الەۋمەتتىك دامۋدىڭ بەس تەتىگى

پارلامەنت پالاتا­لارى­نىڭ بىر­لەسكەن وتىرىسىندا ءوز وتانداستارىنا ارناعان «پرە­زي­دەنتتىڭ بەس الەۋمەتتىك باس­تا­ماسى» اتتى ۇندەۋى بۇعان دەيىنگى «بولاشاققا باعدار: رۋحا­ني جاڭعىرۋ» ماقالاسى مەن ء«تورتىنشى ونەركاسىپتىك رەۆوليۋتسيا جاعدايىنداعى دامۋ­دىڭ جاڭا مۇمكىندىكتەرى» اتتى جولداۋىنىڭ زاڭدى جالعاسى. ۇندەۋدەگى بەس باستامانى جوعا­رىدا اتالعان باعدار­لاما­لار­داعى مىندەتتەردىڭ ورىندالۋىن قامتاماسىز ەتەتىن تەتىكتەر دەۋگە دە بولادى. ويت­كەنى, بۇل باستامالار نەگىزىنەن حا­لىق­تىڭ, ونىڭ ىشىندە ەلىمىزدىڭ كەلە­شەگى جاستاردىڭ الەۋمەتتىك پروبلەمالارىن شەشۋگە ارنال­عان.

ۇندەۋدىڭ ءبىرىنشى باستاماسى ء«اربىر وتباسىنا باسپانا الۋ­دىڭ جاڭا مۇمكىندىكتەرىن بەرۋ» دەپ اتالادى. بۇل باستاما­سىن­دا ەلباسى باسپانا الۋدىڭ «7 – 20 – 25»باعدارلاماسىن ۇسى­ن­عان. باعدارلاماعا ساي نەسيە­گە الىنعان قاراجاتتىڭ ۇستەم­­اقىسى 14-16 پايىزدان 7 پايىز­عا دەيىن تومەندەپ, بانككە تولەنەتىن باستاپقى جارنا 30-50 پايىزدان 20 پايىزعا دەيىن قىس­قارعان. ال تولىق تولەۋ مەر­زىمى 10-15 جىل­دان 25 جىلعا د­ەيىن ۇزار­تىل­ماق. ارينە بۇل شا­را قارا­پايىم ازاماتتار مەن ەن­دى عانا شاڭىراق كوتەرگەن جاس جۇ­باي­لار ءۇشىن ۇلكەن كومەك بولادى.

ەلباسىنىڭ 2019 جىلدان باس­تاپ, جالاقى مولشەرى 60 مىڭ تەڭگەدەن اسپايتىن ازماتتاردىڭ تابىس سالىعىن 10 ەسەگە دەيىن قىس­قارتۋ تۋرالى ۇسىنىسى دا كوپ­شىلىكتىڭ كوڭىلىنەن شىعىپ, قول­داۋىنا يە بولىپ وتىر. سون­داي-اق پرەزيدەنت ۇندەۋىندە ءوزىن-ءوزى جۇمىسپەن قامتىعان جانە جۇمىسسىز جۇرگەن ازماتتار ءۇشىن شاعىن نەسيە بەرۋ تەتىكتەرى, ەلدى كوگىلدەر وتىنمەن قامتاماسىز ەتۋ ماسەلەسى دە ۇمىت قالماعان.

ەلىمىزدىڭ ستۋدەنتتەرى مەن ۇستازدار قاۋىمى ءبىلىم الۋدىڭ مەم­لەكەتتەن بولىنەتىن گرانتتار سان­ىنىڭ 20 مىڭعا دەيىن ۇلعاي­تىلاتىندىعىن زور تەبىرە­نىس­پەن قارسى الدى دەسەك ارتىق ايت­قاندىق بولماس. ءسوز جوق, بۇل شارا جوعارى ءبىلىم الۋدى قولجەتىمدى ەتۋدەگى يگى باستاما بولماق.

سونداي-اق پرەزيدەنتتىڭ ۇكى­مەتكە 2022 جىلدىڭ سوڭىنا دەيىن 75 مىڭ ورىندىق جاڭا جاتاق­حانالار سالۋدى تاپسىرۋىن, ونىڭ ستۋدەنت جاستارعا دەگەن اكەلىك قامقورلىعىنىڭ شىنايى كورىنىسى دەپ ءبىلۋىمىز قاجەت.

سۇيىكتى وتانىمىزدىڭ حالىق­ارالىق باسەكەگە قابىلەتتىلىگى, ونىڭ گۇلدەنە وركەندەپ, الەمنىڭ مەيلىنشە دامىعان 30 ەلىنىڭ قۇرامىنان كورىنۋى جاستاردىڭ قولىندا. ەلباسىنىڭ بيىل­عى جولداۋىندا كوتەرىلگەن ءتورتىن­شى ونەركاسىپتىك رەۆوليۋتسيانى جۇزەگە اسىرۋ تەرەڭ ءبىلىمدى, جوعارى بىلىكتى ماماندارسىز ءتىپتى دە مۇم­كىن ەمەس. قوعامنىڭ نەگىزى قوز­عاۋ­شى كۇشى بولىپ تابىلاتىن سول ماماندار, ءبىزدىڭ بۇگىنگى ستۋ­دەنتەر. مىنە, سوندىقتان دا پرە­زيدەنت ستۋدەنتەردىڭ الەۋمەتتىك جاعدايىن ءبىر مەزەت تە نازاردان تىس قالدىرعان ەمەس.

حالقىنا ارناعان ءوز ۇندەۋىن پرەزيدەنت: «بۇگىنگى باستامالار ەلىمىز تۇتاس, قوعامىمىز تۇراقتى بولسا عانا تابىستى جۇزەگە اسادى. ال ەل بىرلىگى – ەڭ ءبىرىنشى قازاقتىڭ بىرلىگى. جاھاندىق كوشتىڭ باسىندا جۇرەتىن مەرەيلى ەل بولۋ ءۇشىن, بىرلىك پەن ىنتىماق الدىمەن وزىمىزگە – قازاققا كەرەك», دەپ تۇيىندەدى. ەلباسىنىڭ بۇل جەردە سيرەك تە بولسا بايقالىپ قالاتىن رۋشىلدىق, جەرشىلدىك دەگەن كەلەڭسىز قۇبىلىستاردى مەڭزەپ وتىرعاندىعى ايتپاسا دا تۇسىنىكتى.

ىنتىماق پەن بىرلىگىمىزدى كوزىمىزدىڭ قاراشىعىنداي ساقتاپ, تۋ ەتىپ ۇستايىق, قادىرلى اعايىن!

ساتتار قۋاشباي, ەكونوميكا عىلىمدارىنىڭ دوكتورى, پروفەسسور