا بۇگىندە قالانى جارىقتاندىرۋ, جول بەلگىلەرى مەن باعدارشامدار ورنالاستىرۋ ماسەلەسى ماڭىزدى بولىپ وتىر. ماسەلەن, قازىردە تاراز قالاسىنداعى 14 كوشە مەن 84 كوشە قيىلىسىنداعى باعانالاردىڭ توزىعى جەتىپ تۇر.
سونىمەن قاتار وبلىس ورتالىعىنداعى جامبىل داڭعىلىنىڭ بويىندا ورنالاسقان 68 باعدارشامدى دا اۋىستىرۋ قاجەت. جۇمىستى جۇزەگە اسىرۋ ءۇشىن بۇل ماقساتقا 19 ميلليون تەڭگە قاراجات قاراستىرىلادى.
جامبىل وبلىسىنىڭ اكىمى اسقار مىرزاحمەتوۆ شاھار كولەمىندەگى باعانالار جايىن, قالا كوشەلەرىندەگى جارناما تاقتايشالار مەن بيلبوردتاردىڭ احۋالىن سىنعا العان بولاتىن. اكىمنىڭ بۇل سىنىنا وراي ءتيىستى مەملەكەتتىك مەكەمەلەردىڭ باسشىلارى دا قالا كەلبەتىن ارتتىرۋدا جۇمىس ىستەپ وتىرعانىن ايتقان. ال تاراز قالاسىنىڭ اكىمى رۇستەم داۋلەت قالاداعى باعدارشامداردى ازايتىپ, كەدەرگىسىز كولىك اعىنىن قامتاماسىز ەتۋ ماقساتىندا بىرقاتار جۇمىس اتقارىلىپ جاتقانىن مالىمدەدى.
الداعى ۋاقىتتاردا كونە شاھاردىڭ ورتالىق كوشەلەرى ينتەللەكتۋالدى جاياۋ جۇرگىنشىلەر وتكەلىمەن جابدىقتالىپ, بۇقارالىق اقپارات قۇرالدارى مەن الەۋمەتتىك جەلى ارقىلى كولىك جۇرگىزۋشىلەردىڭ كولىك اعىنىن ازايتۋعا قاتىستى ۇسىنىستارىنا كوڭىل بولىنەدى. سونىمەن قاتار قالا كوشەلەرىندەگى جارنامالاردى ورنالاستىرۋ ىسىندەگى جۇيەسىزدىكتەردى رەتتەۋمەن اينالىساتىن ارنايى قۇرىلىم پايدا بولۋى مۇمكىن. ەگەر پايدا بولعان جاعدايدا, اتالعان مەكەمە جارنامانى تالاپقا ساي ورنالاستىرۋعا, بىرىڭعاي ديزاينمەن ارلەۋگە باسىمدىق بەرەدى. بۇل ءوز كەزەگىندە شاھار كوركىن كەلتىرۋمەن قاتار, كونە قالانىڭ داۋلەتىنە ساۋلەتى ساي كەلبەتىن قالىپتاستىرماق.
حاميت ەسامان, «ەگەمەن قازاقستان»
جامبىل وبلىسى