ناۋرىز مەيرامى - بەرەكە مەن بىرلىكتىڭ, ىرىس پەن مولشىلىقتىڭ باستاۋى. كۇن نۇرىنا مالىنعان كوكتەمنىڭ شۋاقتى شاقتارىمەن بىرگە جەر بۋسانىپ, «ارقانىڭ قىسى اتتان تۇسەتىن» كەز, عاسىرلارعا ۇلاسقان ەجەلگى بۇكىلحالىقتىق قاسيەتتى مەرەكە.
-قالا تۇرعىندارىنىڭ وسى ءبىر سالتاناتتى مەرەكەنى بەيبىت تۇردە شات-شادىمان اتاپ وتۋلەرىن قامتاماسىز ەتۋ ماقساتىندا ءتارتىپ ساقشىلارى كۇشەيتىلگەن قىزمەت اتقارۋعا كوشتى,-دەدى سەمەي قالالىق ىشكى ىستەر باسقارماسى ءباسپاسوز قىزمەتىنىڭ جەتەكشىسى ەلۋبەك وسپانوۆ,-سوعان قاراماستان بۇگىن ءبىزدىڭ باسشىلىق جانە جەكە قۇرام ناۋرىزدى اتاپ ءوتتى.
پوليتسەيلەردىڭ ناۋرىزىن قالالىق ءىىب باستىعىنىڭ ورىنباسارى پوليتسيا پولكوۆنيگى تالعات قۇلجانبەكوۆ اشىپ, ناۋرىز - ەل تىنىشتىعى مەن تۇراقتىلىعىنىڭ, ىزگىلىك پەن بەيبىت ءومىردىڭ نىشانىن تانىتاتىن, بارشا ۇلتتار مەن ۇلىستاردى بىرىكتىرەتىن قۋانىشقا تولى ورتاق مەرەكە ەكەنىن ايتتى. جەكە قۇرامدى ناۋرىز مەرەكەسىمەن قۇتتىقتاپ, تىڭ باستامالار, ىزگى ماقساتتار مەن يگىلىكتى ىستەرگە جەتۋدى تىلەدى.
مەرەكەلىك ءىس-شارا بارىسىندا قر ءىىم بۇيرىعىمەن ءداستۇر بويىنشا ءبىر قاتار قىزمەتكەرگە پاگوندار تابىستالدى. سونداي-اق قوعامدىق ءتارتىپتى ساقتاۋدا, ءوزىنىڭ قىزمەتتىك مىندەتتەرىن ادال اتقارعانى ءۇشىن ىشكى ىستەر باستىعىنىڭ بۇيرىعىمەن 9 قىزمەتكەر گراموتامەن, 9 قىزمەتكەر العىس حاتپەن جانە 118 قىزمەتكەر اقشالاي سىياقىمەن ماراپاتتالدى. سالتاناتتى جيىن سوڭى قالالىق ەسترادا جۇلدىزدارىنىڭ دايىنداعان كونتسەرتتىك باعدارلاماسىمەن جالعاستى.
راۋشان نۇعمانبەكوۆا