پارلامەنت سەناتى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتى مۇشەلەرىنىڭ قاراعاندى وبلىسىنا ساپارى ودان ءارى جالعاسۋدا.
سەناتورلار رىسقالي ابدىكەروۆ پەن مارات تاعىموۆ شەت اۋدانىنداعى اقجال اۋىلىندا «شۇعىلا» مادەنيەت ۇيىندە اۋىل اكتيۆىمەن جانە تۇرعىندارىمەن كەزدەستى.
جۇزدەسۋدە مەملەكەت باسشىسى نىڭ الەۋمەتتىك ساياساتىنىڭ نەگىزگى باعىتتارى تۋرالى اشىق اڭگىمە بولدى. پارلامەنت دەپۋتاتتارى حالىق ءومىرىنىڭ دەڭگەيىن كوتەرۋگە جانە اۋىل شارۋاشىلىعىن دامىتۋعا باعىتتالعان ۇسىنىستاردىڭ ماڭىزدىلىعىن اتاپ ءوتتى. اۋىل ەڭبەككەرلەرىن, شاعىن جانە ورتا بيزنەس وكىلدەرىن مەملەكەتتىك قولداۋدىڭ ءتيىمدى تەتىكتەرى جانە جاڭا نەسيە ساياساتىن پايدالانۋ ماسەلەلەرى ەگجەي-تەگجەيلى تالقىلاندى.
سەناتورلار رىسقالي ابدىكەروۆ پەن مارات تاعىموۆتىڭ «Nova-تسينك» جاۋاپكەرشىلىگى شەكتەۋلى سەرىكتەستىگىنىڭ ەڭبەك ۇجىمىمەن كەزدەسۋىندە مەملەكەت باسشىسى ن.نازارباەۆتىڭ بەس الەۋمەتتىك باستاماسى جان-جاقتى ءتۇسىندىرىلدى. پرەزيدەنتتىڭ ۇسىنىستارى كاسىپورىن جۇمىسشىلارى تاراپىنان قىزۋ قولداۋ تاۋىپ وتىر. سونداي-اق ءوندىرىس قۋاتىن جاڭعىرتۋ جانە جاڭا تەحنولوگيالاردى قولدانۋ ماسەلەلەرى دە تالقىلاندى.
سەناتور راشيد تۇسىپبەكوۆ قاراعاندى وبلىستىق پروكۋراتۋراسىنىڭ باسشىلىعىمەن جانە قىزمەتكەرلەرىمەن كەزدەستى. دەپۋتات شارا بارىسىندا «پرەزيدەنتتىڭ باستامالارى ەلىمىزدەگى الەۋمەتتىك-ەكونوميكالىق, ساياسي جانە يدەولوگيالىق جاڭارۋلاردىڭ زاڭدى جالعاسى ەكەنى اقيقات. 2017 جىلعى كونستيتۋتسيالىق رەفورما ونىڭ نەگىزىن قۇراعان بولاتىن, مەملەكەت باسشىسىنىڭ جولداۋى نەگىزگى باعىتتاردى بەلگىلەدى, ال بەس باستاما بەت العان باعىتتى ىسكە اسىرۋداعى ناقتى شارالار بولىپ تابىلادى. پرەزيدەنتتىڭ بەس باستاماسى ءبىزدىڭ قوعامىمىزدىڭ الەۋمەتتىك بىرلىگىن نىعايتا تۇسۋگە ارنالىپ وتىر», - دەدى.
سەناتور ر. تۇسىپبەكوۆتىڭ سوزىندە پرەزيدەنت باستامالارىن ىسكە اسىرۋدى قامتاماسىز ەتۋدەگى پروكۋراتۋرا ورگاندارىنىڭ رولىنە ايرىقشا نازار اۋدارىلدى. «ەلباسىنىڭ بارشا قازاقستاندىقتار ءۇشىن اسا ماڭىزدى تاپسىرمالارىن پروكۋراتۋرا ورگاندارى مۇلتىكسىز ورىندالۋىن قامتاماسىز ەتۋگە مىندەتتى», دەدى ول.
دەپۋتاتتار ساۋلە ايتپاەۆا مەن دۋلات قۇسداۋلەتوۆ وبلىستىق ادىلەت دەپارتامەنتىندە بولدى. مەكەمەنىڭ باسشىلىعىمەن جانە قىزمەتكەرلەرىمەن اڭگىمە بارىسىندا سوت شەشىمدەرىنىڭ ورىنداۋ جونىندەگى قۇقىق قورعاۋ ورگاندارىنىڭ ءوزارا ءىس-قيمىلى, سونداي-اق زاڭنامالىق اكتىلەردى جەرگىلىكتى دەڭگەيدە ىسكە اسىرۋ ماسەلەلەرى تالقىلاندى.
سەنات دەپۋتاتى ۆلاديمير ۆولكوۆ سول كۇنى ولميپيادا رەزەرۆىنىڭ بالالار جانە جاسوسپىرىمدەر ۇيىمىنىڭ جەڭىل اتلەتيكا مانەجىندە جاتتىقتىرۋشىلارمەن جانە سپورتشىلارىمەن كەزدەستى.