شىمكەنتتىڭ بالالارى شومىلۋ ماۋسىمىن باستاپ جىبەردى. بۇگىن «قوشقار اتا سەيىلى» فەستيۆالى بارىسىندا جەتكىنشەكتەر وزەنگە ءتۇسىپ, ءماز-مەيرام بولدى, دەپ حابارلايدى قازاقپارات.
بيىلعى كوكتەمنىڭ العاشقى كۇندەرى جازدىڭ ىستىق كۇنىندەي بولىپ تۇر. بۇگىننىڭ وزىندە اۋا رايى 26 گرادۋسقا دەيىن جىلىدى. اعاشتار ەرتە گۇلدەپ, جۇرت شومىلۋ ماۋسىمىن ناۋرىزدىڭ العاشقى كۇندەرىندە-اق باستاپ جىبەرگەن بولاتىن.
اسىرەسە قالا ىشىنەن وتەتىن «قوشقار اتا» وزەنىنە بارىپ, شومىلۋشىلار قاتارى كوبەيگەن. ناۋرىز مەرەكەسىن اتاپ ءوتۋ كەزىندە دە جەتكىنشەكتەر ءجاي قىدىرۋمەن شەكتەلە قويمادى. ولار وزەننىڭ سالقىن سۋىنا شومىلىپ, بويلارىن سەرگىتىپ الدى.
سينوپتيكتەر الداعى دەمالىس كۇندەرى 29 گرادۋسقا دەيىن ىسيتىنىن بولجاۋدا. الداعى اپتادا جاۋىن-شاشىندى كۇندەر بولادى دەپ كۇتىلۋدە.