قازىرگى تاڭدا ەلىمىزدىڭ كەيبىر وڭىرلەرىندە كوكتەمگى سۋ تاسقىنىنىڭ الدىن الۋ ءۇشىن قاۋىرت شارالار قولعا الىنۋدا. بۇل رەتتە اقمولا وبلىسىندا دا قىزۋ دايىندىق جۇمىستارى جۇرگىزىلۋدە. بۇعان كوز جەتكىزۋ ءۇشىن وبلىستىق توتەنشە جاعدايلار دەپارتامەنتى وتكەن اپتادا سۋ قاۋپى باسىم اتباسار اۋدانىنداعى جاعدايمەن ءجىتى تانىستىرۋ ءۇشىن بۇقارالىق اقپارات قۇرالدارى وكىلدەرىنە ءباسپاسوز تۋرىن وتكىزگەن بولاتىن. بۇل جولى جۋرناليستەر زەرەندى مەن ساندىقتاۋ اۋداندارىنداعى جاعدايمەن تانىستى.
توتەنشە جاعدايلار دەپارتامەنتىنىڭ باستىعى, ازاماتتىق قورعانىس پولكوۆنيگى الەكسەي سوۆەتوۆ باستاعان توپ زەرەندى جانە ساندىقتاۋ اۋدانىنا جاسالعان ءباسپاسوز تۋرى بارىسىندا جەرگىلىكتى اكىمدىكتەردىڭ جۇمىس بارىسىن قالاي جولعا قويعانىمەن جانە بىرلەسە ارەكەت ەتۋ جايىمەن جان-جاقتى تانىستىردى. اتباسارعا قاراعاندا بۇل ەكى اۋداندا سۋ تاسقىنىنىڭ قاۋپى ازداۋ. سوندا دا تاسقىننىڭ الدىن الۋ دايىندىعىنىڭ جوعارى ەكەندىگىنە كوز جەتكىزدىك. قار كۇرت ەرىپ كەتپەسە, توتەنشە جاعداي بولا قويماس دەگەن ءۇمىت بار. زەرەندى اۋدانىندا 4 گيدروتەحنيكالىق قۇرىلىسقا جانە ساندىقتاۋ اۋدانىندا 1 نىسانعا جان-جاقتى تەكسەرۋ جۇمىستارى جۇرگىزىلىپ وتىر. سونىڭ بارىسىندا ەرىگەن قار سۋلارىنىڭ اعۋ باعىتتارى مەن بوگەتتەردىڭ سۋدى ۇستاپ تۇرۋ مۇمكىندىكتەرى ەكشەلىپ, ساندىقتاۋ اۋدانىنىڭ اپاتتىق-قۇتقارۋ بولىمشەسىنىڭ دايىندىعى تاعى ءبىر پىسىقتالدى.
ساندىقتاۋ اۋدانى اۋماعىنداعى قاۋىپتى سانالاتىن ماكسيموۆكا بوگەتىنىڭ قازىرگى تەحنيكالىق جاعدايى قالىپتى.
زەرەندى اۋدانىندا قالىپتاسقان جاعدايدى ايتساق, قازىرگى تاڭدا مۇنداعى ايدابول, الەكسەەۆكا, يۆانوۆسكايا جانە بايتەرەك سياقتى سۋ بوگەتتەرىنىڭ تەحنيكالىق جاعدايى دا ويداعىداي دەسە-ءدى. مىسالى ايدابول اۋىلىنداعى بوگەتكە ءۇش وزەن كەلىپ قۇيادى. اتالعان ەلدى مەكەننىڭ سولتۇستىك-شىعىسىندا ورنالاسقان بۇل وزەندەر نەگىزگى باستاۋىن وسى جەردەن الادى. نەگىزىنەن بوگەت 1977 جىلى پايدالانۋعا بەرىلسە, 2016 جىلى بوگەتتىڭ كورپۋسى 2.5ح2.5 م ولشەمدى سۋ وتكىزەتىن بىرلىكپەن جابدىقتالعاندىعىن قاپەرگە سالا كەتكەن ارتىق ەتپەس. سۋ قويماسىندا قازىرگى تاڭدا شامامەن 600 مىڭ تەكشە مەتر سۋ جينالسا, جازعى كەزەڭدە 150-200 مىڭ تەكشە مەترگە دەيىن تومەندەيدى ەكەن. جالپى سۋ قويماسىنىڭ ەڭ جوعارعى وتكىزۋ قابىلەتى مينۋتىنا 152 تەكشە مەتر كورىنەدى. سول سياقتى الەكسەەۆكا, يۆانوۆسكايا جانە بايتەرەك بوگەتتەرىنىڭ جاعدايى دا قاناعاتتانارلىق ەكەندىگىنە كوز جەتكىزىپ قايتتىق. تاعى ءبىر بەلگىلىسى, بۇل بوگەتتەردە سۋ اعىزۋ جۇيەسى قولمەن رەتتەلمەيدى. بارلىق قۇبىرلار اشىق قالدىرىلعان. ەگەر سۋ دەڭگەيى كوتەرىلگەن جاعدايدا سۋ الگى قۇبىرلار ارقىلى سىرتقا اعىپ كەتەدى.
اسقار تۇراپباي ۇلى, «ەگەمەن قازاقستان»
اقمولا وبلىسى