قازاقستان قۇراما كومانداسى جاڭا باپكەر ستانيمير ستويلوۆتىڭ باپتاۋىمەن العاشقى ويىنىن وتكىزدى. جولداستىق كەزدەسۋ بولسا دا, جەرلەستەرىمىز جەڭىسكە جەتىپ, جانكۇيەرلەردى ءبىر جەلپىنتىپ تاستادى. جەڭىسكە سۋساپ قالعان قۇرامامىزدىڭ بۇل ويىنى, سونىمەن قاتار بىرنەشە رەكوردتى جاڭارتتى.
سوڭعى ءتورت جىلدىڭ كولەمىندە قازاقستان فۋتبولىنا جاڭا لەپ الا كەلگەن بولگاريالىق باپكەر ستانيمير ستويلوۆ «استانا» كلۋبىنداعى قىزمەتىنەن كەتىپ, ۇلتتىق قۇرامانىڭ تىزگىنىن ۇستاعانى بەلگىلى. قۇراما العاشقى جولداستىق كەزدەسۋدى ۆەنگريا كومانداسىمەن وتكىزدى. قازاقستان قۇراماسى 2014 جىلى وتكەن جولداستىق ويىندا 3:0 ەسەبىمەن ويسىراي جەڭىلگەن ەدى. مىنە, اراعا ءتورت جىل سالىپ قايتا كەزدەسكەندە 3:2 ەسەبىمەن جەڭىسكە جەتتى.
ويىننىڭ ءوزى ءبىز ءۇشىن ءساتتى باستالدى. باۋىرجان يسلامحان كوتەرگەن بۇرىشتامادان رومان مۇرتازاەۆ ەسەپ اشتى. اراعا ءتورت مينۋت سالىپ باحتيەر زاينۋتدينوۆ ەسەپتى ەسەلەي ءتۇستى. بۇل قۇراماعا ەندى عانا قوسىلعان جاس فۋتبولشىنىڭ دەبيۋتتىك ويىنىنداعى تۇڭعىش گولى بولدى. جالپى, ايتا كەتۋىمىز كەرەك قازاقستان قۇراماسىنىڭ قاتارىنا الىنا سالىپ, ءا دەگەننەن گول سوققان فۋتبولشىلار ساۋساقپەن سانارلىق. ولار باقتيار بايسەيىتوۆ, نۇركەن مازباەۆ, ۆلاديمير نيدەرگاۋس, ۆيكتور زۋبارەۆ سەكىلدى ساناۋلىلار عانا. ال ولاردىڭ قاتارىنا بۇل ويىندا تەك زاينۋتدينوۆ قانا ەمەس, ەركەبۇلان سەيداحمەت تە ەنىپ وتىر.
كەزدەسۋدىڭ 21-مينۋتىندا العىر شابۋىلشى ادام سالاي گول سالعان سوڭ, سەيداحمەت تە ءبىر سەرپىلىپ, قاقپاعا دوپتى ءدال باعىتتاعان بولاتىن. ويىننىڭ جارتى ساعاتى وتە بەرگەن تۇستا ەسەپ 1:3 بولىپ, ءبىزدىڭ پايدامىزعا جازىلىپ تۇردى. جاقىندا عانا رەسەيلىك كلۋبتىڭ قاتارىنا اۋىسقان سەيداحمەت تۋرالى «ەگەمەن قازاقستان» گازەتى العاشقىلاردىڭ ءبىرى بولىپ رەپورتاج بەردى. گازەت ءتىلشىسى ارنايى باشقۇرتستانداعى «ۋفا» كلۋبىنىڭ ويىنىن تاماشالاپ, ەركەبۇلانمەن سۇحباتتاسىپ قايتقان ەدى. جۇرت جاقتاعان جاس جىگىت قۇراماعا الىنا سالىپ, بىردەن ءوزىنىڭ ەرەك ويىنشى ەكەنىن كورسەتە ءبىلدى. ەندىگى بار ءۇمىت وسىلاي ءوسىپ كەلە جاتقان جاستاردا ەكەنىن جالپاق جانكۇيەر كەشەگى ويىننان انىق سەزدى-اۋ دەپ وتىرمىز.
ودان بولەك ستانيمير ستويلوۆ موگومەد پاراگۋلگوۆ, يۋري پەرتسۋح سەكىلدى جاستاردى دا الاڭعا شىعارىپ, ءبىر تەكسەرىپ الدى. بۇل دەگەنىمىز, بۇرىنعى جەڭىلىستەردى ۇمىتقان, جەڭىمپازدىق رۋحى بار جاڭا قۇراما كوماندا جاساقتالىپ جاتىر دەگەندى ايعاقتايدى. بولگاريالىق باپكەر ەندى بۇگىن تاعى ءبىر سىننان وتپەك. ۆەنگريا جەرىندە وتەتىن كەلەسى ويىندا وتانداستارىمىز ءستانيميردىڭ جەرلەستەرىنە قارسى تۇرادى. بولگاريا قۇراماسى ءبىز ۆەنگريانى ۇتقان كۇنى بوسنيامەن ويناپ جەڭىلىپ قالدى. دەمەك الداعى ويىن قازاق فۋتبولشىلارىنىڭ قارىمىن كورسەتەدى.
ەرمۇحامەد ماۋلەن,
«ەگەمەن قازاقستان»