كەشە ششۋچە قالاسىندا شاڭعى سپورتىنا ارنالعان زاماناۋي بازاسىنىڭ اشىلۋ سالتاناتى ءوتتى. جيىنعا مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك جاراسباەۆ, ۇلتتىق وليمپيادالىق كوميتەتى سپورت ديرەكتسياسىنىڭ ديرەكتورى ەلسيار قاناعاتوۆ, قازاقستان رەسپۋبليكاسى شاڭعى جارىسى فەدەراتسياسىنىڭ ءبىرىنشى ۆيتسە-پرەزيدەنتى نيكيتا دەۆياتكين قاتىستى.
سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك جاراسباەۆتىڭ ايتۋىنشا, جاڭا نىسان بارلىق حالىقارالىق ستاندارتتارعا ساي كەلەدى. «كەشەندى تۇرعىزۋ بارىسىندا زاماناۋي قۇرىلىس تەحنولوگيالارى, جوعارى ساپالى ماتەريالدار قولدانىلدى. نىساننىڭ تەحنيكالىق جانە تەحنولوگيالىق جابدىقتالۋى حالىقارالىق جارىستاردى وتكىزۋگە ىڭعايلاپ سالىندى, ياعني نىسان حالىقارالىق شاڭعى جارىسى فەدەراتسياسىنىڭ (FIS) بارلىق ستاندارتىنا سايكەس دەگەندى بىلدىرەدى. اتالعان نىسان حالىقارالىق بياتلونشىلار وداعىنىڭ (IBU) تالاپتارىنا دا ساي كەلەدى», دەيدى ول.
شاڭعى كەشەنى كورەرمەندەرگە ارنالعان تريبۋنالار, باسسەين جانە سپورت زالدارىمەن جابدىقتالعان. سونداي-اق تورەشىلەر پاۆيلونى, دارىگەرلىك قالپىنا كەلۋ ورتالىعى, اكىمشىلىك عيماراتى, 187 ورىنعا شاقتالعان قوناقۇي دە بار.
ۇوك سپورت ديرەكتسياسىنىڭ ديرەكتورى ەلسيار قاناعاتوۆ اتالعان كەشەننىڭ ەلىمىزدە قىسقى سپورت تۇرلەرىنىڭ دامۋىنا ىقپال ەتەتىنىن, تيىسىنشە شاڭعى جارىسى مەن بياتلوننان جاتتىعۋلار, جارىستار وتكىزۋگە ۇلكەن مۇمكىندىك بەرەتىنىن العا تارتتى. «ەندىگى جەردە سپورتشىلارىمىز الىسقا شىقپاي-اق, ەلىمىزدە وزدەرىنىڭ دايىندىقتارىن پىسىقتاۋعا مۇمكىندىك الىپ وتىر. سونىمەن قاتار بۇدان بىلاي ەلىمىزدە شاڭعى جارىسى, بياتلون, شاڭعى-روللەر سپورتى بولسىن, حالىقارالىق دارەجەدەگى جارىستاردى وتكىزۋگە بولادى. بۇگىنگى تاڭدا الىس, جاقىن شەتەلدەگى سپورتشىلار وسى شاڭعى بازاسىندا وزدەرىنىڭ وقۋ-دايىندىق جيىندارىن وتكىزۋگە قىزىعۋشىلىق تانىتىپ وتىر», دەدى ە.قاناعاتوۆ.
شاڭعى بازاسى مەن عيماراتتارى 125.54 گا اۋماقتى الىپ جاتىر. سونداي-اق ۇزىندىعى 4584 مەتر قۇرايتىن شاڭعى تراسساسى, دايىندىق الاڭى, شاڭعىنى سىرعاناتۋ تومپەشىگى, تابيعي ەمەس قارمەن جابدىقتاۋ جۇيەسى بار.
قازاقستان رەسپۋبليكاسى شاڭعى جارىسى فەدەراتسياسىنىڭ ءبىرىنشى ۆيتسە-پرەزيدەنتى نيكيتا دەۆياتكين كەشەننىڭ مۇمكىندىكتەرى جونىندە ايتىپ بەردى. «ارينە, بازانىڭ اشىلۋىنا ەڭ الدىمەن ءبىزدىڭ سپورتشىلار مەن جاتتىقتىرۋشىلار قۇرامى قۋانىپ جاتىر. ەندى ءبىز ءوز ەلىمىزدە ەڭ ءىرى حالىقارالىق جارىستاردى وتكىزە الامىز. تراسسانى سالۋ كەزىندە بىزگە حالىقارالىق شاڭعى فەدەراتسياسىنىڭ وكىلدەرى ءوز اقىل كەڭەستەرىن ايتىپ, قۇرىلىس بارىسىمەن تانىسىپ وتىردى. قورىتىندىسىندا, ولار بىزگە تراسسانىڭ ساپاسى بارلىق الەمدىك ستاندارتتارعا ساي كەلەدى دەگەن سايكەستىك سەرتيفيكاتىن بەردى. سونىڭ ارقاسىندا, بولاشاقتا ءبىز قازاقستاندا قۇرلىقتىق كۋبوك, الەم كۋبوگى كەزەڭى مەن الەم چەمپيوناتتارىن وتكىزەمىز دەپ جوس- پارلاپ وتىرمىز», دەپ مالىمدەدى شاڭعى فەدەراتسياسىنىڭ ءبىرىنشى ۆيتسە-ءمينيسترى.
ءالي بيتورە, «ەگەمەن قازاقستان»